ზურაბ ჭიაბერაშვილი "ნაცმოძრაობაში" დაბრუნდა - "ეს შემოთავაზება მივიღე იმ გამოწვევების გათვალისწინებით, რაც დღეს ქვეყნის წინაშე დგას"

ჩვენი ძალისხმევა მიმართული იქნება იქითკენ, რომ ქვეყანამ ევროკავშირის კანდიდატი ქვეყნის სტატუსი მიიღოს. ამავდროულად, პრეზიდენტ სააკაშვილის პოლიტიკური პატიმრობის დასრულება არის გადაუდებელი ამოცანა ქვეყნისათვის და "ნაციონალური მოძრაობისთვის“, - ამის შესახებ ახლად დანიშნულმა "ნაციონალური მოძრაობის“ საგარეო ურთიერთობათა მდივანმა, ზურაბ ჭიაბერაშვილმა პარტიის ოფისში გამართულ ბრიფინგზე განაცხადა.

მისივე თქმით, მესამე საკითხი, რაზეც "ნაციონალური მოძრაობა“ იმუშავებს, არის უკრაინასთან საგარეო პოლიტიკური კავშირის შენარჩუნება.

"მადლობა "ერთიან ნაციონალურ მოძრაობას“ ამ შემოთავაზებისთვის, რომელიც ბუნებრივია, მივიღე იმ გამოწვევების გათვალისწინებით, რაც დღეს ქვეყნის წინაშე დგას. მეც გავიმეორებ, რომ დღეს პარტია „ერთიანი ნაციონალური მოძრობა“ ფოკუსირებულია სამ მნიშვნელოვან საკითხზე და ჩვენ გავაგრძელებთ ამ მიმართულებით მუშაობას. რა თქმა უნდა, ეს არის ევროკავშირის წევრობის კანდიდატის სტატუსი. ეს არის ძალიან მნიშვნელოვანი, რომელსაც წინ ეღობება „ქართული ოცნება“, ეს რუსული საოკუპაციო რეჟიმი საქართველოში და განსაკუთრებით, ამ რეჟიმის მიერ წარმოებული პოლიტიკური მართლმსაჯულება და პოლიტიკური დევნა უკვე 11 წლის განმავლობაში.

რა თქმა უნდა, პრეზიდენტ სააკაშვილის პოლიტიკური პატიმრობა არის მთავარი წინაღობა დღეს იმ გზაზე, რასაც ჰქვია საქართველოს დაბრუნება ევროპულ და ევროატლანტიკურ სივრცეში. ამიტომ ჩვენი ძალისხმევა მიმართული იქნება იქითკენ, რომ ქვეყანამ მიიღოს კანდიდატის სტატუსი. ამავდროულად პრეზიდენტ სააკაშვილის პოლიტიკური პატიმრობის დასრულება არის გადაუდებელი ამოცანა ქვეყნისათვის და ამ პარტიისათვის. მესამე საკითხი ეს არის უკრაინასთან საგარეო პოლიტიკური კავშირის შენარჩუნება, უკრაინისადმი სოლიდარობა. ეს უნდა იყოს ქვეყნის ძალიან სწორი, გააზრებული პოლიტიკა ამ თვალსაზრისით, იმიტომ რომ გამარჯვების შემდეგ უკრაინა იქნება ქვეყნის ლიდერი და გამწევი ძალა იმისათვის, რომ საქართველოს სწრაფი ინტეგრაცია მოხდეს ევროპულ და ევროატლანტიკურ სტრუქტურებში. ამიტომ ამ მიმართულებითაც იქნება ჩვენი ძალისხმევა მიმართული. დავამატებ, რომ პრეზიდენტ სააკაშვილის ფაქტორი ამ თვალსაზრისითაც იქნება ძალიან მნიშვნელოვანი“, - განაცხადა ზურაბ ჭიაბერაშვილმა.

ზურაბ ჭიაბერაშვილი "ევროპული საქართველოს" რიგებში იყო. მან პარტია 2021 წელს დატოვა.