მნიშვნელოვანი ინფორმაცია
31
მარტიდღის ზოგადი ასტროლოგიური პროგნოზი
მნიშვნელოვანი ინფორმაცია
მკითხველის რჩევით
კვირის კითხვადი სტატიები
თვის კითხვადი სტატიები
ასევე დაგაინტერესებთ
"უკრაინას აკლია შეიარაღება - მძიმე საარტილერიო დანადგარები და ჭურვები" - რას ამბობს მამუკა მამულაშვილი ტყვედ ჩავარდნილ ქართველებსა და ფრონტზე შექმნილ ვითარებაზე?
11:01 / 28-11-2023
ამ ცოტა ხნის წინ, პირველად, რუსეთ-უკრაინის 2-წლიანი ომის განმავლობაში, "ქართულმა ლეგიონმა“ ზედიზედ 3 მებრძოლი დაკარგა და ასევე პირველად ამ ომის განმავლობაში, რუსებს ქართველი ტყვეები ჰყავთ. 25 ნოემბერს უკრაინის ხელისუფლებამ გაავრცელა ინფორმაცია, რომ გასული 24 საათის განმავლობაში რუსული ძალების მიერ კიევზე დრონებით განხორციელებული თავდასხმა ომის დაწყებიდან დღემდე ყველაზე მასშტაბური იყო. უკრაინის დედაქალაქზე მიტანილი იერიშის გამო, კიევში ვიზიტით მყოფ ლატვიის პრეზიდენტს, ედგარს რინკევიჩს თავშესაფარში ჩასვლა მოუწია. 27 ნოემბერს საჰაერო განგაში გამოცხადდა უკრაინის მთელ ტერიტორიაზე. ყველაფერი მეტყველებს იმაზე, რომ ომი განსაკუთრებულად ცხელ ფაზაში შევიდა. უფრო ვრცლად უკრაინის ფრონტის ხაზზე და ქართველ მებრძოლებზე "ქართული ლეგიონის“ მეთაური მამუკა მამულაშვილი გვესაუბრება:
- ტყვეებთან დაკავშირებით ვერაფერს გეტყვით, მათ "ქართულ ლეგიონთან“ არანაირი კავშირი არ აქვთ. საქართველოს მთავრობას საკმაოდ კარგი ურთიერთობა აქვს რუსეთთან, პრემიერს შეუძლია მონაწილეობა მიიღოს ბიჭების გათავისუფლების საქმეში. მალე წინასაარჩევნო პერიოდი დაიწყება, იმედი მაქვს, ამის გამო მაინც გააკეთებენ რამეს.
- ქვეყნის მმართველი პარტიის თავმჯდომარე ირაკლი კობახიძემ უკვე თქვა, რომ ვერაფერს გააკეთებენ, რადგან ისინი რუსეთ-უკრაინის სამხედრო ტყვეები არიან...
- დიახ, მაგრამ საქართველოს მოქალაქეები არიან. ისინი ვალდებულები არიან, საკუთარ მოქალაქეებზე იზრუნონ. რუსული პროპაგანდისტული მედია განსაკუთრებულ ყურადღებას უთმობს ქართულ ტყვეებს, ntv - მ ტყვედ ჩავარდნილი ერთ-ერთი ქართველის, გიორგი შუბითიძის მორიგი ჩვენება გამოაქვეყნა, რომელშიც შუბითიძე ყვება, რომ მაიდანის მოვლენებში იმჟამინდელმა სპეცსამსახურებმა ჩართეს და უკრაინელების მკვლელობა დაავალეს. რამდენად სარწმუნოა, რუსული ტერორის ქვეშ მყოფი ადამიანის ასეთი ჩვენება?
