გერმანელ ქალს, რომელიც იეზიდ გოგონას ისე ექცეოდა, როგორც მონას, პატიმრობა მიესაჯა - რა დაადგინა სასამართლომ

გერმანელ ქალს, რომელიც "ისლამური სახელმწიფოს" წევრია, იეზიდ ქალზე ძალადობის ბრალდებით, 9 წლით თავისუფლების აღკვეთა მიესაჯა. მას ასევე ბრალად ედება კაცობრიობის წინააღმდეგ ჩადენილი დანაშაული და უცხოური ტერორისტული ორგანიზაციის წევრობა.

სასამართლომ დაადგინა, რომ გერმანელი ქალი, ქმართან ერთად, სამი წლის განმავლობაში, იეზიდ ქალზე სისტემატურად ძალადობდა და მას ისე ექცეოდა, როგორც მონას.

სასამართლოს თანახმად, გერმანელი ქალის ქმარი, 37 წლის მამაკაცი ახალგაზრდა იეზიდ ქალზე სამი წლის განმავლობაში სისტემატურად ძალადობდა. ამ პერიოდში ისინი სირიასა და ერაყში ცხოვრობდნენ. სასამართლომ დაადგინა, რომ ქალი ახალისებდა ქმრის ქმედებებს - გაეუპატიურებინა და ეცემა იეზიდი ქალი. ხოლო თვითონ სახლისა და სხვა საქმეების გაკეთებას აიძულებდა.

"ეს ყველაფერი ემსახურებოდა "ისლამური სახელმწიფოს“ დეკლარირებულ მიზანს - იეზიდური რწმენის მოსპობას“, - განაცხადა პროკურორმა სასამართლო პროცესზე.

მცირე ისტორიული რაკურსი:

• 2014 წელს "ისლამური სახელმწიფოს" მებრძოლები ჩრდილოეთ ერაყში იეზიდ ხალხს თავს დაესხნენ. იეზიდები სინჯარის მთაზე გაიქცნენ. ბევრი მათგანი მოკლეს, ხოლო დაახლოებით, 7000 ქალი და გოგონა შეიპყრეს და მონებად წაიყვანეს. მათ შორის იყო ახალგაზრდა ქალი, რომელსაც როგორც პროკურორებმა განაცხადეს, ბრალდებული, სახელად ნადინ კ, და მისი ქმარი, მონად იყენებდნენ 2016 წლიდან. იეზიდი ქალი იმ დროს 20 წლის იყო.

2019 წლის მარტში ნადინ კ და მისი ქმარი ქურთულ ძალებს სირიაში ტყვედ ჩაუვარდა. 2021 წელს კი ქალის გერმანიაში ექსტრადირება განხორციელდა.

სასამართლო პროცესის დროს ბრალდებულმა უარყო იეზიდი ქალის იძულება, მაგრამ თქვა, რომ "მისთვის მეტი უნდა გაეკეთებინა".

ერთი წლის წინ, გერმანიის სასამართლომ "ისლამური სახელმწიფოს" მიერ იეზიდი ხალხის წინააღმდეგ ჩადენილი დანაშაული გენოციდად აღიარა.