რატომ "ეახლა" ხაბეიშვილის გუნდი კეზერაშვილს და იგეგმება თუ არა ცვლილებები ენმ-ს ლიდერშიფში - "საინტერესოა, ვინ წავა წინასწარ წაგებულ თამაშზე"
ორი დღის წინ, ენმ-ს მენეჯმენტი კვიპროსში დავით კეზერაშვილთან გაფრინდა. პარტიის ლიდერებს ჟურნალისტებისთვის ვიზიტის მოტივი არ აუხსნიათ. როგორც მმართველი პარტიის კულუარებში ამბობენ, ენმ-ში ცვლილებები იქნება და სავარაუდოდ, მსხვილი ოპოზიციური პარტიის თავმჯდომარის - ლევან ხაბეიშვილის ნიკა გვარამიათი ჩანაცვლება იგეგმება.
- ენმ-ს თბილისში დარჩენილმა წევრებმა ექსპრეზიდენტ მიხეილ სააკაშვილის ოფისის გახსნა აღნიშნეს, მას „ნაციონალური მოძრაობის“ წევრი სოფო ჯაფარიძე უხელმძღვანელებს. ნიშანდობლივია ის ფაქტი, რომ ოფისის გახსნას ნიკა მელია და ბაჩო დოლიძე ესწრებოდნენ.
მანამდე მიხეილ სააკაშვილმა სოციალურ ქსელში დაწერა, რომ სწორედ დღეს არის "ერთიანობისა და მობილიზების დრო", ხოლო ეს ოფისი ღია იქნება ყველასთვის, ვისთვისაც საქართველოს ევროპული მომავალი მნიშვნელოვანია.
"გამარჯვების ფორმულა ერთიანობაში და მუდმივ აქტიურობაშია, მხოლოდ ასე შევძლებთ პუტინის რეჟიმის გასტუმრებას. გპირდებით, საქართველოს საუკეთესო დღეები არის წინ", - დაწერა სააკაშვილმა, რომელიც მისი დაფუძნებული პარტიის გადარჩენას ცდილობს. შეძლებს თუ არა პატიმრობაში მყოფი ექსპრეზიდენტი დაქსაქსული პარტიის კონსოლიდაციას და დაბნეული ნაცელექტორატის შენაჩუნებას, ცოტა ძნელად წარმოსადგენია.
AMBEBI.GE-ს წყარო ენმ-დან ეუბნება, რომ წარმოუდგენლად ეჩვენება სააკაშვილის ოფისთან ხაბეიშვილის ფრთის თანამშრომლობა:
"მიშა ოფისს ხსნის, მაგრამ მათთან ხაბეიშვილის ჯგუფი როგორ იმუშავებს? "ოცნების“ ერთადერთი დამანგრეველი ძალა ენმ იყო და ვინ გახეთქა ეს მონოლითი? - ამომრჩევლისთვის ყველაზე მიუღებელმა პერსონებმა - მერაბიშვილმა და კეზერაშვილმა, რა თქმა უნდა, ბიძინა ივანიშვილის ხელდასმით, რად უნდა ამას მკითხაობა. ახლა ხაბეიშვილის ფრთა კვიპროსზე გაფრინდა და ძნელი მისახვედრი არაა, რომ ფულისთვის ეახლნენ ფულის ტომარას. "ნაცების" აქეთა მხარე, მელიას ჯგუფი ამტკიცებს, რომ კეზერაშვილმა ეს ფული, თავის დროზე, მიშასგან მოტეხა და ის ახლა ამ თანხებით აფინანსებს თავის ფრთას. კეზერაშვილს ადრე მელიასთან ჰქონდა შეხვედრა (თავმჯდომარეობის დროს), რა დროსაც მას ფული შესთავაზა, უთხრა, აგერ გვაქვს პარტიისთვის ფული და გამოიყენეთო. მელიას უთქვამს, მოვტყუვდი, მაშინვე უარი რომ ვუთხარი, ვიფიქრე, მიშას ოინები არ იყოს, მაგრამ ჯერ უნდა მესმინა, მეტი მელაპარაკა და მისგან ბევრ რამეს გავიგებდიო.
ხაბეიშვილის ამომრჩეველს კარგად ესმის, რომ როგორც 2012-ში "ოცნებამ" მოატყუა ხალხი უფასო ფულით და სხვა რაღაცეებით, ისიც მოტყუებულია - ის ხომ "ვივამედში“ უნდა შევარდნილიყო და მიშა გაეთავისუფლებინა? პოლიტსაბჭოს რომ დაითხოვ, მორჩა, ამომრჩეველი აღარ გეყოლება და მოდი და, ნუ იფიქრებ, ეს მიზანმიმართულად რომ არ ხდება.