რუსული პროპაგანდა და საქართველოს ამჟამინდელი მთავრობა ძალიან ხშირად ემთხვევიან ხოლმე ერთმანეთს ვერსიების გავრცელებაში. უკრაინულ მაიდანში ქართული სპეცსამსახურების მონაწილეობის ვერსია "ქართული ოცნების“ ლიდერების მხრიდანაც ხომ მოგვისმენია? ყველაფერი ნათელია, ნორმალურად მოაზროვნე ქართველისთვის. ეს ადამიანები უკრაინაში ორი წლის წინ, ფართომასშტაბიანი ომის შემდეგ ჩამოვიდნენ. რუსული პროპაგანდა მათ იმას ათქმევინებს, რისი გახმოვანებაც აწყობს, მაგრამ ფაქტები სულ სხვაგვარია, ეს ბიჭები 2016 წელს რომ უკვე აქ ყოფილიყვნენ, მე აუცილებლად მეცოდინებოდა. ამ პერიოდში უკრაინაში ვიყავი უკვე და ასე თუ ისე, თითქმის ყველა ქართველ მებრძოლთან მქონდა შეხება, ყოველ შემთხვევაში, სახელი და გვარი მაინც მექნებოდა გაგონილი. გიორგი შუბითიძისა და გიორგი გოგლიძის შესახებ მე ნამდვილად არაფერი გამიგია. მე ვიცი, რას ნიშნავს რუსების ხელში ტყვეობა, ჯერ კიდევ ბავშვი აღმოვჩნდი მათ ტყვეობაში. ამ ბიჭებს ძალიან რთული მომენტები აქვთ გასავლელი. იმედია, გაუძლებენ და გადარჩებიან.
- რაც შეეხება ბრძოლის ველზე დაცემულ ლეგიონერებს, თქვენ ხშირად აღნიშნავდით, რომ "ქართულ ლეგიონში“ პროფესიონალები იყვნენ და კარგად იცოდნენ, როგორ უნდა გადარჩენილიყვნენ. ორი წლის განმავლობაში პირველად, თანაც ერთმანეთის მიყოლებით, თვენახევარში სამი გამოცდილი ქართველი მებრძოლი დაკარგეთ. როგორ მოხდა ეს?
- რუსეთ-უკრაინის ფრონტზე ახლა ძალიან მძიმე ბრძოლები მიმდინარეობს. რუსები განსაკუთრებით აქტიურობენ აღმოსავლეთის მიმართულებით, კორეამ მიაწოდა დიდი რაოდენობით საარტილერიო ჭურვები და ახლა ფრონტის ხაზის სურათის შეცვლას ცდილობენ. ამით არის განპირობებული ჩვენი ბიჭების დაღუპვაც.
- რამდენად შესაძლებელია, რომ ისე მოხდეს, რომ მართლაც რუსების სასარგებლოდ შეიცვალოს არსებული მოცემულობა, მით უფრო, რომ ჩვენი მოლოდინები უკრაინულ კონტრშეტევასთან დაკავშირებით არ გამართლდა.
- საქმე იმაშია, რომ უკრაინას აკლია შეიარაღება - მძიმე საარტილერიო დანადგარები და ჭურვები. სწორედ ამიტომ ვერ მოხერხდა სწრაფი კონტრშეტევის განხორციელება. ზამთარი საარტილერიო ბრძოლებისთვის ცოტა რთული ფაზაა, ტექნიკის გადაადგილებაც ჭირს და ქვეითებისაც, ამიტომ ძირითადად საარტილერიო დუელები იქნება. ეს, რა თქმა უნდა, სიტუაციას ართულებს. დღეს უკრაინას სჭირდება დაფინანსება და შესაბამისი აღჭურვილობა.
- დასავლურ პრესაში სულ უფრო ხშირად გვხვდება სტატიები უკრაინაში არსებულ კორუფციაზე. მაგალითად, გაზეთი "პოლიტიკო“ წერდა, რომ ბაიდენის ადმინისტრაციის ოფიციალურ პირებს ბევრად უფრო აწუხებთ კორუფცია უკრაინაში, ვიდრე ამას საჯაროდ აღიარებენ. გამოცემაში ისიც აღნიშნული იყო, რომ კორუფციის საკითხმა შეიძლება შეარყიოს უკრაინელი საზოგადოებისა და უცხოელი ლიდერების ნდობა ზელენსკის მთავრობის მიმართ. კულუარებში ლაპარაკია დაკარგულ იარაღზეც...
