"აკრძალული ხილი" ისრაელში - რატომ და როდის იქცა საზამთრო პალესტინის სიმბოლოდ: საიდუმლო ფერებშია
"ჰამასის" წინააღმდეგ ისრაელის ომის დაწყებიდან, საზამთროს გამოსახულება მთელ მსოფლიოში პალესტინელების მხარდამჭერი საპროტესტო აქციების სიმბოლოდ იქცა.
თუმცა საზამთრო, როგორც პალესტინის სიმბოლო არ არის ახალი ფენომენი. საზამთროს პროტესტი პირველად 1967 წლის ომის შემდეგ გაჩნდა, როდესაც ისრაელმა კონტროლი აიღო დასავლეთ სანაპიროსა და ღაზას სექტორზე და აკრძალა პალესტინის დროშა ამ ტერიტორიებზე. დროშის საჯარო ჩვენება სისხლის სამართლის დანაშაულად იქცა.
აკრძალვის თავიდან ასაცილებლად, პალესტინელებმა დაიწყეს საზამთროს გამოყენება, რადგან გაჭრილი საზამთრო მოიცავს პალესტინის დროშის ყველა ფერს - წითელს, შავს, თეთრსა და მწვანეს.
ისრაელმა პალესტინის დროშის გამოყენების აკრძალვა 1993 წელს გააუქმა, როგორც ოსლოს შეთანხმების ნაწილი და დროშა გახდა პალესტინის ხელისუფლების სიმბოლო, რომელსაც გადაეცა კონტროლი ღაზას სექტორსა და დასავლეთ სანაპიროზე.
"იმ პერიოდში ღაზას სექტორში, ახალგაზრდები დააკავეს დაჭრილი საზამთროს ტარებისთვის - რომლებიც სიმბოლურად პალესტინის დროშას გამოსახავდნენ“.
ამ მოვლენების შემდეგ, მხატვრები მთელ მსოფლიოს მასშტაბით საზამთროს ხატავდნენ, როგორც პალესტინელების მხარდაჭერის სიმბოლოს. ერთ-ერთი ყველაზე ცნობილი ნამუშევარი ეკუთვნის ხალედ ჰურანს: 2007 წელს მან საზამთროს ნაჭერი დახატა წიგნისთვის, სახელწოდებით "პალესტინის სუბიექტური ატლასი".
სურათი, რომელსაც "საზამთროს ამბავი" უწოდეს, მსოფლიოსთვის ცნობილი გახდა ისრაელსა და ჰამასს შორის 2021 წლის მაისში კონფლიქტის დროს.
მიმდინარე წლის იანვარში ისრაელის ეროვნული უსაფრთხოების მინისტრმა იტამარ ბენ გვირმა პოლიციას უბრძანა, მოეხსნათ პალესტინის დროშები საზოგადოებრივი ადგილებიდან და თქვა, რომ დროშების ფრიალი ტერორიზმის მხარდაჭერის აქტი იყო.
საპასუხოდ, ისრაელის ოპოზიციის მსვლელობებზე კვლავ გამოჩნდა საზამთროს გამოსახულებები.
პალესტინის დროშები ისრაელის კანონმდებლობით აღარ არის აკრძალული, მაგრამ პოლიციას და ჯარს უფლება აქვთ მოხსნან ისინი იმ შემთხვევებში, როდესაც საფრთხე ემუქრება საზოგადოებრივ წესრიგს.
ივლისში, იერუსალიმში გამართულ საპროტესტო აქციაზე, ისრაელელ დემონსტრანტებს ხელში ეჭირათ საზამთროს სურათები, რომელზეც ეწერა „თავისუფლება“.
აგვისტოში დემონსტრანტთა ჯგუფმა, რომლებიც შეიკრიბნენ თელ-ავივში პრემიერ-მინისტრ ბენიამინ ნეთანიაჰუს სასამართლო სისტემის რეფორმირების გეგმების გასაპროტესტებლად, ეცვათ მაისურები, რომელზეც საზამთრო იყო გამოსახული.
ისრაელელი ფოტოგრაფი ანჟელიკა შერი გააკრიტიკეს მისი 2017 წლის ნახატისთვის, The Watermelon Eaters. ფოტოზე ჩანს ქალები, რომლებიც ისრაელის სამხედრო ფორმაში გამოწყობილნი საზამთროს მიირთმევენ მაგიდასთან.
7 ოქტომბრის შემდეგ საზამთროს გამოსახულებები კვლავ გახდა მთელ მსოფლიოში პალესტინელების მხარდასაჭერი საპროტესტო აქციების განუყოფელი ნაწილი, ასევე ღაზას სექტორის მაცხოვრებლების უფლებებისთვის ბრძოლის სიმბოლო.
ბრიტანელმა მუსლიმმა კომიკოსმა შუმირუნ ნესამ შექმნა საზამთროს ფილტრები TikTok-ზე და მოუწოდა თავის მიმდევრებს დაემატებინათ ისინი მის ვიდეოებში და პირობა დადო, რომ მიიღებდა შემოწირულობებს საქველმოქმედო ორგანიზაციებისთვის, რომლებიც ეხმარებიან ღაზას.
სოციალური მედიის ზოგიერთი მომხმარებელი პალესტინის დროშების ნაცვლად საზამთროს აქვეყნებს, იმის შიშით, რომ მათი ანგარიშები შეიძლება დაიბლოკოს.