"ყველაფრის მკურნალობას იბრალებენ, ვითომ კურნავენ ეპილეფსიას, სახსრებს, ცერებრალურ დამბლას და ა.შ.“ -  პაციენტები კლინიკას და მის დამფუძნებელს უჩივიან - რას აცხადებს თენგიზ ტყებუჩავა, რომელსაც თაღლითობაში ადანაშაულებენ

"რეგმედ გეორგია" - რეგენერაციული მედიცინის ამერიკული ცენტრი საქართველოში ორი წლის წინ გაიხსნა და პაციენტებს რეგენერაციული აგენტებით მკურნალობას სთავაზობს. ამ კლინიკაზე ტელევიზით ბევრი რეკლამა გავიდა, საზოგადოებამ სწორედ ამ გზით გაიგო ასეთი კლინიკის არსებობა. დაავადებების ჩამონათვალი იმდენად ბევრია და ისეთი იმედისმომცემია ექიმის ინტერვიუები, სულ არ არის გასაკვირი, ამ სიახლით ბევრი ადამიანი რომ დაინტერესდა.

"რეგენერაციული ბიოპრეპარატებით მკურნალობის სერვისის უზრუნველმყოფი რეგენერაციული მედიცინის ამერიკული ცენტრი უკვე საქართველოშია. კლინიკა რეგმედი ახლახან დაარსდა და უკვე არაერთი პაციენტის ნდობა დაიმსახურა. კლინიკის დამფუძნებელია დოქტორ თენგიზ ტყებუჩავა, რომელსაც მისმა საერთაშორისო გამოცდილებამ, თერაპიის ახალმა მიდგომამ და ტექნოლოგიების გამოგონებებმა გადააწყვეტინეს დაბრუნებულიყო ამერიკიდან სამშობლოში და განევითარებინა მსოფლიო დონის რეგენერაციული ცენტრი. მის მიერ ამერიკაში დაპატენტებული გამოგონებები თერაპიის ახალი ხედვის გათვალისწინებით, სასურველ შედეგებამდე მისვლის საუკეთესო საშუალებას იძლევა", - ვკითხულობთ ამ კლინიკის ოფიციალურ ვებგვერდზე და იქ ისეა აღწერილი ყველაფერი, მართლა ნებისმიერს, ვისაც აქვს ჯანმრთელობის პრობლემა, იქ მისვლის სურვილი გაუჩნდება.

მართალია ბატონი თენგიზ ტყებუჩავა ამბობს, რომ მას უამრავი მადლიერი პაციენტი ჰყავს, თუმცა ჩვენამდე უკმაყოფილო ადამიანები მოვიდნენ, რომლებიც მის წინააღმდეგ საქმის აღძვრას ითხოვენ და უკვე მიმართეს კიდეც პროკურატურას, პოლიციას, ჯანდაცვას.

63 წლის მერი პეტრიაშვილი:

