ზაალ დუგლაძე საქართველოს X მოწვევის პარლამენტის წევრად 2020 წელს, "ქართული ოცნება - დემოკრატიული საქართველოდან“ მაჟორიტარული წესით აირჩიეს. ის საკანონმდებლო ორგანოში ხაშურსა და ქარელს წარმოადგენს და პოლიტიკაში ბიზნესიდან მოვიდა. ზაალ დუგლაძე 1971 წლის 14 თებერვალს დაიბადა და დაასრულა საქართველოს აგრარული უნივერსიტეტი, მეღვინეობის სპეციალობით.
ოფიციალური ბიოგრაფიის თანახმად, 1995-2004 წლებში ის სს "ვაზიანში" მთავარ ტექნოლოგად მუშაობდა; 2005-2012 წლებში შპს "დუგლაძეების ღვინის კომპანიის დამფუძნებელია; 2013-2020 წლებში კი შპს "დუგლაძეების ღვინის კომპანიის" გენერალური დირექტორი.
2023 წლის მაისში "საერთაშორისო გამჭვირვალობამ“ გამოაქვეყნა დოკუმენტი, რომლის მიხედვითაც პარლამენტარი ზაალ დუგლაძე სახელმწიფო აგროკრედიტის პროგრამის ერთ-ერთი უმსხვილესი ბენეფიციარია.
ხაშურისა და ქარელის მაჟორიტარ დეპუტატთან დაკავშირებულმა ოთხმა კომპანიამ, სახელმწიფო აგროკრედიტის პროგრამის ფარგლებში ჯამში 8,562,573 ლარი მიიღო 2013-2022 წლებში. "კომპანიებში ზაალ დუგლაძესთან ერთად საკუთარი ბიზნესინტერესები გააჩნია ბიძინა ივანიშვილის ძმას, ალექსანდრე ივანიშვილს", - წერია დოკუმენტში.
შეღავათიანი აგროკრედიტის პროგრამის ბენეფიციარია დუგლაძეების ღვინის კომპანია, რომელმაც პროგრამით, ყველა სხვა ფიზიკურ თუ იურიდიულ პირზე უფრო ხშირად, ჯამში 45-ჯერ ისარგებლა და იაფი ფინანსური რესურსის სახით 4,335,895 ლარი მიიღო.
დუგლაძეების ღვინის კომპანიას ეკუთვნის ასევე შპს ვარციხის კონიაკის ქარხანა, რომელმაც აგროკრედიტის პროგრამით ჯამში 83,086 ლარი მიიღო. დუგლაძეების კომპანიას რამდენიმე მეწილე ჰყავს, მათ შორის, ბიძინა ივანიშვილის ძმა, ალექსანდრე ივანიშვილი.
ზაალ დუგლაძესთან დაკავშირებულმა სს კოტეხი-გურჯაანის ღვინის ქარხანამ პროგრამით 29-ჯერ ისარგებლა და 3,899,176 ლარი მიიღო. კომპანიის სამეთვალყურეო საბჭოს თავმჯდომარეა ზაალ დუგლაძის ძმა, დავით დუგლაძე, წევრები კი ზაალ დუგლაძის მეუღლე - ეკატერინე დუგლაძე და ბიძინა ივანიშვილის ძმა - ალექსანდრე ივანიშვილი არიან.
ძმები დუგლაძეები და ალექსანდრე ივანიშვილი, პარტია "ქართულ ოცნების“ მსხვილი შემომწირველები არიან. ზაალ დუგლაძემ პარტიას ჯამში 115,000 ლარი შესწირა, დავით დუგლაძემ - 162,000 ლარი, ხოლო ალექსანდრე ივანიშვილმა - 260,768 ლარი.
მას შემდეგ, რაც ზაალ დუგლაძე პარლამენტის წევრი გახდა, კომპანიებში საკუთარი წილი მართვის უფლებით მის ძმას, დავით დუგლაძეს გადასცა.
დეპუტატმა დუგლაძემ ბოლოს ქონებრივი დეკლარაცია 2023 წლის მარტში შეავსო. ოჯახის წევრებიდან დოკუმენტში შეყვანილი ჰყავს მეუღლე, ეკატერინე დუგლაძე და 2004 წელს დაბადებული შვილი ელისაბედ დუგლაძე. უფროსი ქალიშვილი მარიამ დუგლაძე გასული წლის სექტემბერში დაოჯახდა. გრანდიოზული ქორწილი კახეთში გადაიხადეს.
