პატარა ქვეყნის გულუხვი დახმარება - ლატვია უკრაინას, "სტინგერების" შემდეგ, თავის ყველა სამხედრო ვერტმფრენსაც გადასცემს
ლატვიის პრემიერ-მინისტრის, კრიშიანის კარინშას განცხადებით, მისი ქვეყანა ყველა სამხედრო ვერტმფრენს, რაც აქვთ, უკრაინას გადასცემს. პრემიერმა ამის შესახებ უკრაინის რეკონსტრუქციის შესახებ ლონდონში მიმდინარე საერთაშორისო კონფერენციაზე განაცხადა.
კარინშას არ დაუკონკრეტებია თუ რამდენ ვერტმფრენზეა საუბარი.
მისივე თქმით, რიგის სამხედრო დახმარება უკრაინაში შეადგენს ლატვიის მთლიანი შიდა პროდუქტის 1%-ს და მოიცავს "სტინგერის" ტიპის სარაკეტო სისტემასაც. საუბარია რვა "სტინგერზე".
ასევე ცნობილია, რომ ლატვია უკრაინას აწვდის მცირე იარაღს და საბრძოლო მასალებს. გარდა ამისა, ქვეყანა აქტიურად მონაწილეობს უკრაინელი სამხედროების წვრთნაში.