"2010 წელს გაფანტული სკლეროზის დიაგნოზი დამისვეს. გამწვავება არ მქონდა, მაგრამ თუ რაიმეს გავიგებდი, ყველაფერს ვიკეთებდი, პროცესი რომ შემეჩერებინა და როგორღაც დამეღწია თავი ამ დაავადებისგან. ტელევიზიით გავიდა რეკლამა ამ კლინიკაზე და ძალიან დამაინტერესა. ჯერ ტელეფონით გავესაუბრე თენგიზ ტყებუჩავას. ვუთხარი, თუ გარანტიას ვერ მომცემთ, არაფერი გამიკეთოთ-მეთქი. მიპასუხა, - აქ ჩემთან ყველა ავადმყოფი მოდის და სასწაული შედეგები მაქვს. განუკურნებელი დაავადება არ არსებობსო, დამპირდა, რომ მომარჩენდა. ჩამწერა კონსულტაციაზე. 70 ლარი გადავიხადე კონსულტაციაში. რაღაც დოკუმენტზე ხელი მომაწერინა, რომ არ ედავები, რამე რომ მოგივიდეს. ამაზე ჩემს შვილსაც მოაწერინა ხელი და პროცედურისთვის მზადება დაიწყო. მაშინაც კიდევ ერთხელ ვუთხარი, ყველაფერი გაკეთებული მაქვს, მეზოთერაპიაც კი, არ მაქვს შედეგი და თუ არ ხარ დარწმუნებული, რომ შედეგი მექნება, ტყუილად არ მაწვალო-მეთქი. არა, ეს სულ სხვა რამეა, განსაკურნებელი კოქტეილები უნდა შევიყვანო ორგანიზმშიო. დიდი იმედები მომცა. ოღონდ ამ დაავადებას თავი დავაღწიო, გადავრჩე, სახლ-კარსაც გავყიდი და ხიდის ქვეშ ვიცხოვრებ-მეთქი. დამპირდა, რომ განმკურნავდა. ამის შემდეგ დაიწყო ისეთი პროცედურა, როგორც სისხლის გაფილტვრის დროს აკეთებენ. ერთი მხრიდან გამოჰქონდა სისხლი, მეორედან შეყავდა, დამატებით რაღაცეებს ურევდა სისხლში. ისეთი პროცედურები მიდის, განიკურნებიო... მალევე მივხვდი, რომ არაპროფესიონალები იყვნენ, მაგრამ იმდენად მინდოდა შედეგი მქონოდა, დავუჯერე და გავიკეთე. ამ პროცედურაში 3100 ლარი გადავიხადე, პლუს 70 ლარი - კონსულტაციაში. პროცედურის დასრულების შემდეგ შვილმა სახლში წამომიყვანა. 3-4 დღე თითქოს უკეთესად ვიყავი, ადვილად ვდგებოდი, პრედნიზოლონს რომ გაგიკეთებენ და ცოტა უკეთ ხარ, დაახლოებით ასე ვიყავი. გამიხარდა, ველოდი უკეთესად გავხდებოდი, მაგრამ 4 დღის შემდეგ უცებ ცუდად გავხდი, დავურეკე, მითხრა, - არა უშავს, ცოტა დრო სჭირდება მოქმედებასო. ერთი თვის განმავლობაში ვურეკავდი და ვეუბნებოდი, რომ ცუდად ვიყავი, თვითონ მეუბნებოდა, - ცოტა ხანი დაელოდეო. რაც დრო გადიოდა, ვხედავდი მდგომარეობა უარესდებოდა. ადრე თუ კედლებს მივყვებოდი, ახლა უკვე ვეღარც მისი დახმარებით ვმოძრაობდი, მარცხენა ხელი საერთოდ წამერთვა. ძალიან ცუდად იმოქმედა ჩემზე, იმის მერე სულ საწოლში ვწევარ და დამხმარეს გარეშე ვეღარც ვდგები. სკამზე ხელით მსვამენ. ეს ყველაფერი რომ მოვუყევი, - მითხრა, შენ კიდევ უნდა მოსულიყავი, ბოლომდე არ მიგიყვანია მკურნალობაო, აქეთ მლანძღავდა. 3100 ლარი რომ გადაიხადე, იქიდან არაფერი დამრჩენია, 5000 ლარი უნდა გადაგეხადა, კიდევ უნდა გაგეკეთებინა, მარტო საძირკველი გაიკეთეო. ვერაფერი გავაგებინე, ტელეფონი გამითიშა, - კლიენტები მყავსო. მერეც ვურეკავდი თენგიზ ტყებუჩავას და უკვე ვითხოვდი გადახდილი თანხის უკან დაბრუნებას, რადგან გამიუარესდა მდგომარეობა. ასეთი ბოროტი როგორ უნდა იყო, რომ ასეთ ადამიანებს ფული გამოსძალო. თვითონ ხომ არ აქვს ავადმყოფს სამკურნალო ფული, მან უნდა მოიძიოს, ასე წვალებით ნაგროვებ თანხას რომ ართმევ და საქმე უარესობისკენ მიგყავს, ეს სისხლის სამართლის დანაშაულია. ამ დანაშაულისთვის მან პასუხი უნდა აგოს, რომ სხვა ადამიანები არ დაზარალდნენ. იმდენი რამე მაქვს ამ დიაგნოზზე წაკითხული და როგორ ვენდე... ეს კაცი მიმტკიცებდა, რომ 100% - იანად გამომაჯანმრთელებდა. მერე როცა ფაქტის წინაშე დადგა და ისევ დავუწყე მოთხოვნა შედეგის, უკვე მითხრა, 69%-იანი შედეგები მაქვსო, ეს იმიტომ, რომ ეთქვა, ამ პროცენტში არ მოხვდიო.

თავიდან რომ მითხრა განგკურნავო, მაშინ ისიც კი ვუთხარი, თუ განმკურნავთ, ამ დიაგნოზით ვინც არის, ყველა თქვენთან მოვა-მეთქი. ჯგუფი გვაქვს სოციალურ ქსელში შექმნილი ამ დიაგნოზის მქონე ადამიანებს და ისინი ჩემი მკურნალობის შედეგს მართლა ელოდებოდნენ. მინდა ყველას ვუთხრა, არ მივიდნენ ამ ადამიანთან და კიდევ უფრო მეტად არ გაირთულონ ჯანმრთელობა".

ჩვენი მეორე რესპოდენტი სოფოა, პროფესიით ექიმი, მან ამ კლინიკაში დედა მიიყვანა და ამბობს, რომ პროცედურიდან მალე ისე გაურთულდა მდგომარეობა, რომ დედა გარდაიცვალა:

"დედაჩემი, გულნარი აპრესაშვილი პედიატრი გახლდათ. გურჯაანში მთელი ცხოვრება ექიმად მუშაობდა. 5-6 სოფელს ემსახურებოდა. სახსრების პრობლემები ჰქონდა, ძირითადად მუხლის სახსრები აწუხებდა და ვემზადებოდით ენდოპროტეზირებისთვის, რადგან მისთვის მისაღები სახსარი არ იყო საქართველოში და ის უნდა გამოგვეწერა, ოპერაციულმა ჩარევამ დროში გადაიწია. ამ დროს მოვისმინეთ რეკლამა ამ კლინიკაზე და გადავწყვიტეთ დროებითი მანიპულაციის ჩატარება, რაღაც შეღავათი რომ ყოფილიყო. დედას ტყებუჩავამ გაუკეთა სახსარშიდა ინექცია პლაზმასთან ერთად. შეუყვანეს რაღაც ნივთიერება, რომელიც დღემდე არ ვიცით რა იყო, კონკრეტულად ამან გამოიწვია დამბლა, პარეზი, ჯერ ქვედა კიდურების და მერე მთლიანად სხეული პარალიზდა. 19 იანვარს გაკეთდა ეს მანიპულაცია და 15 მარტს დედა კლინიკაში გარდაიცვალა, ფაქტობრივად, ადამიანი უმოძრაო გახადა, მივიღეთ ის, რომ ჯერ შეგუბებითი პროცესები წავიდა და განვითარდა დამბლა. მედიცინის მუშაკი ვარ, დედა ექიმი იყო და გვეგონა სახსარშიდა ინექცია ისეთ აგრესიულ რამეს არ გამოიწვევდა, ამიტომ მიიღო გადაწყვეტილება ოპერაციამდე დედამ, ეს გზა ეცადა.