- ხაბეიშვილს რომ გვარამიათი ანაცვლებენ, ეს ქოცების გადმოგდებული "ჩორტი" მგონია. გვარამიას ჭკუა თუ აქვს და ვიცით, ის ამას არ უჩივის, ეს არ უნდა ქნას. პარტია ელექტორალურადაა გახლეჩილი და ნიკას უნდა წინასწარ წაგებულ თამაშში შესვლა? გვარამია უნდა ცდილობდეს მაკონსოლიდირებელი იყოს და არა - მხარე.
გვარამია წავა თუ არა ამაზე, მაშინვე მხარე ხდება. ამას ვერაფრით ვუშვებთ, მაგრამ გვარამია ამ ადგილზე თუ დათანხმდა, ჩათვალეთ, რომ ისიც ჩაბმულია პოლიტიკურ თამაშში და მათ მხარეს იჭერს. ვინ წავა ამ წინასწარ წაგებულ თამაშზე? ხაბეიშვილი ჩაჭერილი ჰყავთ, მას კეზერაშვილი თვეში 15 ათას დოლარს უხდის. აქედან 10 ათასი თბილისის ორგანიზაციისთვის გამოუყო, 5 ათასი - საკუთრივ ხაბესია. კაცმა არ იცის, რას როგორ ანაწილებს, იქნებ, პირიქით ანაწილებს? ამის გარდა პარტიას ბიუჯეტიდანაც ხომ აქვს დაფინანსება, სადღაც 2 მილიონი... პარტიაში ელექტორალური დახლეჩა ვანოს დამსახურებით მოხდა. მგონია, ვანო ციხეში შეგნებულად ჩაჯდა, რათა პროცესებისგან გარიდებული და იზოლირებული ყოფილიყო, ან გამოსვლამდე სერიოზული ალტერნატივები წაუყენეს, ალბათ უთხრეს, რაც გიშოვია, დაგაყრევინებთო, მერე წავიდა ვანო და დაიწყო თამაში. ნუ დაგავიწყდებათ, ვისი სისტემიდან გასკდა ყველა ბომბი - ციხის კადრები იყო, კასრების საქმე თუ სხვა... სულ მაგის სისტემიდან გასული ინფორმაციები გასაჯაროვდა და გგონიათ, ეს ვანოს გარეშე ხდებოდა? ფაქტია, რაც მან გააკეთა, ამით პირდაპირ „ოცნების“ წისქვილზე დაასხა წყალი. მიშა ვანოს პირდაპირ დარტყმას ვერ უბედავს ერთი მიზეზის გამო - ვანომ ბევრი რამ იცის მის შესახებ. ეს რომ არა, მიშა სხვანაირად მოიქცეოდა, ვანოს გააპანღურებდა და მის მომხრეებს თავისკენ წაიყვანდა. მიშა უკრაინაში რომ დარჩენილიყო, იმ ფრონტზე პოლიტიკურადაც უფრო აქტიური იქნებოდა და აქეთაც ლავირებას და ბევრ რამეს მოახერხებდა. ახლა ზის და ვერაფერსაც ვერ ახერხებს.
ცუდი ისაა, რომ ოპოზიციამ ვერანაირი სიახლე ვერ შესთავაზა ხალხს, ამიტომაც აქვთ ასეთი რეიტინგები. გახარიას ის ამომრჩეველი ჰყავს, რომელმაც ბიძინაზე ჩაიქნია ხელი, ქოცობა „უტყდება“ და არ არის რუსეთუმე, არის „პრადვინუტი“ და ნაცებიც არ უნდა. ქოცებს აქვთ თავისი ადმინისტრაციული რესურსი - დასაქმებულები სიპებში და აიპებში, საჯარო სამსახურში, რაც 15-20%-ია, ამას პლუს სოციალურად დაუცველები. ბოლო კვლევაში „ოცნებას“ 37% ჰქონდა, ცოტას გააყალბებს, ცოტას კიდევ დაქსაქსავს, ან მოისყიდის ოპოზიციას, დანარჩენს აიღებს და უმრავლესობაში მოვა. ეს ყველაფერი გააკეთა ვანომ, მან შეუწყო ამ პროცესს ხელი. არმიისთვის ბიუჯეტში თურმე ფული ვერ მოინახა და, სამაგიეროდ, სოციალურად დაუცველებს მოუმატეს - 650 ათასი კაცი ჰყავთ სიაში, როცა გაწიე-გამოწიე, აქედან 150-200 ათასი იყოს მართლა სოციალურად დაუცველი, დანარჩენი ის ხალხია, რომელიც არჩევნებისთვის ყურებით ჰყავთ დაჭერილი და იმათ უხდიან. ბევრი ვიცი, ვისაც 2000-3000 ლარები აქვთ ხელფასი, ამავე დროს, სოციალურად დაუცველების სტატუსი აქვთ "დათრეული“.