"რა თქმა უნდა, საშინელებაა - სახლში ზიხარ და ფიქრობ, თუ რა შეიძლება მოხდეს" - პარალიზებული მოსკოვი და პანიკაში მყოფი ადგილობრივების კომენტარები

"ვაგნერის" შეიარაღებული მანქანების კოლონა მოსკოვისკენ მიემართება. გადამღებმა ჯგუფმა ისინი M4 მაგისტრალზე დააფიქსირა, რომელიც ვორონეჟსა და მოსკოვს ლიპეცკის რეგიონის გავლით აკავშირებს.

მოსკოვის მისასვლელებთან ბლოკპოსტების და თავდაცვითი პოზიციების აგება დილიდანვე დაიწყეს. სიმფეროპოლის გზატკეცილზე (М2 „ყირიმი“) ქალაქ სერპუხოვის რაიონში გადაკეტილია ხიდი. ასევე შეზღუდულია მოძრაობა პარალელურ ტრასაზე М4 "დონი", რომელზეც ვაგნერის კოლონა გადაადგილდება.

ვრცელდება ფოტო სოციალურ ქსელში, სადაც ჩანს თუ როგორ ემზადებიან "ვაგნერის დასახვედრად რუსეთის დედაქალაქის მისადგომებთან'

ქალაქში უსაფრთხოების ზომები გამკაცრებულია, ქუჩებში ჯავშანტექნიკა ჩანს. მოსახლეობის რეაქცია კი არაერთგვაროვანია.

"რა თქმა უნდა, საშინელებაა - სახლში ზიხარ და ფიქრობ იმაზე, თუ რა შეიძლება მოხდეს. ეს შემაშფოთებელია როგორც თქვენთვის, ასევე თქვენი საყვარელი ადამიანებისთვის“ - განაცხადა მოქალაქემ BBC- ის კორესპონდენტთან საუბრისას.

"არა, ეს საერთოდ არ მაშინებს. მე მჯერა ჩვენი პრეზიდენტისა და ჩვენი ხალხის“ - ამბობს მეორე.

"ვფიქრობ, ყველაფერი კარგად იქნება, მაგრამ თუ ისინი ემზადებიან [ანტიტერორისტული ზომების] შემოსაღებად, ეს ნიშნავს, რომ ამის მიზეზი არსებობს.“

როგორც ჩანს, "ვაგნერი" ჩრდილოეთით, მოსკოვის მიმართულებით მოძრაობს.

დღეს დილით, "ვაგნერის" ჯარისკაცები დონის როსტოვის სამხრეთით შენიშნეს; მოგვიანებით გავრცელდა ინფორმაცია, რომ ისინი ვორონეჟში იმყოფებდნენ.

ვორონეჟის ჩრდილოეთით მდებარე ლიპეცკის ოლქის გუბერნატორის განცხადებით, "ვაგნერის“ ჯარები რეგიონში მოძრაობენ.