დადასტურდა 16 წლის გოგონას გარდაცვალება, რომელიც "ჰამასის" თავდასხმის შემდეგ დაკარგულად ითვლებოდა - ნოია დედასთნ და დასთან ერთად მოკლეს
16 წლის ინგლისელი გოგონა, რომელიც "ჰამასის" ისრაელზე თავდასხმის შემდეგ დაიკარგა, გარდაცვლილად გამოაცხადეს. ოჯახის თანახმად, 16 წლის ნოია შარაბი დედასთნ და დასთან ერთად მოკლეს.
ნოია შარაბის ნათესავებს ამ დრომდე ეგონათ, რომ 7 ოქტომბერს, ბეერის კიბუცზე თავდასხმისას, გოგონა მძევლად აიყვანეს, მაგრამ როგორც გაირკვა, ტერორისტებმა ნოიასთან ერთად მისი 13 წლის და, იაჰელი და ბავშვების 48 წლის დედა, ლიანიც მოკლეს. გოგონების მამა ჯერ კიდევ დაკარგულად ითვლება.
"ნოიას ღიმილი მთელ ოთახს ანათებდა. ის ჭკვიანი, სენსიტიური, მხიარული და სიცოცხლით სავსე გოგონა იყო",- ჰყვებიან დამწუხრებული ოჯახის წევრები. მათ ისიც დასძინეს, რომ 16 წლის მოზარდი შანსს არ უშვებდა ხელიდან, რომ გაჭირვებულ ადამიანებს დახმარებოდა. "გული გვტკივა, რომ ის ჩვენს გვერდით აღარაა, მაგრამ მასთან ერთად გატარებული დროისთვის სამუდამოდ მადლიერები ვიქნებით",- საუბრობენ ნათესავები.
ნოიას დედა, ლიანი ბრისტოლში დაიბადა, თუმცა 19 წლის ასაკში ის ისრაელის ერთ-ერთ კიბუცში მოხალისედ წავიდა. იქ ლიანი თავის მომავალ მეუღლეს შეხვდა და მას შემდეგ ქვეყანა აღარ დაუტოვებია.
ტეორისტების ბეერის კიბუცში შესვლისთანავე, ლიანმა ნათესავებს შეშფოთებული შეტყობინებები გაუგზავნა. "ის გვწერდა, რომ სახლთან გასროლის ხმები ისმოდა, ხალხი არაბულად გაჰყვიროდა და ყველა გარბოდა. შეშინებული ლიანი ბავშვებთან ერთად ოთახში ჩაიკეტა, თუმცა მოგვიანებით მოესმათ, როგორ შეცვივდნენ ტერორისტები მათ სახლში და როგორ ცდილობდნენ მათ ოთახში კარის გაღებას"- უყვებიან გოგონების ბიძები MailOnline-ს.
მას შემდეგ ოჯახთან კომუნიკაცია გაწყდა. ისრაელის ჯარისკაცები მათ სახლში 10 ოქტომბერს შევვიდნენ და დაცხრილული კედლები ნახეს. როგორც ოჯახს შეატყობინეს, ტყვიები ბავშვების ოთახებშიც იყო ნასროლი.
ნოიას გარდაცვალების შემდეგ, ტერორისტული დაჯგუფების მიერ მოკლული ბრიტანელების რიცხვი, მინიმუმ 10-მდე გაიზარდა. მათ გარდა, კიდევ 6 ინგლისელი ითვლება დაკარგულად და არავინ იცის, ტყვედ აიყვანეს ისინი, თუ მოკლულებს შორის არიან.
ჯამში, ისრაელის ოფიციალური ინფორმაციით, 1400 ებრაელია მოკლული, მათ გარდა 212 კი "ჰამასს" მძევლად ჰყავს აყვანილი. რაც შეეხება პალესტინას, ქვეყნის ჯანდაცვს სამინისტრო იტყობინება, რომ 7 ოქტომბრის შემდეგ 4 741 პალესტინელი გარდაიცვალა, 15 898 კი დაშავდა.
წყარო: theguardian
მოამზადა: ანა სიბოშვილმა