- რამდენიმე პროცედურა ჩაუტარდა?

- ეს ნემსი ერთჯერადად გაუკეთდა. მივედით მასთან გამოკვლევებით, დასკვნებით, საერთოდ არ მოუთხოვია კვლევები. არც პაციენტს შეხებია, რომ გაესინჯა. პედიატრი ვარ და როცა პაციენტი მოდის, მდგომარეობის შეფასება ხდება, ასეთი რამ არ გაუკეთებია, მხოლოდ ის თქვა, მაქვს დიდი გამოცდილება, მიწევს ამერიკაში წასვლა-ჩამოსვლა, იქ ძალიან აპრობირებული მეთოდია - ღეროვანი უჯრედების ანალოგი ნივთიერება შემყავს, იმან უნდა აღადგინოს ხრტილოვანი ქსოვილი, დასველდეს სახსარშიდა ჩანთა და უნდა მოხდეს რეგენერაციული პროცესებიო. ისიც გვითხრა, 2 კვირამდე იქნებოდა კრიტიკული პროცესი და მერე დალაგდებოდა ყველაფერი. ამ პროცედურიდან ზუსტად 6 კვირის თავზე დედა გარდაიცვალა.

- კლინიკაშიც გადაიყვანეთ?

- რომ გართულდა მდგომარეობა, ვრეკავდი მასთან, მაგრამ კლინიკის ნომერზე რეგისტრატორი გვაკავშირებდა მენეჯერს. მენეჯერი არ იყო მედიცინის მუშაკი. ვერ ვიღებდი მისგან პასუხს, თუ რა ნივთიერება შეუყვანეს დედას... ეს ექიმებსაც აინტერესებდათ, იქნებ იმის ანტიდოტი გაგვეკეთებინა, რომ შეემსუბუქებინა მდგომარეობა. სხვანაირად მაინც მიგვეხედა ამ აგრესიული ტკივილისთვის, რომელსაც მორფის საშუალებითაც ვერ უყუჩებდნენ. ვრეკავდით ოჯახის წევრები კლინიკაში, არავის ჰქონდა პასუხი თუ რა გაუკეთეს დედას. გვეუბნებოდნენ, - ექიმი არ არის ადგილზე და ჩვენ არ ვიცით, რა ნივთიერება გაააკეთა, ჩვენ უბრალოდ დამხმარეები ვართო. ექიმები გაოგნებულები იყვნენ, ასეთი გაუსაძლისი ტკივილები რას უნდა გამოეწვია, ვერ დაადგინეს. დედის გარდაცვალების შემდეგ არ გავსულვართ მათთან კონტაქტზე, ამის ძალა არ გვქონდა. გარდაცვალების დროს მოვითხოვეთ სამედიცინო ექსპერტიზა ჩაეტარებინათ, არ ვიცით, რა დასკვნა დაიდება, ფაქტია, ინექციის გაკეთებიდან მალევე სრულად პარალიზდა, მივიღეთ აგრესიული თრომბოზური ცვლილებები ორგანიზმში, მაგისტრალური სისხლძაღვის ფილტვის ან კორონარის თრომბოზმა გამოიწვია მისი გარდაცვალება. ადამიანი კანზე ხელის შეხებასაც ვერ იტანდა, ისეთი ტკივილები ჰქონდა. საერთოდ არ შეეძლო გადაადგილება მილიმეტრითაც კი, ბოლოს უკვე საწოლში პოზიციის შეცვლასაც ვერ ახერხებდა. ჩვენ არ ვამბობთ, რომ ვინმემ ძალით გაგვაკეთებინა ეს პროცედურა, მაგრამ ვსაუბრობთ უმძიმეს შედეგზე, რომელმაც გამოიწვია ადამიანის გარდაცვალება.

თვითონ ტყებუჩავა ამბობდა, ამ მანიპულაციას არანაირი რისკი არ აქვს - ეს არის პლაზმა, რომელიც უნდა გამოვყო სისხლისგან, უბრალოდ, დავამატებ ნივთიერებას, რომელიც უფრო გააძლიერებს სახსრების მუშაობას, დაძრავს ახალ რეგენერაციულ პროცესებს მუხლის სახსარშიო... ამის შემდეგ მდგომარეობის გაუმჯობესების ნაცვლად, დედა 15 მარტს გარდაიცვალა.