- იარაღი არსად იკარგება, უბრალოდ, პროცესები ისე განვითარდა, რომ ბევრად უფრო მეტი ამუნიციის გამოყენება დაგვჭირდა, ვიდრე გათვლილი იყო. რაც შეეხება კორუფციას, მე არ ვარ პოლიტიკოსი და პოლიტიკურ განცხადებებს ვერ გავაკეთებ, მე შემიძლია მხოლოდ ფაქტების შესახებ ვილაპარაკო. უკრაინაში კორუფცია რომ არის, თანაც, საკმაოდ დიდი მასშტაბების, ამას არავინ უარყოფს, მაგრამ დასავლეთის მიერ მოწოდებული შეიარაღება სრულად გამოიყენება ბრძოლის ველზე, ფინანსების შესახებ კი ნამდვილად არაფერი ვიცი, ასეთ ინფორმაციასთან შეხება არ მქონია.
- მას შემდეგ, რაც უკრაინის შეიარაღებული ძალების მთავარსარდალმა, ვალერი ზალუჟნიმ უკრაინული კონტრშეტევის ჩავარდნაზე ისაუბრა, გავრცელდა ინფორმაცია, რომ მასა და პრეზიდენტ ზელენსკის შორის სერიოზული დაპირისპირებაა.
- ეს ალბათ რუსული პროპაგანდის აგორებული ამბავია. მე ასეთი ინფორმაცია არ მაქვს.
- ამ მოცემულობის ფონზე, როგორია ჩვენი, ქართველი მებრძოლების განწყობა და მოტივაცია, ომით გადაღლა ან იმედგაცრუება ხომ არ შეინიშნება მათში?
- არანაირი გადაღლა და იმედგაცრუება, ძველებური მონდომებითა და შემართებით ვაკეთებთ ისევ იმას, რასაც ამ 10 წლის განმავლობაში ვაკეთებდით. სამწუხაროდ, გვაქვს მსხვერპლი, გამოცდილი მებრძოლები დაგვეღუპა, 11 დაგვეჭრა, დაჭრილების მდგომარეობა უკეთესია და ისინი მზად არიან განაგრძონ ბრძოლა, როგორც კი ფეხზე დადგებიან.
- როგორც მეთაური, რაც იტყვით, დაღუპულ მებრძოლებზე?
- როგორც მახსოვს, ზაქრო შუბითიძეზე ბევრი გესაუბრეთ, ის ერთ-ერთი ყველაზე კეთილი ადამიანი იყო, ვინც შემხვედრია.
იგივეს თქმა შემიძლია რამაზ ფეტელავასა და ბექა ლომაშვილზე. ისინიც, არა მხოლოდ საუკეთესო ჯარისკაცები, გამორჩეულად კარგი ადამიანებიც იყვნენ. სამაგალითო ოჯახებში იყვნენ გაზრდილები. ამ რამდენიმე დღის წინ, ბიჭებთანაც ვლაპარაკობდი, საუკეთესოები პირველ რიგში გვეღუპებიან. ძალიან დამწყვიტეს გული, ყველა ძალიან განვიცდით ამ ბიჭების ამბავს.
- ყველაფრის მიუხედავად, კარგი ამბებიც გაქვთ, ახლახან თქვენი ერთ-ერთი მებრძოლი პატრიარქმა დააჯილდოვა.
- კი, ასეთი ამბებიც გვაქვს, იმიტომ რომ გამორჩეული ბიჭები გვყავს. ამჯერად პატრიარქმა დააჯილდოვა ჩვენი მებრძოლი - უკრაინაში გამოჩენილი სიმამაცისა და თავგანწირვისთვის, არაერთი ჯილდო გვაქვს მიღებული დაზვერვის დეპარტამენტისა და უშიშროებისგან. სხვადასხვა ოფიციალური უწყებები ლამის ყოველდღიურად აჯილდოებენ ჩვენს ბიჭებს. სიმართლე რომ გითხრათ, ასეთ ინფორმაციებს დიდად არ ვუკეთებთ აფიშირებას.
- დაბოლოს, უახლოეს ხანში პროცესების განვითარების როგორი მოლოდინი გაქვთ?
- იმედი მაქვს, რომ ამერიკა გააგრძელებს უკრაინის დახმარებას, უკრაინა კი ამ ომს აუცილებლად მოიგებს.
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
კადრები: რა ხდებოდა 2 ძლიერი მიწისძვრის დროს მიანმარში? - დაღუპულთა რაოდენობა 1 000-ს გასცდა
კვირის კითხვადი სტატიები
მნიშვნელოვანი ინფორმაცია
მკითხველის რჩევით
