სად "გაქრა" ვალერი ზალუჟნი? - რუსების სპეკულაცია, თუ რეალური პრობლემა, რომლის წინაშეც უკრაინელი მთავარსარდალი დგას: ყველა ინფორმაცია გენერალზე
მაისის პირველ კვირაში "ტელეგრამზე" ძირითადად რუსულ არხებში ვრცელდებოდა ინფორმაცია, რომ უკრაინის შეიარაღებული ძალების მთავარსარდალი, ვალერი ზალუჟნი "გაქრა“.
რუსული წყაროები უამრავ პოსტს აქვეყნებდნენ იმის შესახებ, რომ უკრაინელი მაღალჩინოსანი მედიასივრციდან დაიკარგა და არსად ჩანდა. ამგვარ ცნობებს ისიც დაემატა, რომ ნატო-ს სამხედრო კომიტეტის თავმჯდომარის და ადმირალის რობ ბაუერის თქმით, ზალუჟნი ნატო-ს სამხედრო კომიტეტზე დასწრებას ვერ ახერხებდა. აღნიშნული განცხადება ბაუერმა 10 მაისს გააკეთა.
"ზალუჟნი ნატო-ს სამხედრო კომიტეტის სხდომაზე, რომელსაც გენშტაბების ხელმძღვანელები ესწრებიან, გადატვირთული ოპერატიული სიტუაციის გამო, დასწრებას ვერ ახერხებს", - ამბობს ბაუერი.
სიტუაციას საეჭვოს ისიც ხდიდა, რომ ზალუჟნიმ ვიდეოკონფერენციის ფორმატზეც უარი განაცხადა. მალევე, საჯარო სივრციდან კიდევ ერთი უკრაინელი სამხედრო მაღალჩინოსანი, გენერალი იგორ ტანციურა გაქრა.
კერძო სამხედრო კომპანიის, "ვაგნერის“ მეთაურმა ევგენი პრიგოჟინმა განაცხადა, რომ გენერალი ტანციურა 2 მაისს მისი სამხედროების საარტილერიო ცეცხლში მოჰყვა. მისი თქმით, იგორი ჩასივ იარის გზაზე მოძრავ ყველგანმავალში იყო. თუმცა პრიგოჟინის თქმით, არ შეუძლია თქმა - გარდაიცვალა თუ არა გენერალი.
უკრაინულმა მხარემ პრიგოჟინის საპასუხოდ განაცხადა, რომ იგორი და დანარჩენები ცოცხლები არიან. თუმცა აღსანიშნავია, რომ მაისის დასაწყისის შემდეგ აღარც ტანციურა არ გამოჩენილა.
- რას წერენ ვალერი ზალუჟნის შესახებ რუსული წყაროები?
რუსული წყაროების მიხედვით, ზალუჟნი დნიპროს ოლქში, პავლოგრადში სარაკეტო თავდასხმის დროს იმყოფებოდა. ცნობისთვის, რუსებმა პირველ მაისს პავლოგრადზე იერიში მიიტანეს და უზარმაზარი საწყობი ააფეთქეს. აფეთქების მასშტაბურობას არსებული ვიდეოები და თანამგზავრის სურათებიც ადასტურებს.
პავლოგრადზე სარაკეტო შეტევები მოგვიანებითაც განხორციელდა. 8 მაისს ზალუჟნი დნეპროპეტროვსკის ოლქში, უკრაინის შეიარაღებული ძალების აღმოსავლეთ მხარის მართვის პუნქტში იმყოფებოდა. ის შენაერთების მზადყოფნას ამოწმებდა.
ფრთოსანი რაკეტის დარტყმის შედეგად აღნიშნული პუნქტი განადგურდა. რუსული მედია წერს, რომ "დაიღუპა და დაშავდა ბევრი უკრაინელი სამხედრო მაღალჩინოსანი."