მარიამ დუგლაძისა და ნიკოლოზ კიკნაძის წყვილმა ჯვარი თბილისში, ქაშვეთის ეკლესიაში დაიწერა, ქორწილი კი ყვარელში, ლოპოტას ტბაზე გადაიხადეს. საღამოს უამრავი ადამიანი სტუმრობდა, მათ შორის პარლამენტარი ვიქტორ სანიკიძე მეუღლესთან ერთად… ნეფის მეგობრები აღმოჩნდნენ: ნინო ბურჯანაძის ვაჟები, ანზორიკო და რეზიკო ბიწაძეები.
დეკლარაციის მიხედვით, ეკატერინე დუგლაძემ 2016 წელს 176 000 ლარად მიწის ნაკვეთი დუშეთის მუნიციპალიტეტის სოფელ კაიშაურში შეიძინა.
2017 წელს თბილისში, მუხის ქუჩაზე ეკატერინე დუგლაძემ 1 428 120 ლარად შენობა-ნაგებობები იყიდა, რომლის საერთო ფართიც 1500 კვ.მ-ზე მეტია.
მასვე 2022 წელს თბილისში, ონიაშვილის ქუჩაზე 198,32 კვ.მ სახლი აჩუქეს.
ზაალ დუგლაძემ 2014 წელს 5000 კვ.მ მიწის ნაკვეთი ყვარლის რაიონის სოფელ კუჭატანში 3000 დოლარად შეიძინა. კიდევ ერთ 4313 კვ. მ ფართობ ნაკვეთში, იგივე კუჭატანში დულაძემ 2587 დოლარი გადაიხადა. იმავე წელს ყვარლის რაიონ სოფელ სანავარდოში 9800 კვ. მ და 4600 კვ. მ მიწის ნაკვეთებს დეპუტატი 5880 და 2595 დოლარად ყიდულობს.
ეკატერინე დუგლაძის მფლობელობაშია მსუბუქი ავტომანქანა MERCEDES GLE, რომელშიც 2021 წელს 250 000 ლარი გადაიხადა.
დეკლარაციის შევსებისას დეპუტატს "ქართუ ბანკის“ სახელფასო ანგარიშზე 1801 ლარი ერიცხებოდა, მიმდინარე ანგარიშზე 506 000,01 დოლარი. "საქართველოს ბანკის" საბარათე ანგარიშზე - 797 დოლარი, მიმდინარე ანგარიშზე - 16 ათასი დოლარი.
ზაალ დუგლაძეს დანაზოგის სახით აქვს 20 000 დოლარი და 110 000 ლარი.
დეპუტატი შპს დუგლაძეების ღვინის კომპანია საქართველოს 25,68% მეწილეა - მალხაზ ყანჩაველთან, დავით დუგლაძესა და ალექსანდრე ივანიშვილთან ერთად, საიდანაც შემოსავლის სახით 521 416,54 ლარი მიიღო.
ის ასევე სს ვაზიანის აქციონერია, საიდანაც შემოსავლის სახით 2022 წელს 26 576,99 ლარი მიიღო. დეპუტატის ხელფასის სახით კი ერთი წლის განმავლობაში 44 240,63 ლარი ჩაერიცხა.
ზაალ დუგლაძემ 2016 წელს "თიბისი" ბანკიდან იპოთეკური სესხი, 400 000 დოლარი აიღო, რომლის გადახდასაც 2037 წელს დაასრულებს. ამ ეტაპზე გასავლის სახით 32 688,35 დოლარი აქვს მითითებული.
დეპუტატის სახელზეა კიდევ ერთი იპოთეკური სესხი, 41 000 დოლარის ოდენობით, რომელიც 2017 წელს 20 წლის ვადით აიღო. ამ ეტაპზე გადახდილი აქვს 4227,49 დოლარი.
დუგლაძის სახელზეა კიდევ ორი იპოთეკური სესხი, 75 000 ევრო, რომელიც 2018 წელს, ათი წლის ვადით აიღო და 65 000 დოლარი, რომელიც 2017 წელს, ასევე ათი წლის ვადით აიღო.
გარდა იპოთეკური სესხებისა დუგლაძე კიდევ ერთ სამომხმარებლო სესხს იხდის, რომელიც 2017 წელს ათი წლის ვადით აიღო. 55 000 დოლარიდან ამ ეტაპზე დაფარული აქვს 5256,8 დოლარი.
იხილეთ ასევე: