კრის ევანსი ალბა ბაპტისტაზე დაქორწინდა - საქორწილო ცერემონია გასაიდუმლოებული იყო, ამბობენ, რომ სტუმრებს ტელეფონებიც კი ჩამოართვეს

მსოფლიოში ყველაზე სექსუალურ მამაკაცად აღიარებული კრის ევანსი ოფიციალურად დაქორწინდა. ვარსკვლავმა თავისი კოლეგა, ალბა ბაპტისტა საიდუმლოდ ჩატარებულ ცერემონიაზე მოიყვანა ცოლად.

წყაროს თქმით, საქორწილო ცერემონია შაბათს, მათსავე სახლში გაიმართა. მისივე ცნობით, წყვილმა მიწვეულ სტუმრებს გაუთქმელობის ხელშეკრულებაზე მოაწერინა ხელი, მათ ცერემონიისას ტელეფონებიც კი ჩამოართვეს.

როგორც ტაბლოიდური გამოცემა, PageSix იტყობინება, 42 წლის ევანსმა და 26 წლის ბაპტისტამ ქორწილში მხოლოდ ოჯახის წევრები და უახლოესი მეგობრები მიიწვიეს. სტუმრების სიაში მოხვდა რამდენიმე ვარსკვლავიც, მათ შორის რობერტ დაუნი უმცროსი, კრის ჰემსვორტი და ჯერემი რენერი.

წყვილს შორის რომანტიკული ურთიერთობაზე ჭორები პირველად 2022 წლის ნოემბერში გაჩნდა, როდესაც წყარომ ჟურნალ People-ს განუცხადა, რომ ისინი წელიწადზე მეტი ხნის განმავლობაში ხვდებოდნენ ერთმანეთს. "ისინი შეყვარებულები არიან და კრისი ასეთი ბედნიერი არასდროს ყოფილა", - დასძენდა ის.

ახალი ამბის გავრცელებიდან რამდენიმე საათში, პაპარაცებმა კრისი და ალბა სეირნობისას ხელჩაკიდებულები დააფიქსირეს. მას შემდეგ, კრისი თავისი პარტნიორის ფოტოებს "ინსტაგრამზე" თავისუფლად ტვირთავდა.

ალბა, მსახიობობასთან ერთად, პოლიგლოტიცაა - ის ხუთ ენას ფლობს: პორტუგალიურს, ინგლისურს, გერმანულს, ფრანგულს და ესპანურს. მიუხედავად იმისა, რომ ევანსი და ბაპტისტა თავიანთ რომანზე ბევრს არ ლაპარაკობდნენ, კრისმა გასული წლის ნოემბერშივე გამოთქვა დაქორწინების სურვილი:

"ცოლი, შვილები, ოჯახის შექმნა - ეს ისაა, რაც ნამდვილად მინდა. ვფიქრობ, ეს ყველაფერი უმნიშვნელოვანესია. ძალიან მომწონს ტრადიციის და ცერემონიის იდეა და ამაზე უკეთესი რამ ცხოვრებაში, ალბათ, არ არსებობს".

წყარო: pagesix