საფრანგეთში, "ყველაზე ბრიტანული კურორტის" აეროპორტს ელისაბედ II-ის სახელს არქმევენ
ჩრდილოეთ საფრანგეთში მდებარე საკურორტო ქალაქ ლე ტუკეს აეროპორტს სახელი გადაერქმევა და ის ელისაბედ II-ის სახელობის გახდება. სახელის შეცვლის ნებართვა დიდი ბრიტანეთის მეფემ, ჩარლზ III-მ გასცა. ლე ტუკე პარი პლაჟ, რომელსაც უფრო ხშირად ლე ტუკეთი მოიხსენიებენ, ჩრდილოეთ საფრანგეთის კომუნაა. მისი მოსახლეობა 4 227 ადამიანისგან შედგება, თუმცა საკურორტო ქალაქს ზაფხულობით ასიათასობით ადამიანი სტუმრობს.
ლე ტუკეს ქალაქის მერიამ განაცხადა, რომ "დიდებული დედოფლისადმი" პატივის მიგებით მათი ქალაქი "საფრანგეთის ყველაზე ბრიტანულ კურორტად" წოდებას კიდევ უფრო მიუახლოვდება.
გავრცელებული ინფორმაციის თანახმად, ბრიტანეთს აეროპორტის სახელწოდების შეცვლის მოთხოვნა დედოფლის გარდაცვალებიდან 6 დღეში გაეგზავნა. ლე ტუკეს მერის განცხადებაში ნათქვამია, რომ გარდაცვლილი დედოფლის ბიძა, ედვარდ მერვე ხშირად სტუმრობდა საკურორტო ზონას საჯირითოდ და იახტით გასასეირნებლად, რა დროსაც მას ხშირად ახლდა პატარა ელისაბედიც.
ლე ტუკეს აეროპორტი 1930 წელს აშენდა, რათა ბრიტანელებს სანაპირო ქალაქში შესვლა შეძლებოდათ. ქალაქის მმართველობა იმედოვნებს, რომ აეროპორტის ახალი სახელი მათ ქალაქსა და ბრიტანეთს შორის მჭიდრო კავშირს გააძლიერებს და კიდევ უფრო მეტ ტურისტს უმასპინძლებს.
ლე ტუკეს კურორტზე დასასვენებელ სახლს ფლობს საფრანგეთის პრეზიდენტი ემანუელ მაკრონიც, რომელიც მას მეუღლესთან ერთად სტუმრობს ხოლმე.
წყარო: bbc
მოამზადა: ანა სიბოშვილმა