რუსი სამხედრო კორესპონდენტი რუდენკო წერს: "ინფორმაციას ზალუჟნის დაშავებაზე ირიბად ისიც ადასტურებს, რომ 10 მაისს მისი ცოლი ელენა კიევის სამხედრო ჰოსპიტალში 4 საათის განმავლობაში იმყოფებოდა. ჩემი ინფორმაციით, გენერალი ზალუჟნი ცოცხალია, თუმცა კრიტიკულ მდგომარეობაშია", - წერს კორესპონდენტი.
<script async src="https://telegram.org/js/telegram-widget.js?22" data-telegram-post="RtrDonetsk/17622" data-width="100%"></script>8 მაისს უკრაინის სამხედრო ჰოსპიტლის თანამშრომელი, სლობოდიანიუკი სოციალურ ქსელში წერდა, რომ საავადმყოფოში დაჭრილების დიდი რაოდენობა მიიყვანეს, მათგან ერთ-ერთი მნიშვნელოვანი პირის მდგომარეობა კრიტიკული იყო. მოგვიანებით, მან პოსტი წაშალა.
- რას ამბობს უკრაინული მხარე?
უკრაინული მედია და ოფიციალური პირები კატეგორიულად უარყოფენ ვალერი ზალუჟნის დაჭრის შესახებ რუსულ წყაროებში გავრცელებულ ცნობებს.
12 მაისს უკრაინის პრეზიდენტმა ვოლოდიმირ ზელენსკიმ განაცხადა, რომ ზალუჟნიმ მას ანგარიში ჩააბარა. თუმცა აღსანიშნავია, რომ ეს ინფორმაცია მხოლოდ ტექსტის სახით გავრცელდა, არ ჰქონდა დართული შესაბამისი ფოტო, ან ვიდეო მასალა.
ასევე, 12 მაისს გავრცელდა ზალუჟნისთან ინტერვიუ, ვიდეოს სახით, თუმცა უცნობია როდის არის ის ჩაწერილი.
საინტერესოა კიდევ ერთი ფაქტი - 12 მაისს სოციალურ ქსელში უკრაინელი წყვილის მაქსიმ ალექსეევისა და ეკატერინა პოლიშუკის ხელის მოწერის ცერემონიიდან კადრები გავრცელდა და კადრებში მთავარსარდალიც ჩანდა. კომენტარებში ადამიანებმა უკმაყოფილება გამოთქვეს იმის გამო, რომ ზალუჟნი ნატო-ს შეხვედრას არ დაესწრო და ქორწილში წავიდა, თუმცა მაქსიმ ალექსეევმა განაცხადა, რომ ცერემონია არა 12 მაისს, არაედ უფრო ადრე გაიმართა. "ეს ამბავი გუშინ არ მომხდარა და ნატო-სთან არავითარი შეხება არ აქვს", - დაწერა ალექსეევმა.
- გუშინ, 20 მაისს ვალერი ზალუჟნისთან დაკავშირებით კომენტარი გააკეთა თავდაცვის მინისტრის მოადგილემ, ანნა მალიარმა: - "მთავარსარდალი ადგილზეა, თავის საქმეს აკეთებს, ახლახან ვისაუბრეთ", - თქვა მან. თუმცა აღსანიშნავია, რომ ჯერჯერობით მედიასთან ზალუჟნი კვლავ არ გამოჩენილა.
ამჟამად უკრაინული არმია კონტრშეტევისთვის ემზადება. სავსებით რეალურია, რომ ზალუჟნი, ისევე როგორც იგორ ტანციურა იმდენად დატვირთულ რეჟიმში მუშაობენ, რომ საჯაროდ გამოსვლის დრო არ აქვთ. თუმცა საზოგადოების მაღალი დაინტერესება თუ სად არის გენერალი, დღითიდღე კიდევ უფრო იზრდება და სკანდალის სახეს იძენს, მით უფრო, რომ გასულ დღეებში უკრაინული მხარის მიერ გავრცელებული ინფორმაციები ბევრისთვის არადამაჯერებელია და კითხვის ნიშნებს ტოვებს.
- ავტორი: ანრი კურტანიძე