36 წლის ხალილის უდიდესი ტრაგედია: მან აფეთქებისას ოჯახის 11 წევრი დაკარგა, მათ შორის 4 შვილი - "მე მქონდა ჩემი ოცნება თითოეულ ჩემს შვილზე... ახლა ისინი წავიდნენ"
ღაზა აფეთქების შედეგად კაცმა ოჯახის 11 წევრი დაკარგა. მსოფლიო შეძრა ხალილ ხადერის კადრებმა, სადაც ჩანს, რომ ის ნანგრევებზე დგას და ხელში ბავშვის პიჟამა უჭირავს. როზა მისი 18 თვის ქალიშვილი იყო. ჟურნალისტს ხალილი ტელეფონით ვიდეოს აჩვენებს, სადაც როზას იგივე ლურჯი ფერის ღამის საცვალი აცვია და ორ უფროს ბიძაშვილთან ერთად წრეზე ცეკვავს.
ხალილი 36 წლის კაცია, ის კომპიუტერის ინჟინერია ალ-ნაჯარის საავადმყოფოში რაფაში და ოთხი მცირეწლოვანი შვილის მამაა: იბრაჰიმი, ცხრა წლის; ამალი, ხუთი წლის; კინანი, ორნახევარი წლის და როზა თვეების.
კაცი ნანგრევებზე ფრთხილად დააბიჯებს. მისი სახლი საავადმყოფოდან სულ რამდენიმე წუთის სავალზეა. ახლა იქ ქვისა და ლითონის გროვაა, რომელზეც საყოფაცხოვრებო ნივთები და რამდენიმე საბავშვო სათამაშო ჩანს, პატარა ბარაბანი და სათამაშო პიანინო.
დაბომბვის ღამეს, 20 ოქტომბერს, ხალილი საავადმყოფოში მუშაობდა.
"მასიური ბომბი აფეთქდა", - უთხრა მან BBC-ის ჟურნალისტს, რომელიც მასთან ერთად წავიდა თავდასხმის ადგილზე.
"ჩემი მეზობლები საავადმყოფოში მოდიოდნენ. ვკითხე: "სად მოხდა დაბომბვა?" და მათგან გავიგე, რომ ჩემი სახლის სიახლოვეს. მაშინვე წავედი სახლისკენ, გზიდან ვრეკავდი და არავინ მპასუხობდა, როგორც ხედავთ... მთელი სახლი დაიბომბა."
- იმ ღამეს მისი ოჯახის თერთმეტი წევრი დაიღუპა. მათ შორის იყვნენ მისი ოთხი შვილი, მისი ორი და, მისი 70 წლის მამა, ძმა, რძალი და მათი ორი ქალიშვილი. ისინი საავადმყოფოს ეზოში თეთრ სუდარაში გახვეულები დაასვენეს.
მისი მეუღლე მძიმედ დაიჭრა. ამჟამად ქალი მკურნალობას გადის, მას დამწვრობა და სახლის ჩამონგრევის შედეგად მიღებულ სხვა და სხვა დაზიანებები აღენიშნება.
ხალილის საცხოვრებელი ადრეც მოხვდა მსგავს დაბომბვაში. მის საკუთრებაში არსებული მიწის მცირე ზოლი ათწლეულების მანძილზე დაუნდობელი კონფლიქტის ზონაში ხვდებოდა. ასეთი იყო მემკვიდრეობა, რომელიც მას ძალიან აწუხებდა.
"მახსოვს, 2014 წლის ომში ჩემი ცოლი ორსულად იყო და ჩვენი მეზობლები დაბომბეს. მეშვიდე თვეში იყო და აფეთქების შედეგად ჩემი ცოლი კიბეებიდან კინაღამ ჩამოვარდა. მაშინ ვფიქრობდი, როგორ უნდა მყოლოდა ბავშვები ამ ცხოვრებაში?
მე მქონდა ჩემი ოცნება თითოეულ ჩემს შვილზე. იბრაჰიმზე ვოცნებობდი, რომ ერთ დღეს ექიმი გახდებოდა. ამალი ძალიან კრეატიული იყო, უყვარდა ხატვა. კინანი ძალიან მხიარული იყო - ყველას უყვარდა. ის თავის პატარა დაზე ძალიან ზრუნავდა. ყოველთვის გვერდით ედგა და როზას იზავდა ეუბნებოდა: "არ შეეხოთ, ის ჩემი ბავშვია!" ახლა კი ისინი ყველა წავიდნენ." - იხსენებს ის.
ხალილი ნანგრევებში დის ცხედარს ამ დრომდე ეძებს. თან უნდა მიხედოს ცოლს, რომელიც ახლა საავადმყოფოში წევს. ჟურნალისტს იბრაჰიმის, ამალის, კენინისა და როზას ფოტოებს ათვალიერებინებს, ამბობს, რომ ის ყოველთვის მათი მამა იქნება...წყარო
წაიკითხეთ ასევე: