"2 მილიონზე მეტი ადამიანი გარე სამყაროს მოწყდა" - როგორია ვითარება ღაზაში ისრაელის მასშტაბური შეტევის შემდეგ: ბოლო ცნობები ყველაზე ცხელი წერტილიდან

ღაზას სექტორში აფეთქებების ხმა ისმის. როგორ BBC-ი წერს, ახლახანს კიდევ რამდენიმე აფეთქება მოხდა. გარშემო ჩანს ბევრი კვამლი. მანამდე ისრაელმა განაცხადა, რომ ის წუხელ გააფართოებდა ოპერაციებს ღაზაში.

აფეთქებების შედეგად ღაზის სექტორის დიდ ნაწილს ინტერნეტი არ მიეწოდება, შეწყვეტილია მობილური კავშირიც. პალესტინური მობილური ოპერატორის მუშაობის შეფერხება დაემთხვა ისრაელის მხრიდან მასშტაბურ დაბომბვებს.

• პალესტინის "წითელი ნახევარმთვარის" ინფორმაციით, მათ “სრულიად დაკარგეს კონტაქტი” ღაზას სექტორში შტაბთან. ამის შესახებ ორგანიზაციის მიერ გავრცელებულ განცხადებაში არის ნათქვამი.

"ღრმად შეშფოთებულნი ვართ ჩვენი გუნდების შესაძლებლობაზე, გააგრძელონ სასწრაფო სამედიცინო სერვისების მიწოდება, განსაკუთრებით იმის გამო, რომ ეს შეფერხება გავლენას ახდენს სასწრაფო დახმარების ცენტრალურ ‘101’ ნომერზე და აფერხებს სასწრაფო დახმარების მანქანების მიმოსვლას დაჭრილებთან და დაშავებულებთან”, - წერია განცხადებაში.

ღაზაში მიმდინარე მოვლენებზე განცხადებას ავრცელებს საერთაშორისო ორგანიზაცია Human Rights Watch. როგორც ორგანიზაციაში მიიჩნევენ, ისინი ღელავენ ღაზას სექტორში მომუშავე მათი თანამშრომლების უსაფრთხოებაზე და მსოფლიოს მოუწოდებენ, "მოახდინონ ზეწოლა ისრაელის ხელისუფლებაზე, რათა დაუყოვნებლივ უზრუნველყოს უდანაშაულო მშვიდობიანი მოქალაქეების, სამედიცინო დაწესებულებებისა და ჩვენი გუნდების დაცვა”.

"2023 წლის 27 ოქტომბერს, ღაზას სექტორში ისრაელის მასიური დაბომბვის ფონზე, სატელეფონო და ინტერნეტის ფართო გათიშვა მოხდა, რის შედეგადაც თითქმის მთლიანად მოწყდა 2,2 მილიონი ადამიანი გარე სამყაროს. ასეთი გამორთვა საფრთხეს უქმნის მასობრივი სისასტიკისა და ადამიანის უფლებების დარღვევის დაუსჯელობას" - ნათქვამია ორგანიზაციის განცხადებაში.

ჯანდაცვის მსოფლიო ორგანიზაციამ განაცხადა, რომ ვერ დაუკავშირდა ღაზაში მყოფ პერსონალს, სამედიცინო დაწესებულებებს, სამედიცინო პერსონალს და ჰუმანიტარულ პარტნიორებს.

"ეს ბლოკადა მაწუხებს. ჩვენ მოვუწოდებთ ისრაელს, ყველა მშვიდობიანი მოქალაქის დაუყონებლივ დაცვას და სრულ ჰუმანიტარულ ხელმისაწვდომობას“, - განაცხადა ჯანმო-ს გენერალურმა დირექტორმა ტედროს ადჰანომ გებრეიესუსმა.

გაეროს ჰუმანიტარულ საქმეთა კოორდინაციის ოფისის (OCHA) სპიკერმა ლინ ჰასტინგსმა თქვა, რომ საავადმყოფოები და გაეროს ჰუმანიტარული ოპერაციები ვერ გააგრძელებენ ფუნქციონირებას კომუნიკაციების, ენერგიის, საკვების, წყლის და მედიკამენტების გარეშე.

ღაზაში შექმნილ ვითარებას ეხმაურებიან პენტაგონშიც - ისინი ხაზს უსვამენ მშვიდობიანი მოქალაქეების დაცვის აუცილებლობაზე.

აშშ-ის თავდაცვის მდივანმა ლოიდ ოსტინმა სატელეფონო საუბარი გამართა თავის ისრაელ კოლეგასთან იოავ გალანტთან და ისაუბრა ღაზას სექტორში მშვიდობიანი მოსახლეობის დაცვის აუცილებლობაზე.

"მდივანმა ხაზი გაუსვა ისრაელის თავდაცვის ძალების ოპერაციების დროს მშვიდობიანი მოსახლეობის დაცვის მნიშვნელობას და ხაზი გაუსვა ღაზას სექტორის მშვიდობიანი მოსახლეობისთვის ჰუმანიტარული დახმარების მიწოდების აუცილებლობას“, - ნათქვამია პენტაგონის განცხადებაში.

დეპარტამენტმა დასძინა, რომ ოსტინმა ასევე გაამახვილა ყურადღება "ჰამასის" ბოევიკების მიერ ყველა მძევლის გათავისუფლების აუცილებლობაზე.