ექიმები ამბობდნენ, ასე პარალიზებული პაციენტი ინსულტის შედგომაც კი არ გვინახავს, ასეთი აგრესიული ტკივილითო.... დედა ცოცხალი აღარ არის, ვინ აგებს ამაზე პასუხს? მას რატომ აქვს ამდენი უფლება, რომ ასეთი ექსპერიმენტები ატაროს ადამიანებზე? ვინმემ უნდა აუკრძალოს საქმიანობა... 3000 ლარი გადავიხადეთ ამ პროცედურაში, 2000 ლარი ადგილზე იმ დღეს და 1000 ლარი მეორე დღეს ინტერნეტბანკით გადავრიცხე მათ ანგარიშზე. გავიგე, რომ სხვა დაზარალებულებიც არიან და მათ უკვე იჩივლეს პროკურატურაში. რა შედეგი ექნება ამ ჩივილს, დაისჯება ვინმე ამ დანაშაულებისთვის თუ არა, არ ვიცი. მეეჭვება რამე შედეგი მოყვეს. თუკი შესაბამისი სამსახურები დაინტერესდებიან, მე ხელთ მაქვს დედის გარდაცვალების ცნობაც და ყველა ის დოკუმენტი..."

კიდევ ერთი დაზარალებული ავთანდილ გელოვანია. მასაც სახსრების პრობლემები აწუხებდა და ამიტომ მივიდა კლინიკაში. ისიც უჩივის ექიმ თენგიზ ტყებუჩავას.

- მე მქონდა კოქსათროზი მარჯვენა ფეხზე, ოპერაცია უნდა გამეკეთებინა, მაგრამ ტელევიზით ვნახე ეს კაცი რეკლამას აკეთებდა, ისე დამაჯერებლად საუბრობდა, მივედი მასთან. მითხრა, რომ მოარჩინა ვიღაც ქალი, რომელიც დღეში 2 კილომეტრს გადის და ჩემი ძალიან მადლობელიაო. იმ დღეს 70 ლარი გამომართვეს კონსულტაციაში, არც ჩეკი მოუციათ და არც არავის გაუტარებია ეს ვიზიტი. მეორე პროცედურაზე დამიბარა. 9 სექტემბერს ვიყავი პირველად და 12 სექტემბერს გამიკეთეს პროცედურა, არავითარი შედეგი არ მქონდა, რომ დავურეკე, - 10 დღე დაელოდეო, მერე ერთი თვეო. პროცედურაში 2700 ლარი გადამახდევინა. ვთხოვდი პასუხს, ამბობდა, ახლა ჩემი ახლობელი ექიმი ჩამოვიდა ამერიკიდან, ის რაღაც ახალი მეთოდით გააკეთებს და რადგან შენ ვერ მიიღე შედეგი, უფასოდ გაგიკეთებ მეორეჯერო. ამ კაცს შემახვედრა, ვიღაც ინდოელი წარმოშობის მამაკაცი იყო. ადრე გვერდიდან გამიკეთა პროცედურა, მეორედ წინა მხრიდან, ის კაცი იდგა და კარნახობდა, სად გაეკეთებინა. ტყებუჩავას ხელები უკანკალებდა და ისე მიკეთებდა. ველოდი შედეგს, მაგრამ პირიქით, ტკივილმა მოიმატა. სადაც ტკივილი არ მქონდა, იქაც დამეწყო საშინელი ტკივილები, - ამან არ გიშველა, კიდევ 3000 ლარი მომეცი და ღეროვან უჯრედებს შევიყვანო. მერე ისევ დავურეკე, მტკივა ძალიან და გამიკეთე ის ღეროვანი უჯრედები-მეთქი, მოდი, მაგრამ ახლა ამას 5000 დოლარი უნდაო. მასთან მიმოწერებიც შენახული მაქვს. პირად ნომერზე ვურეკავდი, გამაგებინე, ის კაცი როდის ჩამოდის ისევ-მეთქი. მერე აღარ იღებდა ტელეფონს, სხვამ მიპასუხა მის პირად ნომერზე, - მენეჯერი ვარ, რა პრობლემა გაქვსო. ვუთხარი საშინელი ტკივილები მაქვს-მეთქი, კიდევ მეგონა რამეს მიშველიდა. გადიოდა დრო, იმალებოდა. ამ ტკივილს ვეღარ ვუძლებდი. "ინოვაში" გადამიღეს თავიდან რედგენი, ნახეს ძვალი უფრო შიგნით იყო შესული და სასწრაფოდ საოპერაციო ხარო. ოპერაცია გამიკეთეს. ახლა ტკივილები არ მაქვს, მაგრამ თენგიზ ტყებუჩავამ ითაღლითა. მან პასუხი უნდა აგოს. სამი თვე მაწამა, თანხის დაბრუნებას ვითხოვდი, არ აბრუნებს, "ინოვაში" ოპერაციაში 11 000 ლარი გადავიხადე. იმას ვდარდობ, რომ შეიძლება სხვებიც გახდნენ მისი მსხვერპლი, ეს უნდა შევაჩეროთ. სოციალურ ქსელში მას კიდევ არეკლამებენ. დავწერე თაღლითია-მეთქი. იმდენი ადამიანი გამომეხმაურა მისგან დაზარალებულები, გაოგნებული დავრჩი. ფულის გამოძალვა უნდა და იმიტომ მლანძღავდაო, - გამივრცელა ცრუ ინფორმაცია...

რამდენიმე დაზარალებულმა შევიტანეთ პროკურატურაში საჩივარი, ასევე ფინანსურ პოლიციაშიც, რადგან არ ხდება ამ თანხების აღნუსხვაც. ჯანდაცვაში თვითონ პროკურატურამ გადაგზავნა მასალები, არ ვიცი რა შედეგი ექნება ამ ჩივილს, სასწრაფოდ რეაგირება უნდა მოხდეს. საქმის კურსშია ყველა უწყება და იძიებენ. მარტიდან გვაქვს საჩივარი შეტანილი. ერთი დაზარალებული ძალიან რომ მიაწვა და ეჩხუბა, 1000 ლარი უკან დაუბრუნა. აქ ყველაზე მთავარი ის არის, რომ ადამიანებს ჯანმრთელობა მეტად შეერყათ მისი თაღლითური ქმედებების გამო. იძახის თურმე, - შეიკრა ჩემს წინააღმდეგ ჯგუფი და ჩვენ დავუმტკიცებთ მათ, რომ მართლები ვართო. მაგათ საიტებზე ვეღარ შევდივართ, დაბლოკილები ვართ, რომ გავცეთ პასუხი და საზოგადოებამ გაიგოს სიმართლე. მე იმან მიშველა, მალევე გავიკეთე ოპერაცია და ძლიერ ანტიბიოტიკებს მიკეთებდნენ, ეტყობა მან ჩააქრო პროცესები, თორემ არავინ იცის, რა დამემართებოდა. ყველაფრის მკურნალობას იბრალებენ, წერენ რომ ვითომ კურნავსენ ეპილეფსიას, შაკიკს, სახსრებს, ცერებრალურ დამბლას და უთვალავ სხვა დაავადებას. ერთ გოგოს შაკიკი ჰქონდა და ამ პროცედურის შემდეგ ისეთი თავის ტკივილები აქვს, არაფერმა უშველა. ვითხოვთ სამართალდამცავებმა შეისწავლონ ამ კლინიკის საქმიანობა და აგებინონ მას თაღლითობისთვის პასუხი.

კიდევ ერთი დაზარალებული თინა გაბუნიაა:

- სხვების მსგავსად, მეც ტელევიზიით გავიგე ამ კლინიკის არსებობა. ჩავეწერე და მივედი კონსულტაციაზე, ეს იყო შარშან, ივლისის ბოლოს. დამარწმუნა 100%-ით, რომ მიშველიდა, მე ძვალი არ მიხორცდებოდა და ამის გამო მივედი, თორემ ტკივილები საერთოდ არ მქონდა. ახლა მტკივა საშინლად და ძვალი არ მაქვს საერთოდ, გააქრო. ყველას ერთი მეთოდით ვითომ მკურნალობს, სისხლს იღებს და მერე რაღაც ნივთიერებასთან ერთად ისევ შეყავს. მითხრა, ეს რეგენერაციული მკურნალობაა, რომელსაც უკუჩვენება არ აქვს, ძალიან შედეგიანია და მალე განიკურნებიო. ვენდე და გავიკეთე, სისხლი ამოიღო, იმაში რაღაც ჩაასხა და სადაც გადანერგილი მქონდა ძვალი, იმ ადგილას შემიყვანა, გარშემო 40 ნემსი გამიკეთა, იმდენი მჩხვლიტა, სულ სისხლი მდიოდა. 600 ლარი გადამახდევინა. ერთ რაღაცას თუ დავამატებ, კიდევ უკეთესი შედეგი იქნებაო და იმისთვის 400 ლარი დამამატებინა. მერე სხივების ოთახში შემიყვანა, ესეც ძალიან კარგი იქნებაო. ამაზეც დავთანხმდი, დამატებით 200 ლარის მომთხოვა, არ მქონდა ის 200 ლარი იმ წუთას და ვუთხარი, ოღონდ მომარჩინეთ და ეს 200 ლარი 2000 ლარად გადაგექცევა - მეთქი. თვენახევარში გადაიღე სურათი და შეხორცებული გექნებაო. აგვისტოში წავედი კოჯორში, დამეწყო ტკივილები, არადა, მანამდე ტკივილი არ მქონია, ვიფიქრე ხორცდება, პროცესები მიდის-მეთქი და მიხაროდა, რომ ჩამოვედი სექტემბერში, რედგენი გადავიღე, რედგენოლოგი მეუბნება, ძვალი არ არისო. წარმოიდგინეთ, როგორ შოკში ჩავვარდებოდი, გაოგნებულმა ვკითხე, რას ამბობთ-მეთქი, გამიმეორა იმ ადგილას ძვალი არ არისო, იქიდან მეორე კლინიკაში წავედი, თავიდან გადავამოწმე დასკვნა, იმანაც იგივე მითხრა. დავურეკე და რომ ვუთხარი, ძვალი არ მაქვს-მეთქი, გამითიშა ტელეფონი. მას მერე ვეღარ ვუკავშირდებოდი. ამის შემდეგ ასეთ ხერხს მივმართე, ჩავეწერე მასთან მიღებაზე სხვა სახელი და გვარით. მივედი დათქმულ დროს, რომ დამინახა მითხრა, - დრო არ მაქვს, პაციენტი მელოდებაო, ვუთხარი ის პაციენტი მე ვარ და უნდა დამელაპარაკო-მეთქი. ჩემი სურათი დავუდე, შეამოწმეთ-მეთქი, ამას უნდა დავხედო, კარგად უნდა გავარკვიო, ეს არის ისეთი მკურნალობა, რომელსაც უკუშედეგი არა აქვსო. არადა, კაცმა გადანერგილი ძვალი დამიშალა.

