"ჩვენ ვიწყებთ ხანგრძლივ და რთულ ომს" - ბენიამინ ნათანიაჰუს განცხადება და ყველა ახალი ამბავი კონფლიქტის ზონიდან
"ჩვენ ვიწყებთ ხანგრძლივ და რთულ ომს. ომი გვაიძულა "ჰამასის“ სასტიკმა თავდასხმამ , - ამის შესახებ ისრაელის პრემიერ-მინისტრმა ბენიამინ ნეთანიაჰუმ განაცხადა.
მისი თქმით, პირველი ეტაპი დამთავრდება ისრაელის ტერიტორიაზე შეჭრილი მტრის ძალების უმრავლესობის განადგურებით.
"ამავდროულად, ჩვენ დავიწყეთ შეტევითი ფორმირება და ის გაგრძელდება დათქმისა და შესვენების გარეშე, მიზნების მიღწევამდე", - განაცხადა ნეთანიაჰუმ.
ისრაელის პრემიერის თქმით, ისრაელი გაიმარჯვებს. "ჩვენ აღვადგენთ უსაფრთხოებას ისრაელის მოქალაქეებისთვის და გავიმარჯვებთ“, - დასძინა ნეთანიაჰუმ.
- როგორც მედია წერს, ისრაელის პოლიტიკურ-უსაფრთხოების კაბინეტი შაბათს გვიან შეიკრიბა, რათა "ჰამასის“ მოულოდნელ თავდასხმაზე ქვეყნის პასუხი განესაზღვრა.
ისრაელის პრემიერ-მინისტრის ოფისის განცხადებაში ნათქვამია, რომ მინისტრთა კაბინეტმა მიიღო "ოპერაციული გადაწყვეტილებების სერია, რაც მიზნად ისახავს "ჰამასის“ და პალესტინის ხელისუფლების სამხედრო და პოლიტიკური შესაძლებლობების განადგურებას“.
- ისრაელის თავდაცვის ძალები აცხადებენ, რომ ლიბანის ტერიტორიას არტილერიით დაარტყეს, - ინფორმაციას BBC-ი ავრცელებს.
ისრაელის თავდაცვის ძალებში განმარტავენ, რომ საარტილერიო დარტყმები მას შემდეგ დაიწყეს, რაც ლიბანის ტერიტორიიდან ისრაელი დაიბომბა.
ამასთან, ისრაელის საჰაერო ძალების ინფორმაციით, ღაზას სექტორში "ჰამასის“ სამხედრო ობიექტებს დაარტყეს. მათი მტკიცებით, გამანადგურებელი თვითმფრინავები თავს ესხმიან "ჰამასის" ოპერატიულ ინფრასტრუქტურას.
- ინფორმაცია დაღუპულების და დაშავებულების შესახებ:
ისრაელში "ჰამასის“ თავდასხმის შედეგად დაღუპულთა რიცხვმა, დილის მდგომარეობით, 300-ს მიაღწია, - ინფორმაციას ადგილობრივი მედია ავრცელებს.
მათივე ინფორმაციით, საავადმყოფოები გადავსებულია. დაშავებულია 1 590 ადამიანი, მათ შორის 300 მძიმე მდგომარეობაშია, 19 კი - კრიტიკულ მდგომარეობაში.
ამასთან, გავრცელებული ინფორმაციით, “ჰამასის“ მებრძოლებმა ათობით მშვიდობიანი მოქალაქე და ისრაელის თავდაცვის ძალების ჯარისკაცი დაატყვევეს და ღაზას სექტორში გადაიყვანეს.
- ღაზას სექტორში დახურული სამხედრო სექტორი შეიქმნა
ღაზას სექტორში დახურული სამხედრო სექტორია შექმნილი. ამის შესახებ განცხადებას ისრაელის თავდაცვის არმია (ცახალი) "ტელეგრამის" პირად არხზე ავრცელებს.
"ვითარების შეფასების თანახმად, ღაზას სექტორის პასუხისმგებლობის მთლიან ზონაში დახურული სამხედრო ზონაა გამოცხადებული", - ნათქვამია განცხადებაში.
ისრაელის სამხედროები აღნიშნავენ, რომ "დახურულ სამხედრო ზონაში შესვლა აკრძალულია."
ისინი საზოგადოებას მოუწოდებენ, "ყურადღებით იყონ" და აღნიშნულ ზონას გვერდი აუარონ.
ცნობისთვის, მანამდე ისრაელის პრემიერ-მინისტრმა ბენიამინ ნეთანიაჰუმ განაცხადა, რომ ქვეყანა "გრძელვადიან და რთულ ომში" შედის, რომელიც "ჰამასის" თავდასხმით არის გამოწვეული.
7 ოქტომბერს, პალესტინის მოძრაობა "ჰამასმა“ ისრაელზე ყველაზე მასშტაბური თავდასხმა განახორციელა. თავის მხრივ, ისრაელმა ღაზაზე საჰაერო დარტყმების საპასუხო ტალღა დაიწყო. ორივე მხარე ასობით დაშავებულისა და დაღუპულის შესახებ იუწყება. არსებული ცნობებით, "ჰამასმა" აიყვანა მძევლები და ომის ტყეები. ისრაელის პრემიერ-მინისტრმა ბენიამინ ნეთანიაჰუმ განაცხადა, რომ ისრაელი "ომშია" და "ჰამასი", რომელიც მართავს ღაზას, "უპრეცედენტო ფასს გადაიხდის".
თვალი ადევნეთ Ambebi.ge-ს, ინფორმაცია განახლდება