"არ გამოვა გადაბრალება, რამდენსაც არ უნდა გეხმარებოდნენ უმწიფარი ოპოზიციონერები, "ოცნების" პროპაგანდაზე წყლის დამსხმელი განცხადებებით" - გვარამია ბრალდებას პასუხობს
"მთავარი არხის" დამფუძნებელი ნიკა გვარამია "ქართული ოცნების" ბრალდებებს ეხმაურება, სადაც ნათქვმია, რომ ის "ლელოსთან" და "ნაცმოძრაობის" წარმომადგენლებთან ერთად ქვეყნისთვის კანდიდატის სტატუსის მიღებას ხელს უშლიან.
"დაიწყო "ქართული ოცნების" პროპაგანდამ ჩვენი შემზადება ევროკავშირის სტატუსზე უარისთვის. სულ ტყუილად: არ გამოვა არავისზე გადაბრალება, რამდენსაც არ უნდა გეხმარებოდნენ გაუგებარი მავნებლური და "ოცნების" პროპაგანდაზე უცნაურად და ზოგჯერ საეჭვოდაც წყლის დამსხმელი განცხადებებით ზოგიერთი უმწიფარი ოპიზიციონერი და არასამთავრობო სექტორის ზოგიერთი უმწიფარი წარმომადგენელი.
- არ გამოვა გადაბრალება, იმიტომ რომ თუ ვერ მივიღებთ კანდიდატის სტატუსს, მხოლოდ იმიტომ, რომ ოცნება გამალებით საბოტირებს პროცესს და ზემოხსენებული ზოგიერთის "მაინც" და თვალის ჩაპაჭუნება ფეხებზე კიდია იქ ყველას და მხოლოდ აღიზიანებს.
საკუთარი გეოპოლიტიკური ინტერესი თუ უკარნახებთ, მოგვცემენ. ქვეყანაში, სადაც დემოკრატია დანგრეულია და ევრორეკომენდაციების 2/3 შეგნებულად არათუ არ სრულდება, არამედ მიზანმიმართულად უარესდება, ვერავითარი სხვა მოტივაცია ბუნებაში ვერ იარსებებს: ვერც სოციოლოგია, ვერც ქართული პოლიფონია, ვერც ვეფხისტყაოსანი და ვერც სალომე ზურაბიშვილის ტურნეები" - წერს გვარამია.
შეგახსენებთ, რომ როგორც „რესპუბლიკური პარტიის“ თავმჯდომარემ, ხათუნა სამნიძემ ტელეკომპანია „პალიტრანიუსის“ გადაცემა „პოლიტიკური სივრცეში“ განაცხადა, ოპოზიციის რიგებში არიან ადამიანები, რომლებიც ევროპელ პარტნიორებთან დახურულ კარს მიღმა საუბრობენ იმაზე, რომ საქართველოსთვის ევროკავშირის წევრობის კანდიდატის სტატუსის მიღება უნდა გადავადდეს და 2024 წლის არჩევნების შემდეგ მიენიჭოს საქართველოს სტატუსი. როგორც სამნიძემ აღნიშნა, ოპოზიციონერ კოლეგებს მოუწოდა, შეწყვიტონ საქართველოს კანდიდატის სტატუსის მიღების დამაზიანებელი გზავნილების გავრცელება.
დღეს "ქართული ოცნების" ლიდერებმა გააკეთეს განცხადებები და აღნიშნეს, რომ კანდიდატის სტატუსის მიღებას ხელს "ლელო", "ნაციონალური მოძრაობა" და ნიკა გვარამია უშლიან.
კახა კალაძე: პირდაპირ უნდა ვთქვათ, ვინ არიან ეს ადამიანები, ესენი არიან: „ნაციონალური მოძრაობა“ ვაშაძესთან ერთად, ეს არის „ლელო“ და გვარამია. ეს ადამიანები, კონკრეტული სახელი და გვარებით ვამბობ, ჩვენც გვაქვს ინფორმაცია, ჩვენი უცხოელი მეგობრები ამასთან დაკავშირებით პირდაპირ გვესაუბრებიან.
ირაკლი კობახიძე: გუშინ, ოპოზიციის წარმომადგენლებს ჰქონდათ აღიარების დღე. ესეც არის ერთ-ერთი აღიარება. ჩვენ თვეებია ვსაუბრობთ, რომ ოპოზიცია კანდიდატის სტატუსის წინააღმდეგ ლობირებს. რაც შეეხება სამნიძის განცხადებას, მაქვს ინფორმაცია, რომ ის კონკრეტულ სუბიექტებს გულისხმობდა, კერძოდ ეს არის პარტია „ნაციონალური მოძრაობა“, „ლელო“ და გვარამია. ამ სამ სუბიექტზე ჰქონდა მას ინფორმაცია, თუმცა დეტალებს ის არ აკონკრეტებს. ჩვენ ზუსტად ვიცით, რომ ეს სუბიექტები დადიოდნენ ევროპაში და არა მარტო ევროპაში, ლობირებდნენ კანდიდატის სტატუსის წინააღმდეგ.