"საქართველოს ნატოში - ში გაწევრების შანსები რუსეთის დასუსტების პარალელურად იზრდება" - როგორია ვილნიუსის სამიტის შედეგები ჩვენი ქვეყნისა და უკრაინისთვის?
11 ივლისს ვილნიუსში ნატოს სამიტზე საქართველოს საგარეო საქმეთა მინისტრი, ილია დარჩიაშვილი წარმოადგენდა, არც საქართველოს პრეზიდენტი და არც პრემიერ-მინისტრი ამ მნიშვნელოვან ფორუმს არ დასწრებიან. სამიტის მთავარი თემა უსაფრთხოების ახალი სისტემის შექმნა და უკრაინაში მიმდინარე ომი იყო.
"ცივი ომის" შემდეგ ყველაზე სრულყოფილი თავდაცვის გეგმები დავამტკიცეთ", - ამის შესახებ ნატო-ს გენერალური მდივანი იენს სტოლტენბერგი “ტვიტერის” პირად გვერდზე წერს. მისი თქმით, "უსაფრთხოებისთვის კრიტიკულ მომენტში მოკავშირეებმა საკვანძო გადაწყვეტილებები“ მიიღეს.
"შევთანხმდით პაკეტზე უკრაინის გასაძლიერებლად და ნატო-სკენ ნათელი გზის მისაცემად. ასევე, "ცივი ომის" შემდეგ ყველაზე სრულყოფილი თავდაცვის გეგმები დავამტკიცეთ, რომლებსაც ზურგს უმაგრებს მტკიცე ვალდებულებები მეტი ინვესტიცია გავაკეთოთ თავდაცვაში”, - წერს სტოლტენბერგი.
სამიტზე ითქვა, რომ უკრიანის გზა ნატოსკენ გასცდა MAP-ის საჭიროებას, უფრო მეტად თავსებადია და პოლიტიკურად ინტეგრირებულია ალიანსთან და მიაღწია მნიშვნელოვან პროგრესს რეფორმების გზაზე. აი, საქართველოს გზა ნატოსკენ კი მაპზე გადის.
ალიანსის მიერ მიღებულ კომუნიკეში ჩაიწერა, რომ ევროატლანტიკური მისწრაფებების წინსვლისთვის საქართველომ რეფორმებში პროგრესს უნდა მიაღწიოს, მათ შორის საკვანძო დემოკრატიულ რეფორმებში. ამასთანავე, ნატოს წევრები იმეორებენ 2008 წლის ბუქარესტის სამიტზე მიღებულ გადაწყვეტილებას, რომ საქართველო გახდება ალიანსის წევრი წევრობის სამოქმედო გეგმით, (MAP) როგორც პროცესის განუყოფელი ნაწილით.
სამიტის შედეგებზე Ambebi.ge-ს საერთაშორისო ურთიერთობების ექსპერტი გიორგი გობრონიძე ესაუბრა:
- რეალურად რომ შევხედოთ, საქართველოსთვის ერთეულ სამიტებზე არაფერი შეიცვლება. ასე რომ ვთქვათ, ჩვენი დიპლომატია სამიტიდან სამიტამდე "ცხოვრობს“. რა თქმა უნდა, გაკეთდა ისეთი შეფასებები, რომლებიც გარკვეულწილად პოზიტიურად შეგვიძლია შევაფასოთ.
"ნატო" უკვე შემდგარია, როგორც ანტირუსული ორგანიზაცია. შესაბამისად, ჩვენი ნატოში გაწევრების შანსები რუსეთის დასუსტების პარალელურად იზრდება. მთლიანობაში, არსებული უსაფრთხოების გარემოს ტრანსფორმაციიდან გამომდინარე, საქართველოს უჩნდება შანსები, კიდევ უფრო დაახლოვდეს არსებულ ორგანიზაციასთან, თუკი, რა თქმა უნდა, ჩვენი მხრიდან გადადგმული იქნება შესაბამისი ნაბიჯები.
რაც შეეხება იმას, სახელმწიფოს უმაღლესი წარმომადგენლებიდან სამიტს არავინ დაესწრო, რა თქმა უნდა, უკეთესი იქნებოდა, დასწრებოდნენ. კარგია, რომ პრეზიდენტი გამოეხმაურა, მაგრამ რეალურად უფრო სისტემატური სამუშაო გვაქვს გასაკეთებელი. გვჭირდება მეტი აქტიურობა და მუშაობა ჩვენს პარტნიორებთან. აქედან გამომდინარე, არსებითად ერთეულ სამიტს დაესწრება თუ არა პრეზიდენტი ან პრემიერი, ამას გადამწყვეტი მნიშვნელობა არ აქვს, თუ თანამშრომლობა არ იქნება სათანადოდ პროდუქტიული.
გვქონია ისეთი სამიტები, რომლებსაც საქართველოდან უმაღლესი წარმომადგენლობა დასწრებია, მაგრამ ამას სათანადო შედეგები არ მოუტანია.
- ნატო-ს სამიტზე უკრაინასთან დაკავშირებით ახალი გადაწყვეტილება მიიღეს, რომლის თანახმადაც, MAP-ის შესახებ მოთხოვნა გაუქმებულია. საინტერესოა, რამ განაპირობა ამგვარი გადაწყვეტილების მიღება?
- MAP - ის მოთხოვნის გაუქმების გადაწყვეტილებას ორი მიზეზი აქვს: პირველ რიგში, ეს რუსეთის აგრესიამ განაპირობა. პრაქტიკულად, დღეს უკრაინაზე გადის ევროპისა და ევროატლანტიკური საბჭოს უსაფრთხოება.
ჩვენ ვნახეთ, რომ სკანდინავიის ქვეყნები - შვედეთი, ფინეთი, ფაქტობრივად, უკვე ნატო-ს წევრები გახდნენ, რაც რუსეთისთვის კატასტროფის ტოლფასია. მოსკოვს ეშინოდა ნატო-სთან სახმელეთო საზღვრების ზრდის. შეიძლება მივიდეთ იმ მომენტამდე, რომ უკრაინა-რუსეთის დაპირისპირებაში ნატოს-ს ჩართულობა არამხოლოდ სამხედრო დახმარების ფორმებით შემოიფარგლოს, არამედ უფრო მასშტაბური სახეც მიიღოს.
რაც შეეხება მეორე მიზეზს, ეს პრიგოჟინის დემარშმა განაპირობა. ამ საქციელმა ყველას აჩვენა, რომ რუსეთი დღეს იმაზე უძლურია, ვიდრე სხვებს წარმოედგინათ. ამიტომ უკრაინისთვის MAP-ის მოთხოვნის გაუქმების გადაწყვეტილება მარტივად შეიძლება აიხსნას, რუსეთის უბრალოდ აღარ ეშინიათ...
იხილეთ ასევე: