"როგორც რუსი ანალიტიკოსები ამბობენ, მაღალია რისკი იმისა, რომ პრიგოჟინის მოქმედება მხარდაჭერილია პუტინის კარზე და გადატრიალება მოხდება" - რა ელის რუსეთს: სავარაუდო პროგნოზები

15:01 / 24-06-2023

პრიგოჟინი პუტინს მთავრობის დამხობით ემუქრება. "ვაგნერის“ დაჯგუფების მეთაური ამტკიცებს, რომ რუსეთს მალე ახალი პრეზიდენტი ეყოლება. აჯანყებული პრიგოჟინი წინ მიიწევს. „როიტერის“ ცნობით, ვორონეჟის ყველა საკვანძო და სამხედრო ობიექტი, მათ შორის აეროპორტიც „ვაგნერის“ კონტროლქვეშაა. ვორონეჟში ანტიტერორისტული ოპერაციის რეჟიმი შემოიღეს...

იგივე ვითარებაა რისტოვშიც - ქალაქს სრულად „ვაგნერები“ აკონტროლებენ, ქალაქის ყველა შესასვლელ-გასასვლელი ჩაკეტილია, ცენტრში კი ჯავშანტექნიკა და შეიარაღებული სამხედროები დგანან.

პრიგოჟინი ამტკიცებს, რომ აჯანყებაში 25 ათასი „ვაგნერის“ მებრძოლი იღებს მონაწილეობას. მისივე მტკიცებით, „ვაგნერს“ დონის როსტოვის სამხედრო ობიექტები და აეროპორტიც კონტროლქვეშ ჰყავს აყვანილი.

არსებობს ცნობები, რომ კერძო სამხედრო დაჯგუფება რუსეთის დედაქალაქს უახლოვდება. მოსკოვში კონტრტერორისტული რეჟიმია დაწესებული, სადაც ყველა გზატკეცილი გადაკეტეს. კრემლი სრულ პანიკაშია და ქალაქში გადაადგილებაზე შეზღუდვებია დაწესებული. ვორონეჟი, რომელსაც „ვაგნერელების“ ნაწილი აკონტროლებს, მოსკოვიდან 500კმ-შია.

ყველაფერი იმით დაიწყო, რომ 23 ივნისს, "ვაგნერის“ დამფუძნებელმა ევგენი პრიგოჟინმა რუსეთის თავდაცვის სამინისტრო დაადანაშაულა გასამხედროებული დანაყოფის ზურგის განლაგებაზე თავდასხმაში, რასაც, რუსი ბიზნესმენის თქმით, „ვაგნერის“ რიგებში დიდი მსხვერპლი მოჰყვა. პრიგოჟინმა განაცხადა, რომ მის განკარგულებაში არსებული 25 ათასი მებრძოლი დაიძრა, რათა აღადგინოს სამართლიანობა და შეაჩეროს „ბოროტება, რომელსაც ქვეყნის სამხედრო ხელმძღვანელობა ატარებს“. ამავე დროს, პრიგოჟინმა აღნიშნა, რომ „ეს არ არის სამხედრო გადატრიალება, ეს არის სამართლიანობის მარში“.

პუტინმა, რომელიც, როგორც ჩანს, ამგვარ სცენარს არ ელოდა, საჯაროდ დაადასტურა, რომ რუსეთი სამხედრო გადატრიალების ზღვარზეა, დიქტატორი ვაგნერის მეთაურს შურისძიებას და მრავალწლიან პატიმრობას ჰპირდება. „ეს არის ღალატი და ზურგში დანის ჩარტყმა“, - თქვა პუტინმა საგანგებო მიმართვის დროს.

დასავლეთში ფიქრობენ, რომ ვაგნერის სამიზნე ახლა მოსკოვია.

**უსაფრთხოების გამკაცრებული ზომები მოსკოვთან**

რუსეთში მიმდინარე პროცესებსა და ამ ფონზე საქართველოსთვის მოსალოდნელ საფრთხეებზე AMBEBI.GE-სთან თადარიგის პოლკოვნიკი გიორგი თავდგირიძე საუბრობს:

- ფაქტებზე დაყრდნობით შეიძლება იმის თქმა, რომ არსებობს ორი სამხედრო დაჯგუფება, რომლებიც უკვე დიდი ხანია უკრაინელებთან თანამშრომლობენ და რომლებიც რუსეთის ტერიტორიაზე, შეიძლება ვთქვათ, საბრძოლო მოქმედებებს წარმატებით ახორციელებენ. წარმატებულს იმიტომ, რომ მათ მიზერული დანაკარგები აქვთ და თავიანთ მიზნებსაც მიაღწიეს. ისინი გარკვეული პაუზებით მოქმედებენ. გარდა ამისა, უკვე გაჩნდა „ვაგნერიც“ - ფაქტია, მოხდა „ვაგნერის“ მიზნების დეკლარირება და ამას მოჰყვა მოქმედებაც - მათი გადაადგილება და როსტოვის დაკავება. ვრცელდება სხვადასხვა ინფორმაცია, თითქოს მათ ვორონეჟის მიმართულებით აქვთ წარმატებები და მოსკოვის მიმართულებითაც ხორციელდება მოძრაობა. ფაქტია, რომ დაუმორჩილებლობის მაღალი ხარისხია. თვითონ პრიგოჟინის განცხადებაშიც დასტურდება, რომ მათ ჰქონდათ შეტაკებები და თავდაცვის სამინისტროს ძალებმა განიცადეს გარკვეული დანაკარგები, საუბარია სამი ვერტმფრენის დაზიანებაზე, მაგრამ მხოლოდ ერთის ვიდეოკადრები აჩვენეს. ჩავთვალოთ, რომ რაკი პრიგოჟინმა ეს განაცხადა, მიუხედავად იმისა, გაბუქებულია თუ არა, ფაქტია, მან ისეთი პოზიციონირება მოახდინა, რომ ოფიციალური რუსეთის შეიარაღებულ ძალებთან მას აქვს გარკვეული შეტაკებები. გარდა ამისა, ისევ მას რომ დავეყრდნოთ, პრიგოჟინმა განაცხადა, რომ სახელმწიფო სტრუქტურის ზოგიერთი წარმომადგენელი და ქვედანაყოფები მასთან წინააღმდეგობაში არ შედიან და უარს აცხადებენ მათთან ბრძოლაზე. შეესაბამება თუ არა ეს რეალობას, ამის დამადასტურებელი ფაქტები მალე გამოჩნდება.

- როგორ შეიძლება რუსეთში განვითარდეს მოვლენები, გვაქვს უკვე პროგნოზების გაკეთების საშუალება?

