"ყველა ვთანხმდებით, რომ მიხეილ სააკაშვილი არის პუტინის პირადი ტყვე - აუცილებლად მოვა ის დღე, როდესაც მიშას თავისუფალს ვიხილავთ" - გიორგი სააკაშვილი
ყველა ვთანხმდებით, რომ მიხეილ სააკაშვილი არის პუტინის პირადი ტყვე, - ამის შესახებ მესამე პრეზიდენტის, მიხეილ სააკაშვილის ძმამ, გიორგი სააკაშვილმა "ინტერპრესნიუსს“ კლინიკა „ვივამედთან“ განუცხადა, სადაც მიხეილ სააკაშვილის გათავისუფლების მოთხოვნით აქცია გაიმართა.
როგორც მან აღნიშნა, იმედი აქვს, რომ მიხეილ სააკაშვილი აუცილებლად გათავისუფლდება.
"აქციაზე მოვედი, როგორც ერთ-ერთი რიგითი მოქალაქე. რა თქმა უნდა, ყველგან დავდგები, სადაც საუბარია ჩემი ძმის გათავისუფლებაზე, მაგრამ ყველა ვთანხმდებით ერთ რამეზე, მიხეილ სააკაშვილი არის პუტინის პირადი ტყვე. ბოლო დროინდელი მოქმედებებით ნათლად დავინახეთ, რომ მიშას ადგილი ნამდვილად არ არის „ვივამედში“, არ ეკუთვნის, რა მძიმე მდგომარეობაშია, ვერ წარმოიდგენთ, მაგრამ მე მაინც მაქვს იმედი, რომ აუცილებლად მოვა ის დღე, როდესაც მიშას ვიხილავთ თავისუფალს, რაც ევროპასთან მოგვცემს უფრო დაახლოების საშუალებას. ევროკავშირის 12 პუნქტიდან ერთ-ერთი ეხება პოლიტიკური პატიმრების გათავისუფლებას და რა თქმა უნდა, როგორც პირადი ტყვე ის მოიაზრება პოლიტიკურ პატიმრად“, - განაცხადა გიორგი სააკაშვილმა.