ჩემი ექიმიც ვერაფერს ამბობს, გაოგებულია. ეს ყველაფერი დავწერე სოციალურ ქსელში და ჩემნაირი დაზარალებულები მრავლად გამოჩნდნენ. ეს ადამიანი არის თაღლითი, სხვადასხვა დაავადების მქონე ადამიანებს სძალავს ფულს. ყველაზე ცუდი და მძიმე ის არის, რომ ის ვნებს ადამიანებს და რთულდება მათი ჯანმრთელობის მდგომარეობა. მე მაქვს 1000 ლარი გადახდილი, ჩემს მერე ვინც მივიდა, მათ 3500-4000 და ა.შ. ამასწინათ ისიც კი დაწერა, აუტისტური სპექტრის მქონე ბავშვებს და ცერებრალური დამბლით დაავადებულებს ვმკურნალობო, მათაც ეპატიჟება. დიდ თაღლითობასთან გვაქვს საქმე და ამ საქმეს სამართალდამცავების სასწრაფო რეაგირება სჭირდება.

6 ადამიანმა ვიჩივლეთ პროკურატურაში, ჯანდაცვის სამინისტროში, ფინანსთა სამინისტროში და ვითხოვთ გამოძიებას. ფინანსურმა პოლიციამ დაგვკითხა, როგორც ვიცი, მთავარმა პროკურატურამ გადააგზავნა ვაკის პროკურატურაში საქმე, დროული რეაგირებაა საჭირო, რადგან ამდენი დაზარალებულის მიუხედავად აგრძელებს უტიფრად მუშაობას".

ჩვენ ასევე დავუკავშირდით ბატონ თენგიზ ტყებუჩავას, ის ცილისწამებას უწოდებს ამ ადამიანებს მონათხრობს და ამბობს, რომ მას ბევრი მადლიერი პაციენტი ჰყავს:

- ეს არის ცილისმწამებლური განცხადებები, რაც ჩვენი კლინიკის შესახებ გარკვეული პირების მიერ ვრცელდება და მოვიდა თქვენს რედაქციამდე. ეს შანტაჟი და ყალბი ბრალდებები უმთავრესად ინსპირირებულია ზრახვებით, თავიდან აიცილონ კლინიკის წინაშე დავალიანების დაფარვა. იმისთვის, რომ შეწყდეს ასეთი ქმედებები და მომავალში არ განმეორდეს, მიმდინარეობს მოლაპარაკება იურისტებთან, რომ მოვთხოვოთ მათ გაყალბებული ფაქტების უარყოფა, საქმიანი რეპუტაციის შელახვით გამოწვეული ზიანის ანაზღაურება და დავალიანების დაფარვა. აღნიშნული პირების ქმედებები ასევე შეიცავს თაღლითობის და გამოძალვის ნიშნებს. შესაბამისად, მათი ქმედებების შესახებ სრულად იქნებიან ინფორმირებული შესაბამისი სამართალდამცავი ორგანოები. ასობით გამოჯანმრთელებული პაციენტი ადასტურებს ჩვენი მკურნალობის დადებით დინამიკას და ეფექტიანობას, რითაც მოხარულები ვართ.

- ბატონო თენგიზ, ეს ადამიანები ამბობენ, რომ არიან დაზარალებულები, თქვენი მანიპულაციის შემდეგ მათ გაურთულდათ ჯანმრთელობის მდგომარეობა და ითხოვენ გადახდილი თანხების უკან დაბრუნებას...

- ისინი კი არა, ჩვენ ვართ დაზარალებულები. ყველა მათგანი ვინც გვიჩივის, ჩვენს მიმართ ვალშია. ეს არის ხრიკი ერთგვარი, რომ არ გადაიხადონ მომსახურების საფასური.

- ქალბატონ გულნარი აპრესაშვილის შვილი ამბობს, რომ თქვენი მანიპულაციიდან მალევე დამძიმდა მისი მდგომარეობა და გარდაიცვალა. ექიმები ითხოვდნენ თურმე იმის გარკვევას, რა ნივთიერება შეუყვანეთ მას ორგანიზმში, რომ ამის საწინააღრმდეგოდ ემკურნალათ, მაგრამ ოჯახმა ამაზეც პასუხი ვერ მიიღო...

- მაოცებს როცა ლაპარაკია ც ანტიდოტზე. ეს ნიშნავს, რომ გაანეიტრალო რაღაც ტოქსინი, ჩვენ არ შეგვყავს არაფერი ისეთი, რაც არის ხელოვნური, ჩვენ შეგვყავს ნატურალური და თვითონ პაციენტისგან აღებული ნივთიერება, ამიტომ რა ანტიდოტი სჭირდებოდათ? როცა მოვიდნენ ჩვენთან კონსულტაციაზე, დაწვრილებით ავუხსენი, რაში მდგომარეობს ჩვენი მკურნალობა, რა შედეგს უნდა ელოდნენ, როგორ ვითარდება სხვადასხვა ადამიანებში და რა რისკფაქტორებია. ამ ქალბატონის შემთხევვაში იყო რისკი მისი ასაკი, წონა, პრობლემა, სახსრებს შორის იყო დაზიანება, რადგან რეგენერაციული მედიცინა ნიშნავს აღდგენას, ამ დროს ხდება აღდგენა იმ ხრტილის, მას რამდენიმე პროცედურა უნდა ჩაეტარებინა. ვუთხარი ისევ მოსულიყვნენ, ასევე ისიც, რომ აღდგენას უნდა დალოდებოდნენ 2-3 თვე, ხშირად არის შედეგი მაშინვე, პროცედურის შემდეგ, მაგრამ ზოგჯერ ნელა დგება... იმ ქალბატონს ასევე გულის პრობლემა ჰქონდა, წნევები აწუხებდა, მძიმეწონიანი იყო, ეს ყველაფერი ძალიან ცუდია სახსრებისთვის. ახლდა სამი შვილი, ყველანი ექიმები, ეს ახალი მედიცინაა და ძნელია უცებ აღქმა. მისვამდნენ კითხვებს, სლაიდებიც ვაჩვენე და ვუთხარი, რომ ეს არის რევოლუციური მედიცინა, რომელიც შემოდის მსოფლიოში. ჩვენ ვკურნავთ განუკურნებელ დაავადებებს, როგორიცაა: ინსულტი, დამბლა, ისეთ დაზიანებებს, რომელსაც ამპუტაცია ემუქრება წყლულების გამო, ვკურნავთ. სპექტრი მკურნალობის არის უზარმაზარი, რეგენერაციულ მედიცინას შეუძლია ყველაფერი გააკეთოს.