- ჩვენ შეგვიძლია ვთქვათ ერთი რამ: მიუხედავად იმისა, იყო გაცხადებული, რომ ეს შეიძლება იყოს დიდი თამაში, სპექტაკლი, ამაზე მგონი წერტილი უკვე დასმულია. პუტინმა მიმართა და დავალება მისცა რუსეთის შეიარაღებულ ძალებს, რომ გაანადგუროს სამხედრო ამბოხის მეთაურები. ეს არის ძალიან ცუდი ფორმულირება რუსეთისთვის და ამის ქვეშ იგულისხმება ყველა მეამბოხის განადგურება. რუსეთის ისტორია ვიცით და ვხვდებით, რომ ეს არის პოზიციის შერბილება, გარკვეული საინფორმაციო ტრიუკი, რომ თითქოს პრიგოჟინი და რამდენიმე მეთაურია იქ დამნაშავე. ის პროგნოზი შეგვიძლია გავაკეთოთ, რომ ცალსახად, დღეს არც ერთი მხარე ამ დაპირისპირებაში არ ფლობს უპირატესობას იმიტომ, რომ ერთი მხარის უკან არის გაცილებით დიდი რესურსი, ანუ ოფიციალური ხელისუფლების შეიარაღებული ძალები, მაგრამ მეორე მხარეს აქვს მხარდაჭერა და მოქნილობა თავის მოქმედებაში. ხდება პრიგოჟინის გადაწყვეტილებების უმალ აღსრულება, მას, რა თქმა უნდა, ამ გადაწყვეტილების მიღებაში თავისი გენერლები ეხმარებიან, მაგრამ მიუხედავად ამისა, სწრაფი აღსრულება ხდება, რასაც ვერ ვხედავთ მეორე მხარეს. ჩვენი გადასახედიდან, საბედნიეროდ, ადმინისტრაციული ერთეულების ხელმძღვანელებს საერთოდ არ აღმოაჩნდათ უნარი, ასეთ მოქმედებას რაიმე ტიპის წინააღმდეგობა გაუწიონ, ისინი ურმის მეხუთე ბორბალივით არიან და ვერანაირ გავლენას ვერ ახდენენ თავიანთ რეგიონებში, რაიონებსა თუ გუბერნიებში. ამიტომ ამას მიეცემა ცენტრალური დაპირისპირების სახე, სადაც ხალხის სიმპათია, რა თქმა უნდა, იქნება პრიგოჟინის მხარეს და ეს იმიტომ, რომ პრიგოჟინს მათი შვილები საზარბაზნე ხორცად არ მიჰყავს. გააჩნია, დღეს საღამომდე რა გადაწყვეტილებას მიიღებს პრიგოჟინი. გადაწყვეტილება თუ იქნება მტკიცე, რა თქმა უნდა, ამას მოჰყვება გარკვეული შეტაკებები და ეს როგორ დამთავრდება, წინასწარ ამის პროგნოზირება ძალიან ძნელია იმიტომ, რომ გარკვეული დროის, დაახლოებით ერთი კვირის განმავლობაში მოხდება ძალების გადაჯგუფება, ანუ გაირკვევა, ვინ ვის მხარეს დადგება, დეპუტატები რა განცხადებას გააკეთებენ... ანუ დაიწყება ბანაკების ჩამოყალიბება და ეს მთელი პროცესია.

ზოგადად, როგორც კი რაღაც მოვლენა იწყება, მასზე გავლენის მოხდენას ყველა ცდილობს. რაკი ეს მოვლენა ობიექტურად წარმოიშვა, მასზე ზეგავლენის მოხდენას ბევრი ცდილობს სხვადასხვა მიზნით. უკრაინა არის დაინტერესებული, ისიც შეეცდება გარკვეული კონტაქტი იქონიოს და გავლენა მოახდინოს, გარდა ამისა, უკვე იყო ვიდეოჩართვა, სადაც რუსების მოხალისეთა გათავისუფლების ლეგიონმა (ვინც ბელგოროდს უტევდა), განაცხადა, რომ ისინი ახლოს არიან მოსკოვთან და მალე „ვაგნერელებიც“ გამოჩნდებიანო, რაც იმას ნიშნავს, რომ მათი ძალების გაერთიანების იმედი აქვთ. დღეის მონაცემებით, ეს პროცესი რუსეთის ცენტრალური ხელისუფლებისთვის ძალზე შემაშფოთებელია თავისი დიდი მასშტაბით (მთელ სამხრეთ რუსეთზე აქვს უკვე გავლენა და ამ გავლენის მოსპობა ცენტრალურ ხელისუფლებას ასე მარტივად არ შეუძლია), პლუს ამას, მათ თუ ბელგოროდის ოლქი შეუერთდა, ანუ არასტაბილური მოვლენები ამ დიდ მოვლენასთან თუ გაერთიანდა, ხელისუფლებას კიდევ უფრო რთული ამოცანის გადაჭრა მოუწევს, თან ეს ყველაფერი იმის ფონზე, რომ ამ დროს უკრაინაში მიმდინარეობს საბრძოლო მოქმედებები, სადაც უკრაინელები გააქტიურდნენ. შესაბამისად, ეს აქტიურობა რუსეთს აიძულებს, დამატებითი ძალები წარმოქმნას, რაც სხვადასხვა რეგიონებზე ამ პროცესების გავლენის გაფართოებას გამოიწვევს. ეს არის ის, რაც დღეს შეგვიძლია ვთქვათ.

