"ყოველ ახალ ქვეყანაში ცხოვრებას ნულიდან ვიწყებ" - "მსოფლიო მოქალაქე" საქართველოდან, რომელმაც 182 ქვეყანა მოიარა: რას ჰყვება ნიკოლოზ ბარტყულაშვილი თავბრუდამხვევ მოგზაურობებზე

სულ182 ქვეყანაშია ნამყოფი. მსოფლიო მოქალაქეა და როგორც ჯერ კიდევ წლების წინ გვითხრა, ფლობს მსოფლიო მოქალაქის პასპორტს. გვეუბნება, რომ დედამიწის დროით 37 წლისაა... უარყოფით ინფორმაციას ახლოს არ იკარებს, უნდა, მხოლოდ დადებით და სასარგებლო ამბებზე იფიქროს, ილაპარაკოს.

ამერიკიდან ახლახან დაბრუნდა, სადაც 4 წლის განმავლობაში მოგზაურობდა. მოვლილი აქვს ამერიკის ყველა შტატი. 2 კვირით საქართველოში ჩამოსული სულ მალე სამოგზაუროდ ისევ ერთ-ერთ დიდ ქვეყანას უმიზნებს.

"როგორ ვარ და შესანიშნავად, იდეალურად. ხალხს ვასწავლი და ვეუბნები, საუკეთესოს საპირისპირო არაფერი მითხრათ, მხოლოდ კარგ ინფორმაციას ველი-მეთქი. ვავრცელებ ოპტიმიზმს და ბედნიერებას - სხვა მისია არ გამაჩნია. ჩემი მოწოდებაა, ხალხში მხოლოდ სიყვარული და ოპტიმიზმი დავთესო,“ - გვეუბნება მსოფლიო მოქალაქე, ნიკოლოზ ბარტყულაშვილი, იგივე „ნიქს ენერჯი“.

- ამბობენ, ადამიანი თუ პოზიტივს გასცემს, ცდილობს, ნეგატივისგან გათავისუფლდეს, შესაბამისად მის გარშემო დადებითი ატმოსფერო იქმნაო... რას იტყვი?

- აუცილებლად - ადამიანი არის ის, რაზეც ფიქრობს, მე რაზეც ბევრს ვფიქრობ, ის ვარ. ფიქრი, თუ ის მხოლოდ გაელვება არ არის, მერე მოქმედებაში გადადის. ჩემთვის ის მხოლოდ ცხოვრებაა. რა ცხოვრებითაც ვცხოვრობ, ეს ჩემი ნაფიქრის შედეგია. ამას ყველას ვურჩევ...

- ცოტა ხნის წინ საქართველოში ჩამოხვედი, თუმცა ამერიკაში ხანგრძლივად მოგზაურობდი...

- კი, ამერიკაში დიდხანს გავჩერდი, რადგან მინდოდა, ეს ქვეყანა ღრმად გამეცნო, შემესწავლა, რისთვისაც 4 წელი დამჭირდა. უკვე ყველა შტატი მაქვს შესწავლილი. 2019 წელს ჯერ მანქანით, მერე 2020 წელს პატარა თვითმფრინავით მოვიარე. სხვათა შორის, მისი მართვის მოწმობაც ავიღე და ყველა ჩანჩქერი, ტბა, მწვერვალი, თუ ხეობა ხელახლა მოვინახულე. მაიამი, ლოს-ანჯელესი, ნიუ-იორკი, ჰავაის კუნძულები, ამ შტატებში ვერტმფრენიდან გადაღებული კადრები მაქვს.

- შტურვალთან სულ მარტო იყავი?

- ზოგიერთ შტატში, მათი რეგულაციებიდან გამომდინარე, გამქირავებელი მომყვებოდა. ხან მარტო ვიყავი.

- 182 ქვეყანაში უკვე ნამყოფი ხარ, სრულად გინდა 200-ვე ქვეყანა მოიარო?

- მსოფლიო მოგზაურობა ფაქტობრივად ამოვწურე. ამერიკაც მოვლილი მქონდა, მაგრამ 4 წელი იქ მხოლოდ იმიტომ დავრჩი, როგორც გითხარით, ღრმად რომ გამეცნო. დარჩენილი ქვეყნები კი ისეთია, იქ მოვხდები, თუ არა, ამას ჩემთვის მნიშვნელობა არ აქვს. თან მსოფლიო პასპორტი მაქვს, სადაც არაფერი ფიქსირდება - უბრალოდ შევდივარ და გამოვდივარ. მე ღრმა და საინტერესო ქვეყნები მაინტერესებს, სადაც შეიძლება ბევრი რამ აღმოვაჩინო. ამის შემდეგ სადაც წავალ, მიზანი იგივე იქნება, რაც ამერიკაში მქონდა.

ამერიკა ფაქტობრივად ქვეყნების ნაზავია და ყოველმხრივ ვეებერთელა ძალაა. ფინანსური, სამხედრო, კომუნიკაციის ცენტრია. ჩემი სურვილი, იქ თითქმის ყველა სფერო შემესწავლა, რაზეც დგას და რითაც სუნთქავს ქვეყანა - ნასა, ამერიკის სამხედრო სისტემა, მშენებლობა - უძრავი ქონება, ტრანსპორტი, საწვავი, საინფორმაციო სამყარო, ჰოლივუდი - ყველაფერი შევისწავლე. ნასაში 6 თვე ვიყავი... ყველაფერს ახლოს გავეცანი. ქვეყანა მანქანით, ვერტმფრენით, იახტით მოვიარე. ბოლოს მოტოციკლი ვიყიდე და ლოს-ანჯელესიდან ნიუ-იორკამდე მთელი კონტინენტი გადავკვეთე - წყნარი ოკეანიდან ატლანტიკის ოკეანემდე. როცა სანახავი ამოვწურე, ყველა შტატში ქართველებს, ჩემს მეგობრებს გამოვუარე, დავემშვიდობე და წამოვედი.

- ამ შეკრებილი ინფორმაციების მიხედვით წიგნის დაწერა ხომ არ გინდა...

- წიგნები უკვე დავწერე და გამოვეცი კიდეც... მე მსოფლიოს შეცვლა უკეთესობისკენ მინდა. მსოფლიოს იმიტომ ვსწავლობ, რომ ის ვიცოდე, თუ არ ვიცი, რას ვცვლი, ან როგორ?! ჩემი მამოძრავებელი ძალა ეს არის. ამ საქმეში 2 მთავარი რამ არის - ჯანმრთელი ცხოვრების და ზრდილობიანი ცხოვრების წესი. ამიტომაც ვსწავლობ მსოფლიოს ხალხებს, რელიგიებს, კულტურას, ეზოთერიკულ საკითხებს. წიგნები კი, როგორც ვთქვი, ადრეულ წლებში დავწერე და რამდენიმე ქვეყანაში კარგადაც გაიყიდა. ამ ეტაპზე ჩემთვის ეს უკვე აღარ არის საინტერესო. იმ ხალხს მინდა, ჩემი ხმა მივაწვდინო, ვისაც კითხვა არ უყვარს.

- მინდა, სამყარო შევცვალოო, ამბობ - სამყარო ისეთი დიდი, თვითმყოფადი და უცნაურია, რანაირად შეძლებ მის ფორმირებას?

- ყველა ადამიანს ჩვენ ჩვენი წვლილი შეგვაქვს ზოგადად ადამიანების ფსიქოლოგიაში. ვიღაც თქვენს დაწერილს წაიკითხავს და რაღაც აზრი დაებადება, ვიღაც ვიღაცის სიკეთეს ნახავს, ან სიტყვას მოისმენს. მინდა, ადამიანების ცხოვრებაში ასეთი წვლილი დიდი დოზით შევიტანო.

ბავშვობიდან რაღაც ორგანიზაციები მქონდა - ხან ცეკვას ვასწავლიდი, მერე სიგარეტის მოწვევაზე უამრავ ადამიანს ვათქმევინე უარი, იყო კიდევ რაღაცები - ესეც ხომ ცვლილებებია, ახლა უბრალოდ დიდი მასშტაბები მწყურია, რომ მეტ ხალხს მივწვდე და არეალი გავაფართოო - მეტი ადამიანის დახმარება შევძლო.

- ვინც აქამდე არ გიცნობდა და ამ ინტერვიუთი აღმოგაჩენს, როგორ აუხსნი, როგორ გახდი მსოფლიო მოქალაქე და როგორ მოიპოვე მსოფლიო მოქალაქის პასპორტი. საერთოდ თუ იცი, სტატისტიკურად რამდენი ადამიანი ფლობს მას მსოფლიოში?