- ბატონო თენგიზ, ყველა რესპონდენტი პირიქით ამბობს, რომ მდგომარეობა გაურთულდა, ამას რითი ხსნით მაშინ?

- ეს არის სექტა, ჩვენ ვხუმრობთ მათზე ხშირად ასე. ყველაფერი გაუკეთდა მათ, მაგალითად, იმ ქალბატონის შვილები ამბობდნენ, დედა ვერ გადაიტანს ოპერაციასო და ეს პროცედურა ამიტომ გავუკეთე. ყველაფერმა ჩაიარა კარგად, კმაყოფილები წავიდნენ. როცა გადიოდნენ ეტლით, რადგან მას გადაადგილება არ შეეძლო, დაგვიმტვრიეს ნივთები, 500 ლარის ზარალი მოგვაყენეს, თქვეს, - ავანაზღაურებთო, მაგრამ ჩვენი მენეჯერი, ზვიადი რომ დაუკავშირდა, ფულის გადახდაზე უარი თქვეს. ერთ დღეს დარეკა აპრესაშვილმა და ზვიადს უთხრა, ამ პროცედურის შემდეგ მოვხვდი კლინიკაშიო, ძალიან შევწუხდით. მას ჰქონდა გულის პრობლემები და მელიას კლინიკაში მოხვდა. ჩვენმა მენეჯერმა უთხრა, მოვალთ და ყველაფერს გავარკვევთო, შვილების პასუხი იყო, - თანხა დაგვიბრუნეთ უკანო, არადა, მათ კლინიკის წინაშე აქვთ ახლაც ვალდებულება - ხომ გადაიხადეს 2700 ლარი, უნდა გადაეხადათ ის თანხაც, რაც დააზიანეს. სექტანტებმა ერთმანეთი მონახეს... ავთანდილ გელოვანი ჩვენი პაციენტი იყო, კამერებში ჩანს ყავარჯნების გარეშე მოძრაობდა, ფეხი ფეხზე გადადებული იჯდა აქ და უხსნიდა სხვა პაციენტს როგორი შედეგი ჰქონდა. მენჯბარძაყმა ისეთი ტკივილები იცის, შეუძლებელია ფეხი ფეხზე გადადოს ადამიანმა. ამბობდა, - გაცილებით უკეთესად ვარ, ქმედითი გავხდი, მაგრამ ტკივილები მაქვსო, შემეცოდა და ორჯერ უფასოდ გავუკეთე პროცედურა...

ჩვენ ვართ ორიენტირებული შედეგზე, გვინდა ყველა ჩვენი პაციენტი იყოს კარგად. ჩვენზე ლოცულობენ ჩვენი პაციენტები. რასაც ჩვენ ვაკეთებთ, ეს არის ამერიკაში ახალი, ჩვენ ვკურნავთ განუკურნებელ დაავადებებს. გელოვანმა მითხრა, კარგად ვარ, მაგრამ უკეთესად მინდა გავხდეო და ეს იქნება ფასიანი, რადგან ჩვენ ამას ვყიდულობთ და ძვირი ჯდება რეგენერაციული აგენტები - მეთქი და ფულის გადახდა არ მოეწონა. თუ უფასოდ იქნებოდა, უნოდოდა...

- საკმაოდ დიდი თანხები გადაიხადა ამ ხალხმა, 3000-3700 ლარი, ყველაზე ცოტა აქვს გადახდილი გაბუნიას, რომელიც ამბობს, რომ ძვალი გაქრა პროცედურის შემდეგ...

- ხელზე ტრავმა ჰქონდა გაბუნიას, თქვა გამიკეთეს რამდენიმე ოპერაცია და არაფერი გამოვიდა, რკინები ჩამისვეს, მაინც არაფერი გამოვიდაო. ჭრილობა იქ არ იყო, იქ იყო მრავლობითი მოტეხილობა და ჩაშლილი იყო ძვალი რამდენიმე ადგილას. არ შეხორცდა ძვლები და ფირფიტები ჩაუდეს. მას ვუთხარი, - ჩემთან ასეთი დიაგნოზით არავინ მოსულა, მაგრამ თუ გინდათ გაგიკეთებთ, შეიძლება დაგეხმაროთ აგენტები- მეთქი. გარანტიას მედიცინაში არ იძლევიან. ყველას ვპასუხობ, მე ვერ მოგცემთ გარანტიას, რადგან შედეგზე მოქმედებს ბევრი ფაქტორი და არ ვიცით, ორგანიზში რა ხდება, როგორ იმოქმედებს. ჩვენთან არ არის რისკები, ალერგიები, გვერდითი მოვლენები.

