"სიმბოლურ შეხვედრებს ატარებს, სინამდვილეში, მოსკოვში სამკურნალოდ ჩადის" - რა დაემართა ასლან ბჟანიას და რას მალავს ოკუპირებული აფხაზეთის ე.წ. პრეზიდენტი

ბჟანია ისევ მოსკოვში მკურნალობს...

ე.წ. სამუშაო ვიზიტით რუსეთში ყოფნისას, ოკუპირებული აფხაზეთის ლიდერი, ასლან ბჟანია შეუძლოდ გახდა და მოსკოვის სამედიცინო დაწესებულებაში გადაიყვანეს, სადაც საჭირო კვლევებს უტარებენ. აფხაზური მედიის ცნობით, "პრეზიდენტის" ე.წ. ადმინისტრაცია იტყობინება, რომ ბჟანიას სიცოცხლეს საფრთხე არ ემუქრება.

rbc.ru-ს ცნობით, ბჟანია 60 წლის არის და მას შემდეგ, რაც ის "პრეზიდენტის" პოსტზეა, მესამედ აღმოჩნდა სამედიცინო დაწესებულებაში და სამივეჯერ რუსეთში.გამოცემის ცნობით, სამედიცინო დაწესებულებაში ის არჩევნების დროსაც მოხვდა.

"2020 წლის მარტში, ვიდრე პრეზიდენტი გახდებოდა, საარჩევნო კამპანიაში იყო ჩართული, რა დროსაც ცუდად გახდა. მისი მომხრეები ვარაუდობდნენ, რომ ის მოწამლეს. გამოკვლევებისთვის ბჟანია კრასნოდარში გადაიყვანეს...

მაშინდელმა პრეზიდენტის მოვალეობის შემსრულებელმა, ვალერი ბგანბამ რუსეთის პროკურატურას, პოლიტიკოსის მოწამვლის მცდელობის ფაქტზე, სისხლის სამართლის საქმის აღძვრის მოთხოვნით მიმართა, თუმცა კრასნოდარის სამედიცინო დაწესებულების ადმინისტრაციამ განაცხადა, რომ ის მოწამლული კი არ იყოს, რესპირატორული გაციება, ორმხრივი პმევმონია ჰქონდა. შესაბამისად, საქმე არ აღძრულა"< - წერს გამოცემა.

მისივე ცნობით, 2019 წელს, ბჟანია, დაცვის ორ წევრთან ერთად, სოხუმის ერთ-ერთ კაფეში, დაცვის ორ წევრთან ერთად მოწამლეს. კაფეში მჟანიამ ყავა დალია. სამივე მათგანი მოსკოვში, სავადმყოფოში გადაიყვანეს. ბჟანიამ "არჩევნებში" მონაწილეობის მიღება ვერ შეძლო. თუმცა, ეს საქმეც მალე ჩაიფარცხა...

"2022 წელს, ასლან ბჟანიას რუსეთის ერთ-ერთ კლინიკაში თირკმლის ოპერაცია გაუკეთეს, თუმცა ამის შესახებ პრეზიდენტის ადმინისტრაცია დუმდა და მხოლოდ გაკვრით განაცხადა, რომ რეაბილიტაციის მიზნით, ის რუსეთის ერთ-ერთი კლინიკაში მკურნალობდა", - წერს აფხაზური მედია.

ადგილობრივების თქმით, "ბჟანია რაღაცას მალავს და სინამდვილეში, ძალიან მძიმე დაავადებას ებრძვის, რადგან წელიწადში რამდენჯერმე მოსკოვის ან სოჭის კლინიკაში მკურნალობს".

"ეს არ არის მხოლოდ თირკმლების ამბავი. გასაგებია, რომ დიალეზით მკურნალობა სჭირდება, მისი გარემოცვა ამბობს, რომ პრეზიდენტი ძველებურად ენერგიული არ არის და მაშინაც, როდესაც ამბობენ, რომ მოსკოვში სამუშაო ვიზიტით ჩავიდა, სინამდვილეში, მხოლოდ სიმბოლურ შეხვედრებს ატარებს, რომელსაც ხშირად მეგობრული მოკითხვის ხასიათი აქვს. მოსკოვში ის სამკურნალოდ ჩადის, მაგრამ ამის აფიშირება არ სურს, რათა ოპოზიციამ პოლიტიკური მიზნებისთვის არ გამოიყენოს", - მიაჩნია იასონ აფხაზს.

"დასამალი არც არის მისი ჯანმრთელობის ამბავი, იმდენჯერ მოწამლეს, გასაკვირი ის იქნებოდა, რომ პრობლემა არ ჰქონდეს. ბოლოს რომ შეხვდა მოსახლეობას, ფეხზე დგომა უჭირდა. მე უფრო ის მაკვირვევს, რომ მაინც რუსეთში გარბის. რატომ არ შეიძლება ევროპის რომელიმე ქვეყნის მედიცინას მიმართოს, თავად თუ ვერ ჩავა, მონაცემები მაინც გაგზავნოს, ახლა ონლაინ ყველაფერს აკეთებენ. რუსულ მედიცინას, თავად რუსები აღარ ენდობიან", - წერს ინესა წუშბა.