- სულ 100-მდე არც არის, ოღონდ, ეს უფრო ადრინდელი მონაცემია, ბოლოს ამ საკითხს აღარ ჩავძიებივარ. რეალურად ეს არის ჩემი ფიქრის ძალის შედეგი. სულ ვფიქრობდი იმაზე და მჯეროდა, ადამიანი როგორც შემოისაზღვრავს თავის სურვილს, ცხოვრებაში ყველაფერი იქამდე მიდის.

ყოველთვის იმას ვფიქრობდი, რომ დედამიწელი ვარ, ისედაც ერთი ბეწო პლანეტა გვაქვს და აქ რაიმეს გაყოფა ჩემთვის მიუღებელია. თავიდანვე მიმაჩნდა, რომ მსოფლიო საზღვრების გარეშე იყო და არის. მერე კი ისე მოხდა, რომ მსოფლიო მოქალაქეობით დამაჯილდოვეს. მართლაც გავხდი მსოფლიო მოქალაქე.

- ვიღაც იკითხავს, ნიკოლოზი ასე რომ მოგზაურობს, ამას ხომ ფინანსები სჭირდება, საიდან მოიპოვებ ამისთვის საჭირო თანხებს?

- სხვის მიერ შექმნილ დაწესებულებაში არასოდეს მიმუშავია, თავად ვქმნი ხოლმე ერთჯერად პროექტებს. ეს ხან კონცერტია, ან რაიმე სხვა ღონისძიება. დიდხანს რაც გრძელდება, იმ სიტუაციას ვერიდები და გრძელვადიან პროექტებზე უარს ვამბობ.

- რამდენი ენა იცი?

- ადრე 12-მდე ენა ვიცოდი, მაგრამ ამა თუ იმ ენაზე დიდხანს რომ არ გიწევს ადამიანს ხშირად ლაპარაკი, ცოტა პასივში გადადის. იმ ენებზე მოლაპარაკეებთან აქტიური ურთიერთობა რომ მიწევდეს, სწრაფად აღვიდგენდი.

- 4-წლიანი ამერიკული მოგზაურობა რომ შეაფასო - რა მოგცა?

- ყველაფერი, როგორც შორიდან ჩანს, ისე არ არის. ამერიკა ყველანაირია, იქ ყველანაირ ცხოვრებას აღმოაჩენ და შეხვდები. იქაც არის დაბალი ფენა, იქაც წვალობენ და უზომოდ ბევრს შრომობენ. 350 მილიონი ადამიანი ცხოვრობს და ყველანაირი შტატი არსებობს. არის უღარიბესი და მდიდარი შტატებიც. შორიდან ადამიანებს კი სხვა წარმოდგენა აქვს. კანზასში, ოკლაჰომასა და აიოვაში რომ ჩახვალ, ოღონდაც, იქ იცხოვრე და მიწის 10.000 კვადრატს გაჩუქებენ, ან 100.000 დოლარს. ქარხნებიდან მუშები რომ გამოდიან, მაღაზიაში ადამიანი (გამყიდველი) არ არის, რომ რამე შეიძინონ...

ასე რომ, იქ ყველანაირი ცხოვრება არსებობს - ვეებერთელა კონტინენტია. 50 შტატი კი არის, მაგრამ პუერტო-რიკო ქვეყანა ამერიკამ მიითვისა, - მას 51-ე არაოფიციალურ შტატს ეძახიან, იქ დაბადებულს აქვს ზუსტად იგივე უფლებები, რაც ამერიკის მოქალაქეს. რეალურად კი ამერიკა არის ქვეყანა, საიდანაც ფაქტობრივად მსოფლიო ძირითადი ბაზარი იმართება.

- ახლა რა გეგმები გაქვს - სად აპირებ გამგზავრებას?

- დიდი ქვეყნებს ვუმიზნებ - ეს შეიძლება იყოს ჩინეთი, მიუხედავად იმისა, რომ არაერთხელ ვარ ნამყოფი. მინდა, ისიც ღრმად შევისწავლო, ასევე ავსტრალიაზეც ვფიქრობ, რომელზე გავაკეთებ არჩევანს, ამას დღე- დღეზე გადავწყვეტ. როგორც კი ამოვწურავ იქაურობას, მოვიწყენ და დავბრუნდები. ყოველ ახალ ქვეყანაში ჩასვლისთანავე ცხოვრებას ნულიდან ვიწყებ.

საუბრის ბოლოს მინდა, ვთქვა, რომ ქართველები გენეტიკურად გასაოცარი ხალხი ვართ და ვფიქრობ, რომ გვაქვს ძალა, მსოფლიო შევძლოთ. ქართველს მმართველობა ყველა ქვეყანაში შეუძლია.