"რუსიჩის" ერთ-ერთი ლიდერი, რომელიც დახვრეტილი მებრძოლების ცხედრების ფონზე პოზირებდა, უკრაინას არ გადასცეს -  რა არის ფინეთის ამ უცნაური გადაწყვეტილების არგუმენტი?

ფინეთის სასამართლომ უარი განაცხადა ე.წ. დივერსიულ-შეტევითი-სადაზვერვო ჯგუფის, "რუსიჩის" ერთ-ერთი ლიდერის, რუსი იან პეტროვსკის უკრაინისთვის გადაცემაზე.

ამის შესახებ ფინური გაზეთი "Helsingin Sanomat“- ი წერს. გამოცემის ცნობით, სასამართლომ ვერ იპოვა პეტროვსკის დაკავების სამართლებრივი არგუმენტები, შესაბამისად, მისი დაუყოვნებლივი გათავისუფლება გადაწყდა.

უკრაინაში პეტროვსკის ბრალს სდებენ, 2014-2015 წლებში სამხედრო დანაშაულების ჩადენაში. მან აღიარა კიდეც, რომ აწამა და მოკლა ტყვედ აყვანილი რამდენიმე პიროვნება.

პეტროვსკი უკრაინაში იბრძოდა 2014 წლიდან და "რუსიჩის" სხვა ლიდერებთან ერთად გამოაქვეყნა ფოტო და ვიდეო, რომლის ფონადაც ჩანდა ლუგანსკის ოლქში დახვრეტილი უკრაინელი მებრძოლების ცხედრები.

• "ღირსების შელახვა?!“

ა.წ. ზაფხულში იანი პეტროვსკი დააკავეს ფინეთში, საიდანაც ნიცაში აპირებდა გაფრენას.

"გენერალური პროკურორის მოთხოვნით, 23 აგვისტოს ფინეთის კომპეტენტურმა ორგანოებმა დააკავეს რუსეთის მოქალაქე, რომელსაც ტერორისტული ორგანიზაციის წევრობისთვის ეძებს უკრაინის შინაგან საქმეთა სამინისტრო", - იუწყებოდა იმჟამად უკრაინის გენერალური პროკურატურა.

"Helsingin Sanomat“ - ი წერს, რომ ფინეთის სასამართლომ ვერ ნახა ამის შესაბამისი მტკიცებულებები.

დაკავებულის უკრაინაში გადაცემაზე უარის თქმის მიზეზი უკრაინის ციხეებში ყოფნის პირობები გახდა, რაც ადამიანის უფლებათა ევროპულმა სასამართლომ ადამიანის უფლებათა ევროპული კონვენციის მე-3 მუხლის დარღვევად მიიჩნია. ECHR-მა აღნიშნა უკრაინის ციხეების სისტემის ხარვეზების მთელი რიგი მიზეზები, მათ შორის მთავარი გახლდათ კოლონიების გადატვირთვა.

ასევე, ფინეთის სასამართლოს აზრით, მისი უკრაინისთვის გადაცემა, პეტროვსკისთვის ღირსების შელახვა იქნებოდა.

"რუსიჩი", რომლის მეთაურიც იყო იან პეტროვსკი, მიიჩნეოდა ლუგანსკის თვითგამოცხადებული რესპუბლიკის ერთ-ერთ ყველაზე ცნობილ ქვედანაყოფად 2014-2015 წლებში. წყარო

• თარგმნა ანასტასია შალიკაშვილმა