- ამ ფონზე საქართველოს რა საფრთხეები ემუქრება და რა ზომებს უნდა მიმართავდეს ჩვენი ხელისუფლება?

- რჩევის მიცემა ცოტა უმადური თემაა იმიტომ, რომ წესით, სახელმწიფო მანქანა უნდა ფლობდეს ზუსტ ინფორმაციას - ჩვენი სტრატეგიული მოკავშირეებისგან, გარკვეული თავისი წყაროებიდან ჰქონდეს ინფორმაცია, როგორ შეიძლება განვითარდეს მოვლენები და მან უნდა აიღოს პასუხისმგებლობა. მან, პირველ რიგში, უნდა მიმართოს მოსახლეობას, რომ ის აკონტროლებს სიტუაციას, მერე განაცხადოს, რა დგას ამ კონტროლის უკან. ჩვენს ხელისუფლებას მოსახლეობის უპირობო ნდობა თუ არ აქვს, მან მეტი ინფორმაცია უნდა გასცეს, რათა მოსახლეობა დაარწმუნოს, რომ უსაფრთხოება გარანტირებულია და დღესვე დაიწყოს პრაქტიკული ღონისძიებები, ან მოსამზადებელი სამუშაოები მაინც. ცალსახად, ის, რომ საზღვრის და ოკუპირებული ტერიტორიების ზოლის გაკონტროლება, გარკვეული ღონისძიებები ამ მიმართულებით რომ უნდა დაიწყოს, ეს ერთმნიშველოვანია. რაც ყველაზე მთვარაია, ჩვენ თუ სტრატეგიული პარტნიორები შემოგვრჩა, მათთან სასწრაფოდ კავშირის აღდგენაა საჭირო იმიტომ, რომ ჩვენს ჩრდილოეთით, ჩვენს მეზობლად იბადება უკონტროლო დიდი სივრცე, თან - უზარმაზარი, ბალკანეთზე უფრო დიდი სივრცე (როსტოვი, ვორონეჟი და ჩრდილოეთ კავკასია ერთად) და იქ იმდენი ენერგია და იმდენი იარაღია დაგროვილი, ამ სივრცის კონტროლიდან გამოსვლა საკმაოდ დიდ მეტასტაზებს წარმოშობს, თავის საზღვრებს გასცდება.

- მაინც როგორ შეიძლება განვითარდეს მოვლენები?

- როგორც რუსი ანალიტიკოსები (ოპოზიციურიც და სახელისუფლებოც) ამბობენ, რისკი იმისა, რომ პრიგოჟინის მოქმედება მხარდაჭერილია პუტინის კარზე და უახლოეს საათებში კარის გადატრიალება მოხდება, მაღალია. ლოგიკა იმაშია, რომ პრიგოჟინის საფრთხე ამცირებს პუტინის ჩამოგდების მოწინააღმდეგეების ენთუზიაზმს. სულ უფრო მეტი ჩინოვნიკისთვის სიტუაციიდან გამოსავალი პუტინის შეცვლა, მოკვლა, ან გაძევება ხდება. ამ შემთხვევაში უფრო რეალისტური ხდება დასავლეთთან საერთო ენის გამონახვა, უსისხლო კაპიტულაცია, ჩინეთიდან დასავლეთისკენ ნახტომი და ა.შ. ასე თუ განვითარდა მოვლენები, საქართველოს სრული დეოკუპაციაც რეალური ხდება.

წაიკითხეთ ასევე:

ტეგები თემაზე:

პრიგოჟინის ამბოხი