- მაშინ რატომ გაურთულდა ამ ხალხს მდგომარეობა?

- გაბუნიამაც ისე იწუწუნა, ადამიანურად შემეცოდა და ვუთხარი, მოგების გარეშე რაც ჯდება, იმ ფასად გაგიკეთებთ-მეთქი. უპრობლემოდ ჩაუტარდა პროცედურა, მაგრამ ბოლომდე თანხა არ დაფარა, ისე წავიდა. რომ დაურეკეს, პასუხი იყო თავხედური, - ჯერ არ ვიცი როგორი შედეგი იქნება, მივდივარ კოჯორში და შემოდგომაზე ჩამოვალო... ოქტომბერში მოვიდა ჩვენთან და ძალიან თბილად მელაპარაკა, არ ეტყობოდა, რომ პრობლემები ჰქონდა, ის იყო კმაყოფილი.

- ამბობს, თქვენ არ მიიღეთ ის, ამიტომ იძულებულიყო გახდა მიღებაზე სხვა სახელით ჩაწერილიყო...

- პაციენტებისთვის ჩვენი კარი ღიაა, რა საჭიროა სხვისი სახელი და გვარით ჩაწერა, ტყუილია, ჩვენ ნებისმიერს ვესაუბრებით. რაც შეეხება გარანტიებს, დამისახელეთ მედიცინაში ვინ იძლევა გარანტიებს? მომღიმარი სახით მოვიდა ჩემთან და დამიწყო ლაპარაკი, ვუთხარი, - თქვენ არ ხართ ჩაწერილი, სხვა პაციენტი მელოდება-მეთქი. ატეხა სკანდალი, მოვიდა შვილთან ერთად, შემოიპარა რაღაცნაირად და დაიწყო მუქარები, რომ თურმე ვალდებული ვიყავი, მემკურნალა... ეს ყალბი საუბარია, ძვალი კი არ დაიშალა, ოპერაციისგან რაც იყო, ის ცოტა დაშორდა... აზრი არ ჰქონდა მასთან ლაპარაკს, სხვა სპეციალისტსაც გადავუგზავნე მისი სურათები, რომელმაც თქვა, - ამას სჭირდება ოპერაციაო..

- მერი პეტრიაშვილზე რას იტყვით, გაფანტული სკლეროზის დიაგნოზით რომ მოვიდა?

- მას დაველაპარაკე ინტერნეტით, რადგან ვერ შეძლო მოსვლა. გაფანტული სკლეროზის ეფექტი არ არის 100%-იანი, შედეგი არის 69 %. ეს ძალიან მაღალია, რადგან ამ დიაგნოზით ადამიანი ინვალიდობაში ატარებს დროს. დაწვრილებით ვუხსნი პაცენტს ყველა დეტალს, მასაც ვუთხარი სამი პროცედურა დასჭირდებოდა და არ არის აქ გარანტია 100%-იანი- მეთქი. გავუკეთეთ პროცედურა, მასაც არ გადაუხდია ბოლომდე თანხა. თქვა, სახლიდან გადმოვრიცხავო, მეორე დღეს რეკავს და ამბობს, კვლავ ეტლში ვარო. ძალიან სერიოზული დაავადება გაქვთ, განუკურნებელი და მხოლოდ რეგენერაციულ მედიცინას აქვს 69 პროცენტი-მეთქი. მან იცოდა, რომ კიდევ უნდა ჩაეტარებინა პროცედურა, მაგრამ არ ჩაუტარებია. ეს ისეთი დაავადებაა, ყოველ დღე უარესდება მდგომარეობა. ერთი თვის შემდეგ ისევ გჭირდება პროცედურა მესამედ-მეთქი. მითხრა, რატომ უნდა გავიკეთოო... პრეტენზიები ფულის დაბრუნებაზე არ ჰქონია, ეფექტი რომ არ იყო, ამაზე წუხდა.

- რა შეგყავთ ორგანიზმში?

- გააჩნია რა პროცედურა ტარდება. ღეროვანი უჯრედების გააქტიურებაც ხდება, თუ ანთებაა, იმას შლის. ბევრ კარგ რამეს აკეთებს. ძვირადღირებული აპარატით ხდება პროცედურა და ჩვენ ვამზადებთ კოქტეილს, რომელიც მზადდება სხვადასხვანაირად, შეგვყავს აგენტები და ამით უჯრედების გაჯერება ხდება.

- დაგკითხათ უკვე გამომძიებელმა?

- ჩვენ მივეცით გამოძიებას ჩვენება და ყველა კითხვას ვუპასუხეთ. პროკურატურაში ძალიან თავაზიანი გამომძიებელი იძიებს და დიდი სიმპათიებით იყო. ბევრი ბედნიერი და მადლიერი პაციენტი გვყავს და ამასაც ხედავს ის. ვამბობ, რომ ყველა ამ შემთხვევაში ბოლომდე რომ მიეყვანათ მკურნალობა, შედეგი ექნებოდათ.