"ვერ გეტყვით, რომ სიმღერით აღფრთოვანებული ვიყავი... მაგრამ, დიდწილად ვერ გაიმარჯვეს პოლიტიკური გაუგებრობის გამო" - როგორ აფასებენ პროფესიონალები "საბავშვო ევროვიზიაზე" საქართველოს შედეგს?

26 ნოემბერს 2023 წლის საბავშვო ევროვიზიაზე გამარჯვება მასპინძელმა ქვეყანამ, საფრანგეთმა მოიპოვა. მაყურებლისა და ჟიურის საერთო გადაწყვეტილებით, მომღერალმა ზოი კულაკმა 228 ქულით პირველი ადგილი დაიკავა.

წელს კონკურსზე საქართველო ანასტასია ვასაძემ, ნიკოლოზ ხარატმა და ოთო ბაზერაშვილმა წარადგინეს. კონკურსში, რომელშიც 16 ქვეყანა მონაწილეობდა, საქართველო მე-14 ადგილზე გავიდა. მსგავსი ცუდი შედეგი საქართველოს მხოლოდ ერთხელ, 2019 წელს ჰქონდა.

მონაწილე ქვეყნებიდან ჟიურიმ, ჯამში, 21 ქულა დაგვიწერა. ყველაზე მაღალი 5-5 ქულა - ესპანეთმა, პორტუგალიამ და სომხეთმა. გაერთიანებულმა სამეფომ და იტალიამ 3-3 ქულით შეაფასეს ქართული ტრიო, გერმანიამ კი 1 ქულა დაგვიწერა. დანარჩენი ქვეყნების ჟიურის ქართველი კონკურსანტებისთვის ხმა არ მიუცია.

რაც შეეხება ტელემაყურებლის შეფასებას, საქართველომ შემოსული ხმების ყველაზე დიდი წილი მიიღო - 5.72% , 12 ქულა მოგვცა ესპანეთმა, ყველაზე დაბალი 1 ქულა - ესტონეთმა.

უფროსების ევროვიზიისგან განსხვავებით, საქართველო საბავშვო ევროვიზიის შედეგებით ყოველთვის ამაყობდა. სხვადასხვა წლებში სამჯერ გვაქვს მოგებული საბავშვო ევროვიზია. წლების განმავლობაში კონკრსზე გასაგზავნ ბავშვებს გიგა კუხიანიძის სტუდია ამზადებდა. ამჯერად ბავშვები "ჰეიმა პროდაქშენმა“ მოამზადა, რომლის დირექტორებიც ირაკლი მანჩხაშვილი და მუსიკოსი მებო ნუცუბიძე არიან.

რატომ შეიცვალა პროდაქშენის გუნდი, როგორ შეაფასებდა მიღებულ შედეგს? - ამ კითხვებზე პროდიუსერმა გიგა კუხიანიძემ AMBEBI.GE-სთან კომენტარის გაკეთება არ ისურვა. მან გვითხრა, რომ არანაირად არ იყო წლევანდელ პროცესში ჩართული, მისგან რაიმე შეფასება კი გამართლებული არ იქნებოდა.

საქართველო საბავშვო ევროვიზიის გამარჯვებული ისტორიაში სამჯერ გახდა:

პირველად 2008 წელს ჯგუფმა "ბზიკებმა" გაიმარჯვა, ჯგუფის წევრები იყვნენ: გიორგი შიოლაშვილი, მარიამ თათულაშვილი და მარიამ კიკუაშვილი, ისინი კონკურსზე ყველაზე პატარები იყვნენ. "ბზიკების“ მუსიკალური ხელმძღვანელი იყო გიგა კუხიანიძე.

2011 წელს გამარჯვებული ჯგუფი Candy გახდა, სიმღერით Candy Music. ქართული მუსიკალური ჯგუფი შედგებოდა 5 მონაწილისგან: მარიამ ღვალაძე, ირა კოვალენკო, გვანცა სანებლიძე, ირინა ხეჩანოვი და ანა ხანჩალიანი. მისი მუსიკალური ხელმძღვანელი კვლავ გიგა კუხიანიძე გახლდათ.

2016 წელს საბავშვო ევროვიზიის სიმღერის რიგით მე-14 კონკურსის გამარჯვებული მარიამ მამადაშვილი გახდა, საკონკურსო სიმღერით "მზეო”. ის "ბზიკები სტუდიოს" წარმოადგენდა. სიმღერის ავტორი კომპოზიტორი გიგა კუხიანიძეა.

კონკურსამდე რამდენიმე დღით ადრე კი სოციალურ ქსელში მებო ნუცუბიძემ დაწერა, რომ წლევანდელი ევროვიზიის თემა იყო "გმირები", ქართველი კონკურსანტების მუსიკისა და ტექსტის ავტორი კი მებო ნუცუბიძე გახლდათ.

