"ნებისმიერ დროს ელოდებიან მოსკოვზე "ვაგნერის" იერიშს... პრიგოჟინს იმაზე ცოტა წინააღმდეგობა ხვდება, ვიდრე მოსალოდნელი იყო" - მძიმე ღამე რუსეთისთვის: რა ხდებოდა მოვლენების ეპიცენტრში?
კერძო სამხედრო კომპანია "ვაგნერის" დამფუძნებელმა, ევგენი პრიგოჟინმა რუსეთის თავდაცვის სამინისტრო მისი სამხედრო ქვედანაყოფის ბანაკებზე სარაკეტო თავდასხმაში დაადაანაშაულა, რასაც წუხელ რიგი პროცესები მოჰყვა რუსეთში. პრიგოჟინმა შურისძიება დაანონსა, რის შემდეგაც მოსკოვში ყველა მნიშვნელოვანი ობიექტები, სახელმწიფო დაწესებულებები და სატრანსპორტო ინფრასტრუქტურა გაძლიერებულ დაცვის კონტროლზე გადავიდა. ქუჩებში გამოვიდნენ "ომონისა" და "სობრის" სპეცდანიშნულების რაზმები. ასევე "ვაგნერის” ლიდერის ევგენი პრიგოჟინის განცხადებების შემდეგ, ჯავშანტექნიკა გამოჩნდა როსტოვის ქუჩებში და ადგილზე გეგმა “ციხესიმაგრე” გამოცხადდა.
ასევე ცოტა ხნის წინ გაავრცელა ახალი მიმართვა პრიგოჟინმა და თქვა, რომ უკვე როსტოვში შევიდა და "ყველაფერს გაანადგურებს, ვინც წინ დაუდგება". (წაიკითხეთ: "როსტოვში შევდივართ... თუ ვინმე წინ დაგვიდგება, ყველაფერს გავანადგურებთ" - პრიგოჟინი)
წუხანდელ მოვლენებს სოციალურ ქსელში ეხმაურება საერთაშორისო ურთიერთობების სპეციალისტი, ჯიპას პროფესორი გიორგი კობერიძე:
"წუხანდელი ღამის ძალიან მოკლე შეჯამება:
- პრიგოჟინის ძალებმა რუსეთ-უკრაინის საზღვარი დაუბრკოლებლად გაიარეს. მესაზღვრეები არ ჩაერივნენ შიდა დაპირისპირებაში.
- "ვაგნერი" როსტოვში შევიდა და სამხედრო და ადმინისტრაციული შენობების ნაწილი დაიკავა (ზუსტად რომელი არაა ცნობილი). ქალაქისა და რაიონის მნიშვნელოვანი ნაწილი მის კონტროლქვეშაა;
- რუსულმა შვეულმფრენებმა "ვაგნერის" კოლონაზე იერიშის მიტანა სცადა; დაუდასტურებელი ინფორმაციით რუსული შვეულმფრენები (საუბარია 2-3 მათგანზე) ჩამოგდებულ იქნა "ვაგნერელთა" მიერ.
- როსტოვის ოლქის სხვა რამდენიმე ქალაქი აგრეთვე "ვაგნერმა" დაიკავა; აიღო პოლიციის შენობები და იარაღის საწყობები.
- შეტაკებების ხმა ისმის ვორონეჟის ოლქშიც - საუბარია რამდენიმე ადგილზე - მათ შორის ქალაქის მისადგომებთან. სროლები იყო ქალაქ პავლოვკსშიც. სხვა დეტალები არაა ცნობილი.
- ამასობაში რუსულმა ავიაციამ დაიწყო რუსეთში ინტენსიური ფრენა;
- მიუხედავად ასეთი მდგომარეობისა რუსებმა უკრაინის მიმართულებით ათობით ფრთოსანი რაკეტა ისროლეს. დაიბომბა კიევი და დნიპრო;
- "ვაგნერი" არმიას მხარდაჭერისაკენ მოუწოდებს.
- მოსკოვის შესასვლელები გადაკეტილია. განსაკუთრებით სამხრეთიდან. ნებისმიერ დროს ელოდებიან "ვაგნერის" ქალაქზე იერიშს.
- მთელი ღამე იბომბებოდა ბელგოროდის ოლქი. ვინ ბომბავდა მას - უცნობია.
- ვრცელდება პრიგოჟინის მიმართვა - ის ამბობს, რომ ჯარი, როსგვარდიის ნაწილი და პოლიციის მნიშვნელოვანი ძალები მის მხარეს არიან გადმოსულიო. ცხადია ეს ბოლომდე დამაჯერებელი ინფორმაცია ვერ იქნება, მაგრამ იმაზე ცოტა წინააღმდეგობა რომ ხვდება "ვაგნერს" ვიდრე მოსალოდნელი იყო - ეს ნათელია.
ზოგადი შეჯამება:
არ გამორიცხოთ, "ვაგნერის" სტრატეგია უკრაინისაკენ მიმავალი რუსული არტერიების გადაჭრა და უკრაინაში მყოფ რუსულ არმიაზე კონტროლის მოპოვება იყოს. როგორც ჩანს პრიგოჟინი მობილიზებული ნაწილების აყოლიებასაც შეეცდება, რაც რაოდენობრივად დიდი ძალაა.".
წაიკითხეთ ასევე:
- "90-იანების შემდეგ პირველად გავიგონე ტანკების გუგუნი მოსკოვის ქუჩებში... ვიღას ახსოვს უკრაინა" - რუსეთი პანიკამ მოიცვა: რას ამბობენ ადგილობრივები?
- "არ არის გამორიცხული, ამ ამბის ფონზე პრიგოჟინის დაკავება ან მოკვლა სცადოს შოიგუ-გერასიმოვის კლანმა" - რა ხდება და რა პროცესები შეიძლება განვითარდეს რუსეთში?