8
მაისიდღის ზოგადი ასტროლოგიური პროგნოზი
7 ოქტომბერს ღვინის მოყვარულებს თბილისში, სიონის ქუჩაზე ნამდვილი დღესასწაული ელოდებათ: "ქართული ღვინის ფესტივალი" მათ უკვე მეხუთედ უმასპინძლებს და ქართული ღვინისა და კულტურის საგანძურს გააცნობს.
აღნიშნული ღონისძიება ეროვნული კულტურის ნამდვილი დღესასწაულია, რომელიც როგორც ადგილობრივებს, ისე ჩვენი ქვეყნის გასაცნობად ჩამოსულ ტურისტებს აერთიანებს. ღვინის ფესტივალზე სტუმრებს საშუალება ექნებათ, დააგემოვნონ და შეიძინონ ქართული ღვინო, ყველი, პური, ჩირი, ჩურჩხელა, თაფლი, ხილი და სხვა პროდუქტები. ასევე, მოისმინონ როგორც ფოლკლორული, ასევე თანამედროვე მუსიკა და ჩაერთონ სხვადასხვა საინტერესო აქტივობაში. მათ შორის არის შეხვედრა სომელიესთან, რომლის ფარგლებშიც მსურველებს სომელიე, WSET 3-ის კურსდამთავრებული, (წამყვანი გლობალური ორგანიზაცია, რომელიც ღვინის მოყვარულებს და პროფესიონალებს ამზადებს), ღვინის ბლოგერი თეონა თოხაძე უმასპინძლებს და ჩაუტარებს მასტერკლასს სახელწოდებით: "დეგუსტაციის ხელოვნება და ყნოსვის ტრენინგი“.
თეონა თოხაძე პროფესიონალი სომელიეა, რომელიც აქტიურად არის ჩართული როგორც სასწავლო საქმიანობაში, ისე ქართული ღვინის პოპულარიზაციაში. ამჟამად მას "კეტტარი აკადემიაში“ ქართველი მსმენელისთვის მიჰყავს ღვინის კურსი, რომელშიც აქცენტი კეთდება მსოფლიოს ძირითადი მეღვინეობის ქვეყნებზე. გარდა ამისა, თეონა უცხოელი სტუმრებისთვისაც ხშირად ატარებს დეგუსტაციებს და ამ შემთხვევაში პირიქით - უკვე უცხოელებს აცნობს ქართულ ღვინოს. ასევე, ის "ინსტაგრამ“ პლატფორმაზე ფართო საზოგადოებისთვის სხვადასხვა ქვეყნის ღვინოს აფასებს და დიდი პოპულარობითაც სარგებლობს.
დაინტერესებულ პირებს ფესტივალი შესაძლებლობას აძლევს, შეხვდნენ პროფესიონალს და მეტი შეიტყონ ღვინის შესახებ.
რა ახალ უნარებს შეგვძენს მასტერკლასი სომელიესგან და რა უნდა ვიცოდეთ, სანამ ფესტივალზე ღვინის ახალი სახეობების აღმოჩენას დავიწყებთ? ამის შესახებ AMBEBI.GE-ს თეონა თოხაძემ უამბო.
- 7 ოქტომბერს, ღვინის ფესტივალზე მოსულ სტუმრებს თქვენს მასტერკლასში მონაწილეობის მიღების საშუალება ექნებათ. საინტერესოა, რა ახალ უნარებს შეიძენენ ისინი?
"დეგუსტაციის ხელოვნება და ყნოსვის ტრენინგი“ - ასე ეწოდება ჩვენს მასტერკლასს, რომელიც დაახლოებით 40 წუთი გაგრძელდება და ვისაუბრებ იმ სტანდარტებსა და კრიტერიუმებზე, რომლის მეშვეობითაც მაქსიმალურად ობიექტურად ვაფასებთ ღვინოს. დასასრულს გვექნება დრო, ჩვენი ყნოსვა გავავარჯიშოთ. მასტერკლასზე წარმოდგენილი იქნება სხვადასხვა არომატი, რომელიც დაყნოსვისას სწორად უნდა გამოიცნონ მსმენელებმა, რაც სასარგებლოსთან ერთად, ძალიან სახალისო პროცესია.
ისინი, ვინც ღვინის სფეროს წარმოვადგენთ, მოყვარულებს ხშირად ვეუბნებით, რომ ის ღვინოა კარგი, რომელიც მათ მოსწონთ. მიუხედავად იმისა, რომ საბოლოოდ ასეცაა - ადამიანს რაც სიამოვნებს ის უნდა მიირთვას, მაინც მგონია რომ ცოტას ვკეკლუცობთ. ასე რომ არ იყოს, ამდენი ღვინის სამოყვარულო და სადიპლომო კურსი არ იარსებებდა და არც ღვინის კრიტიკოსებსა თუ ექსპერტების შეფასებებს მოუსმენდა ვინმე.
ამიტომაც მგონია, რომ როგორც ყველა ახალ სფეროსთან შეხებისას, აქაც სჯობს თავიდან ამ საქმის პროფესიონალს მოვუსმინოთ და საბაზისო ცოდნის მიღების შემდეგ, უკვე ჩვენს ყნოსვას გავყვეთ. ეს იმდენად საინტერესო და ამოუწურავი პროცესია, რომ სწავლის და ძიების სურვილი მუდმივად გრძელდება.
- რა რჩევებს მისცემთ სტუმრებს ფესტივალზე ღვინის შერჩევის, შეძენისა და მოხმარების კუთხით?
რადგანაც ფესტივალზე ღვინის ძალიან დიდი არჩევანი იქნება, თავიდანვე ასეთი სტრატეგიით მოქმედება სჯობს: ვსინჯავთ ჯერ მსუბუქ სხეულიან თეთრებს და ნელ-ნელა გადავდივართ "მძიმეწონიან“ თეთრებზე. იმავე პრინციპით უნდა ვიხელმძღვანელოთ წითელი ღვინის შემთხვევაშიც. ნახევრად მშრალი, ტკბილი ან სადესერტო და შემაგრებული ღვინის დაგემოვნება კი სულ ბოლოს სჯობს.
- გაითვალისწინეთ, რა შემთხვევისთვის არჩევთ ღვინოს:
- თქვენი სიამოვნებისთვის - ის რაც თქვენ მოგწონთ;
- სტუმრებთან სადილისთვის - სადილის ძირითადი კერძის გათვალისწინებით;
- პიკნიკისთვის - ჯერ კიდევ როზეს დროა, რატომაც არა?
- ეზოში ან აივანზე, როცა პლედში გახვეულს სასიამოვნო საღამოს გატარება გსურს - ამ შემთხვევისთვის სავსე სხეულიანი, ინტენსიური, კომპლექსური, განსაკუთრებით წითელი ღვინო გამოგადგება.
მოხმარებას რაც შეეხება, ზომიერება არ დაგვავიწყდეს, თუმცა აქვე სინატრასაც მოვიშველიებ: "მეცოდებიან ის ადამიანები, რომლებიც არ სვამენ, რადგან ეს იმ საუკეთესოს მაქსიმუმია, რასაც მთელი დღე იგრძნობენ“.
- საინტერესოა, რა როლს თამაშობს ღვინის ფესტივალები როგორც ქართული ღვინის პოპულარიზაციის, ისე სომელიეს პროფესიის განვითარების კუთხით?
- დღევანდელ საქართველოში, სადაც ამხელა გამოცოცხლება და პროგრესი გვაქვს ამ მიმართულებით, სომელიეს პროფესია უფრო და უფრო მეტ მნიშვნელობას იძენს. სომელიე არის შუამავალი, მეღვინის და მომხმარებლის დამაკავშირებელი რგოლი, რომელიც კარგად წარადგენს, აცნობს, ურჩევს და სთავაზობს მომხმარებელს, მის გემოვნებაზე მორგებულ ღვინოს. მსოფლიოს წამყვანი ღვინის კრიტიკოსები და მწერლებიც კი, მათივე თქმით, რესტორანში სადილობისას, ხშირად სარგებლობენ სომელიეს რჩევებით. რადგან რესტორნის ღვინის ბარათს ადგენს სომელიე და ის ასევე კარგად იცნობს კერძებს, მას შეუძლია საუკეთესო შეხამება შესთავაზოს სტუმარს.
2016 წელს, როცა სომელიეს დიპლომები ავიღეთ, სულ თითზე ჩამოსათვლელ რესტორანს ჰყავდა ან სურდა სომელიესთან თანამშრომლობა. საბედნიეროდ, ახლა სხვა სურათია, ვერ ნახავთ თბილისში "თავმოყვარე“ რესტორანს თუ ღვინის მაღაზიას, თავისი სომელიე ან კავისტი არ ჰყავდეს.
რაც შეეხება ცოდნის მიღებას, მე პირადად "ხეცურიანის სომელიეს და ღვინის სკოლა“ მაქვს დამთავრებული. იშვიათად შეხვდებით საქართველოში წარმატებულ სომელიესა და ამ სფეროში დასაქმებულს, ვისაც გავლილი არ აქვს ამ სკოლის კურსები ან WSET (Wine and Spirit Education trust). რამდენადაც ვიცი, მათ საგრანტო და საშეღავათო შეთავაზებებიც აქვთ.
ფესტივალი იდეალური შეხვედრის ადგილია ყველასთვის. ასეთ ღონისძიებებს მეღვინეები/მარნები, სომელიეები თუ მოყვარულები ერთნაირი ენთუზიაზმით ესწრებიან. გარდა კულტურულ-გასართობი კომპონენტისა, ეს ერთგვარი "აღმოჩენების“ დროცაა. ეს ის ადგილია, როცა ხშირად შეხვდებით სიახლეების მაძიებელ სომელიეებსა და ღვინის მოყვარულებს. მე პირადად მყავს რამდენიმე ასეთი სასიამოვნო აღმოჩენა, რომელსაც სწორედ ღვინის ფესტივალზე მივაკვლიე.
- საინტერესოა, რა გამოცდილება გაქვთ აქამდე გამართული ღვინის ფესტივალებიდან და რა მოლოდინი აქვთ წლევანდელი ღონისძიებისგან?
"ქართული ღვინის ფესტივალზე“ პირველად ვარ, სხვა ფესტივალებში მიმიღია მონაწილეობა. როგორც აღვნიშნე, ღვინის ფესტივალი სასიამოვნოსთან ერთად, სასარგებლოცაა, რადგან ყველა დაინტერესებული მხარე ერთ სივრცეში იყრის თავს. გარდა ამისა, მაღაზიასა თუ რესტორანში ამდენი ღვინის გასინჯვას დიდი დრო და არც თუ ისე ცოტა თანხა სჭირდება. ფესტივალი კი შემოკლებული გზაა, დროსა და ხარჯებს ზოგავს, თუმცა კი დილის თავისტკივილზე კი რა გითხრათ.
აღსანიშნავია, რომ თეონა თოხაძის ღვინის მასტერკლასი, ღვინის მუზეუმში, 15:00 საათზე გაიმართება, სადაც დასწრება თავისუფალი იქნება, ხოლო ადგილების რაოდენობა - შეზღუდული, ამიტომ იჩქარეთ და დილიდან ესტუმრეთ "ქართული ღვინის ფესტივალს".
#ღვინისფესტივალი #ღვინო #ქართულიღვინისფესტივალი