მებო ნუცუბიძე:

"ჩვენთვის, "ჰეიმა პროდაქშენში", მათთან ერთად სიმღერაზე მუშაობა იყო უდიდესი სიამოვნება და ამავდროულად - უდიდესი პასუხისმგებლობა.

საბავშვო ევროვიზიის წლევანდელი თემა არის "გმირები".

საქართველოს კი განსაკუთრებული სათქმელი აქვს: ბავშვები თვითონ არიან მთავარი გმირები, თვითონ წერენ საკუთარ, ყველასაგან გამორჩეულსა და განსაკუთრებულ ისტორიას. საკუთარი თავის რწმენით კი, ყოველთვის მიაღწევენ მიზნებს და აიხდენენ ოცნებებს".

წარუმატებელი შედეგის შემდეგ, სოციალურ ქსელში უამრავი კრიტიკული მოსაზრება დაიწერა. ხალხი უკმაყოფილო დარჩა სიმღერით და ბავშვების ჩაცმულობით, რაც შეეხება ვოკალს, ყველა ერთხმად აღნიშნავდა, რომ ბავშვები ნამდვილად უნიჭიერესები არიან.

Ambebi.ge შეფასებისთვის მომღერალ თამრიკო ჭოხონელიძესა და პროდიუსერ მარინა ბერიძეს დაუკავშირდა. პროფესიონალებს ვთხოვეთ კომენტარი გაეკეთებინათ, თუ როგორ მოეწონათ სიმღერა, რაც წელს საქართველომ ევროვიზიაზე წარადგინა და რატომ მივიღეთ ასეთი ცუდი შეფასებები?

თამრიკო ჭოხონელიძე:

- ძალიან გულდასაწყვეტია ეს შედეგი, ზენიჭიერი ბავშვები იდგნენ სცენაზე ჩვენი ბავშვების სახით. არ მინდა ავტორმა მიწყინოს, მაგრამ ვერ გეტყვით, რომ სიმღერით აღფრთოვანებული ვიყავი.

მაინც იმას ვიტყვი, რომ ეს პოლიტიკური კონკურსია და საქართველო ვერ არის ეტყობა ღირსეულად ამჯერად წარმოდგენილი ევროპაში, ისე, როგორც უნდა იყოს, ამიტომაც ნაწილობრივ დაჩაგრეს ჩვენი ბავშვები, რომლებიც ძალიან ნიჭიერები არიან.

- სოციალურ ქსელში ამ შედეგის შემდეგ აკრიტიკებენ როგორც სიმღერას, ისე "საზოგადოებრივ მაუწყებელს"...

- ვერ გავაკრიტიკებ, მაგრამ რომ გითხრათ, უმაღლესი რანგის სიმღერა იყო - მეთქი, მოგატყუებთ. ქართულ სიმღერებს უცხოელები თარგმნიან და მღერიან, ისეთი მელოდიური სიმღერებია. ქართული კაცის ბუნებასაც ასახავს. მესმის, რომ თანამედროვე მოთხოვნებიდან გამომდინარე ცოტა სხვა რამ იყო საჭირო, მაგრამ ვერ ვიტყვი, რომ ეს შედევრი იყო.

მაგრამ არც მიწასთან არის გასასწორებელი, ჩვენ ძალიან დაუნდობელი ხალხი ვართ. აუცილებლად დაწერეთ, რომ "საზოგადოებრივ მაუწყებელს“ იმდენი ღირსეული გადაცემა აქვს, ყველაფერს რომ თავი დავანებოთ, თუნდაც "რანინა“, მადლობის მეტი არაფერი გვეთქმის. ამიტომ ცოტა დანდობა უნდა ვიცოდეთ ერთმანეთის. მერე რა, რომ ამ ბავშვებმა ვერ გაიმარჯვეს. ჩემი აზრით, დიდწილად ვერ გაიმარჯვეს პოლიტიკური გაუგებრობის გამო.

მარინა ბერიძე:

- გუშინ ისეთი დღე მქონდა, რომ არ მინახავს კონკურსი, მაგრამ მე ჩემი პატარა პრინციპი მაქვს, ბავშვი სცენაზე უნდა იყოს ლაღი, მხიარული... ამ თვალსაზრისით შეცდომები მოგვდის და ვერ ვიგებთ...

მე ვიცი, რომ ბავშვმა უნდა მოიტანოს სილაღე, სიმარტივე. ეს არის ის, "ბზიკებმა" რატომ მოიგეს თავის დროზე, იყო რაღაც ძალიან ხალისიანი და ფეიერვერკული. არ ვიცი, ვერ ვიგებ მე სხვა კონცეფციას. ვიმეორებ, სცენაზე ბავშვი უნდა იყოს მხიარული და პრობლემები არ უნდა მოჰქონდეს.