"რუსეთში თუ დაძაბულობაა, პუტინი ყოველთვის ცდილობს, დაძაბულობის კერები სხვაგანაც შექმნას" - რა შეიძლება იყოს ბელარუსის როლი არშემდგარ ამბოხში: რუსი ანალიტიკოსების მოსაზრებები
პრიგოჟინის არშემდგარი თუ გათამაშებული ამბოხის გარშემო მსჯელობა და ინტერესი არ წყდება რუსეთში(და არა მხოლოდ)... ადგილობრივი ანალიტიკოსების თქმით, პუტინის მზარეულმა ზედაპირზე ამოატივტივა ის პრობლემები, რაც წლების განმავლობაში რუსულ პოლიტიკაში, თავდაცვის სამინისტროსა და გენერალიტეტში დაგროვდა.
რამდენიმედღიანი თავის მართლების თუ ახსნის რეჟიმში მყოფმა რუსეთის ხელისუფლებამ, საბოლოოდ, პრიგოჟინისა და "ვაგნერის" წინააღმდეგ, შეიარაღებული ამბოხების მუხლით აღძრული სისხლის სამართლის საქმე შეწყვიტა. ბოლო ინფორმაციით, პრიგოჟინი ბელარუსში, მინსკში იმყოფება.
kommersant.ru-ს ცნობით, ალექსანდრე ლუკაშენკო იმედოვნებს, რომ "ვაგნერი" ბელარუსი სამხედროების მაღალპროფესიულად მომზადებაში დაეხმარება.
"ვაგნერელებს" შეუძლიათ არაფრის ეშინოდეთ. მათ გამოცდილებას ჩვენი ბიჭებისთვის გამოვიყენებთ, ეს ბელარუსისთვისაც სასარგებლო იქნება. მე ამის შესახებ ვესაუბრე თავდაცვის მინისტრს ვიქტორ ხრენინს... მათ ასევე შეუძლიათ თავიანთი შეფასება სხვადასხვა იარაღთან დაკავშირებით გაგვიზიარონ, რომელი ჯობია, თავდასხმისთვის, თავდაცვისთვის... ეს გამოცდილება შეუფასებელია. ამ გამოცდილების გამოყენება შეგვიძლია და მათში საშიშს ვერაფერს ვხედავ" - ამბობს ლუკაშენკო.
რუსი ანალიტიკოსის, ტატიანა სიჩევას თქმით, "ვაგნერელები" საშიში მაშინ იყვნენ, როდესაც პრიგოჟინისა და უტკინის კონტროლის ქვეშ იმყოფებოდნენ. უამრავი მათგანი, გასამხედროებულ კომერციულ ორგანიზაციას პირდაპირ ციხიდან, მკაცრი რეჟიმის კოლონიიდან შეუერთდა, ბოლო ფაქტის შემდეგ კი "ვაგნერის" რიგები დატოვა.
სოციალურ ქსელში სისტემატურად ვრცელდება ცნობები, თუ როგორ აკრიტიკებენ "ვაგნერელები", პრიგოჟინს მშიშრული გადაწყვეტილების გამო.
"ვინმეს სჯერა, რომ ეს ხალხი, "ვაგნერელები" არმიასთან კონტრაქტს გააფორმებენ და კეთილსინდისიერად იმსახურებენ?.. ისინი პრივილეგირებულ მდგომარეობაში იყვნენ, უკეთესი საკვებით, სამჯერ მეტ ხელფასს იღებდნენ, თავისი ბონუსით და ახლა როგორ ფიქრობთ, რიგითებთან ერთად იმსახურებენ? ჩვენს მეთაურობას მათი გაკონტროლების უნარი, არ მგონია, ჰქონდეს.
ეს ერთი, მეორე საკითხი ის არის, რომ ჩვენს ინტელიგენციას ყოველთვის თავისი ინტერესები ადარდებდა. პრიგოჟინის თითქმის მოსკოვამდე მოსვლითაც კი ვერაფერი გაიგეს. აბსოლუტურად ბანდიტურ ქვეყანაში ვცხოვრობთ, სადაც ჩვენს ინტელიგენციას მხოლოდ ერთი რამ ადარდებს - თავად არ დაზარალდნენ... წინ ჩეკისტური მაფიის ქაოსი და ბანდიტური გარჩევები გველოდება... ვიღაცები დასავლეთისკენ იშვერენ ხელს - ყველაფრის სხვისთვის გადაბრალება საუკეთესო გამოსავალია, მასები ასე უკეთ გრძნობენ თავს" - მიაჩნია სიჩევას.
კიდევ ერთი მიმომხილველის, ალექსი ავერინის მოსაზრებით, სისულელეა იმის თქმა, თითქოს ეს ამბოხი პუტინის ინსცენირებული იყო, რადგან ამ ინციდენტმა რუსეთის პრეზიდენტის ინსტიტუტი და სახელმწიფო ინსტიტუციები გააცამტვერა.
"ახლა ლუკაშენკოს და სხვა "კუდების" დახმარებით ცდილობენ სიტუაციის ჩაფარცხვას, პროპაგანდა მცირეხნიანი პაუზის შემდეგ, მთელი ძალით ამუშავდა... პუტინის გუშინდელ გამოსვლას ასე შევაფასებდი - მეფე გაშიშვლდა და მართვის კონტროლი დაკარგა. კრემლი ინერციით მიდის. მართლა არ იციან რა გააკეთონ. რუსეთი როგორც შიდა, ასევე უკრაინაში, მთელ ფლანგზე, ყველა ფრონტზე კრახს განიცდის. კრემლის ოლიგარქები გადარჩენას ცდილობენ. თუ პრიგოჟინთან ერთად გამოუვიდოდათ ცვლილება, კარგი იქნებოდა, ახლა ჩუმ მოქმედებაზე გადავლენ.
პრიგოჟინს აშკარად შეეძლო, მოსკოვამდე ჩასულიყო, კრემლი კი, ვერაფერს გახდებოდა, რადგან მასთან ბრძოლისთვის, უკრაინაში მყოფი ელიტური სამხედრო დანაყოფების ნახევარი უნდა მოეხსნათ. მათთან შეტაკება, საბოლო, დამანგრეველი კრახი იქნებოდა. ამიტომ, პროგოჟინს, რაღაც მორიგ სისულელეზე შეუთანხმდნენ, იმედია, ეს უკრაინაზე ბელარუსიდან თავდასხმა არ იქნება - ამის რესურსი ბელარუსს არ აქვს, პასუხად, შესაძლოა, შიდა არეულობაც დაიწყოს, მაგრამ რუსეთში თუ დაძაბულობაა, ის (პუტინი) ყოველთვის ცდილობს დაძაბულობის კერები სხვაგანაც შექმნას, შემდეგ კი, გამოსავლის პოვნას ცდილობს" - წერს ავერინი.
წაიკითხეთ ასევე: