"სამი ვარიანტი არსებობს" - ომის დასრულების რა ვარიანტებს ასახელებს მიხაილო პოდოლიაკი

უკრაინის პრეზიდენტის ადმინისტრაციის ხელმძღვანელის მრჩეველი, მიხაილო პოდოლიაკი ომის დასრულების სამ ვარიანტზე საუბრობს, რომელიც მოიცავს სცენარებს უკრაინის გამარჯვებით, დამარცხებით ან "მინსკი 3“-ით.

"ომის დასრულების მხოლოდ სამი ვარიანტია. პირველი: გავიმარჯვეთ და ამგვარად არსებობს უკრაინის სახელმწიფო, რომელიც სრულად დომინირებს რეგიონში და, შესაბამისად, ძალიან მკაფიო პარტნიორული ურთიერთობები ექნება. ის შეძლებს არმიის მოდერნიზებას და იმას, რომ ეფექტური არმია ჰყავდეს“, - განაცხადა პოდოლიაკმა.

პოდოლიაკის თქმით, ამის პარალელურად იარსებებს დემილიტარიზაციის ზონა რუსეთის ფედერაციასთან, რუსეთის ფედერაციას ჩამოერთმევა გარკვეული დიაპაზონის რაკეტები და გაიმართება სამიტი რუსეთის ბირთვული არსენალის გასაკონტროლებლად.

პოდოლიაკის შეფასებით, მეორე ვარიანტი შეიძლება იყოს უკრაინის წაგება და "მაშინ უკრაინა თანდათან მოკვდება“ რამდენიმე წლის განმავლობაში.

"არის მესამე ვარიანტი: ჩვენ არ წავაგეთ, მაგრამ არის სადემარკაციო ხაზი - მინსკი-3. ეს ნიშნავს, რომ ძალიან ნელა მოვკვდებით. ისინი შეგაერთებენ აპარატზე, რომელიც თქვენს სიცოცხლეს შეინარჩუნებს“, - განაცხადა უკრაინის პრეზიდენტის ადმინისტრაციის ხელმძღვანელის მრჩეველმა.

მისი აზრით, ეს ნიშნავს, რომ უკრაინაში სახელმწიფოებრიობა აღარ იარსებებს.

"ამიტომ ყველაფერი დანარჩენი არის რაღაც ალტერნატიული ელემენტების პოვნის მცდელობა, რომელიც სადღაც რაღაცის გაგრძელების საშუალებას იძლევა. ჩვენ გვაქვს ძალიან მარტივი ვარიანტები - მოგება ან წაგება“, - აღნიშნა პოდოლიაკმა.