"შეშლილი", რომელიც რჩევებს ძაღლებისგან იღებს - ვინ არის არგენტინის ახალი პრეზიდენტი, ზღაპრული დაპირებებით: "ის არგენტინაში ყველაზე სასურველი მამაკაცია"

არგენტინის ახალ პრეზიდენტს მეგობრები და მტრები დონალდ ტრამპს, ჟაირ ბოლსონარუს, ელვის პრესლისა და მაქციასაც კი ადარებენ. ზოგიერთი ამბობს, რომ ხავიერ მილეი ბორის ჯონსონის და საშინელებათა ფილმის მკვლელი თოჯინას, ჩაკის ნაზავს წააგავს.

ულტრამემარჯვენე მილეის არაავტორიზებული ბიოგრაფიის ავტორი, ხუან ლუის გონსალესი პოლიტიკოსზე ყვება, რომ ის ბავშვობაში ბულინგის მსხვერპლი იყო და 1980-იან წლებში მას მეტსახელად "ელ ლოკო", ანუ შეშლილი შეარქვეს.

"მილეის იდეებზე მეტად მისი გონებრივი მდგომარეობა და ემოციური სტაბილურობა მადარდებს",- წერს ავტორი.

მილეიმ პოპულარობა არგენტინულ სატელევიზიო შოუებით მოიპოვა. გადაცემებში ის ეკონომიკაზე საუბართან ერთად ხშირად მიმართავდა ბილწსიტყვაობას და მაყურებელმა ის თავისი გადაჭარბებული ექსცენტრიულობით გაიცნო. ასეთმა იმიჯმა ხავიერ მილეის პოლიტიკური კარიერის დასაწყებად მისცა ბიძგი. ეკონომისტი მილეი კონგრესში 2021 წელს აირჩიეს, წელს კი პრეზიდენტიც გახდა.

• საპრეზიდენტო კამპანიისას, მილეიმ პირობა დადო, რომ არგენტინის ცენტრალურ ბანკს გააუქმებდა, ინფლაციას შეაჩერებდა და ქვეყნის მთავარ ვალუტად ამერიკულ დოლარს დააწესებდა.

მილეის ბიოგრაფიაში აღნიშნულია, რომ ექსცენტრიულ პოლიტიკოსს მასტიფის ჯიშის 5 უშველებელი ძაღლი ჰყავს და თითოეულ მათგანს ცნობილი ეკონომისტების სახელები ჰქვიათ: "ის მათ თავის ოთხფეხა შვილებს უწოდებს და პოლიტიკურ რჩევებსაც სწორედ მათგან იღებს".

ანალიტიკოსების აზრით, ეკონომიკურ კრიზისში ჩაძირული ქვეყნის მოსახლეობისთვის, სადაც წლიური ინფლაცია ახლა 140%-ზე მეტია და ყოველი მეხუთე არგენტინელი სიღარიბეში ცხოვრობს, მაილის რადიკალური განცხადებები ჭკვიანური ნაბიჯი იყო.

ექსპერტების თქმით, მილეის გამარჯვება მხოლოდ ეკონომიკასთან დაკავშირებული დაპირებების დამსახურება არ ყოფილა. ხავიერი ხალხს იარაღის კანონების შემსუბუქებასა და აბორტის აკრძალვასაც ჰპირდება. მილეი არგენტინის სავაჭრო პარტნიორ ქვეყნებს, ჩინეთსა და ბრაზილიასაც აკრიტიკებდა. ამის მიზეზად El loco იმას ასახელებს, რომ ის კომუნისტებთან საქმეს არ იჭერს.

კონგრესმენად არჩეულმა ლილია ლემოინმა კი ასე დაახასიათა მილეი: "ის ძალიან ლოიალური და მამაცია. შეუძლია გაბრაზდეს და აგრესიული გახდეს მტრების მიმართ, მაგრამ მხოლოდ მაშინ, თუ მას თავს დაესხმებიან. იგი უმიზეზოდ არც შეუტევს ვინმეს და არც არავის მოკლავს",- თქვა ლილიამ და დასძინა, რომ ახლადარჩეული პრეზიდენტი "ძალიან საყვარელია და რომ ის არგენტინაში ყველაზე სასურველი მამაკაცია".

წყარო: theguardian

მოამზადა: ანა სიბოშვილმა

არგენტინას ახალი პრეზიდენტი ჰყავს - ხავიერ მილეი გეგმავს რუსეთთან და ჩინეთთან კავშირის გაწყვეტას, ასევე მხარს უჭერს მთავრობის მინიმალურ ჩარევას მოქალაქეების ცხოვრებაში