9 წლის ემილი, რომელიც მამას გარდაცვლილი ეგონა, "ჰამასის" ტყვეობაში აღმოჩნდა და გათავისუფლებულია - მამა-შვილის შეხვედრის პირველი კადრები
9 წლის ემილი ჰენდი, რომელიც ისრაელზე "ჰამასის" 7 ოქტომბრის თავდასხმის შემდეგ შეცდომით გამოაცხადეს გარდაცვლილად, რეალურად დაჯგუფების ტყვეობაში იყო და ის ახლა თავისუფალია. გოგონა უკვე მამასთან ერთადაა.
ემილიმ თავისი მეცხრე დაბადების დღე ტერორისტების საიდუმლო ბუნკერში გაატარა, სადაც მასთან ერთად, სხვა ირაელელი მძევლებიც იმყოფებოდნენ.
25 ნოემბერს, გვიან ღამით, ემილი 13 სხვა გატაცებულთან ერთად, ისრაელში დაბრუნდა. თავისუფალია ასევე ემილის მეგობარი, ჰილა როტემიც, რომელიც ასევე "ჰამასისი" ტყვეობაში იყო.
"ჩვენ ძალიან დიდხანს ველოდით ამ მომენტს. ყოველი დღე იყო ძალიან გრძელი, მტკივნეული კოშმარი. ჩემი ემილი საბოლოოდ სახლშია, დაჭრილი, მაგრამ ცოცხალი", - თქვა თომას ჰენდმა ბრიტანულ გამოცემასთან ინტერვიუში. გოგონას გამოჩენამდე ცოტა ხნით ადრე მამა ამბობდა, რომ ემილის სახლში დახვდება თავისი საყვარელი ძაღლი, ჯონსი და სათამაშოები - "მას ექნება საუკეთესო დაბადების დღე, რაც კი ოდესმე ჰქონია".
”არ ვიცი, რა გაუკეთეს მათ ჩემს პატარა გოგონას. მე დაჟინებით მოვითხოვე, რომ ძაღლი ჩემს ქალიშვილთან შეხვედრაზე ყოფილიყო და ჩემდა გასაკვირად, IDF დათანხმდა", - თქვა კაცმა.
თითქმის ერთი თვის განმავლობაში ემილი გარდაცვლილად ითვლებოდა, მხოლოდ 5 ნოემბერს გახდა ცნობილი, რომ გოგონა ცოცხალი იყო.
- კიბუც ბეერის ხოცვა-ჟლეტის მსხვერპლთა იდენტიფიცირებისას, შეცდომის გამო, გოგონას მამას, თომასს უთხრეს, რომ ის მოკლეს. ამ ტრაგიკული ამბების შემდეგ კაცი ამბობდა: "კიდევ კარგი, რომ ჩემი ბავშვი ცოცხალი აღარ არის. რა ელოდა მას ტყვეობაში ამ არაადამიანებს შორის? მისი ცხოვრების ყოველი წუთი იქ იქნებოდა სავსე შიშითა და ტკივილით."
მას შემდეგ, რაც მიიღეს შეტყობინება, რომ ემილი ცოცხალი იყო, მისი ახლობლები აქტიურად შეუდგნენ ბავშვის გათავისუფლებისთვის ბრძოლას. კერძოდ, მათ დახმარებისთვის მიმართეს ირლანდიის მთავრობას, ვინაიდან ემილი ირლანდიის მოქალაქეა.
ემილის დედა, ლიატ კრონბერგი მკერდის კიბოთი გარდაიცვალა, როდესაც გოგონა ორწლინახევრის იყო. თომასის ყოფილი მეუღლე და მისი ორი უფროსი შვილის დედა ნარცისი ჰენდი, რომელმაც ემილი აღზარდა, ტერორისტებმა 7 ოქტომბერს მოკლეს.
26 ნოემბრის ღამეს, მეორე ეტაპის გაცვლის ოპერაციის, "სამოთხის კარის“ ფარგლებში, ისრაელში კიდევ 13 მძევალი დაბრუნდა. ამჟამად, კიდევ 195 ადამიანი რჩება ჰამასის ტყვეობაში.
წაიკითხეთ ასევე:
- "8 წლის ემილი, რომლის მამის კადრებმა მსოფლიო შეძრა, შესაძლოა, ცოცხალი იყოს..." - რა შეტყობინება მიიღო ოჯახმა?
- "8 წლის ემილის მამამ შვება იგრძნო, როცა მისი ქალიშვილის გარდაცვალება გაიგო, რადგან იცოდა, რომ პატარას აღარ აწამებდნენ" - უმძიმესი ამბავი "ჰამასის" პატარა მსხვერპლზე და კამერებთან ატირებული მამა