"ხვალ რომ პუტინის ოჯახი ჩამოვიდეს, მაშინაც იტყვით, ვაჟამ “სტუმარ-მასპინძელი” დაგვიტოვაო?!" - რას წერს თენგიზ ფხალაძე
რუსეთის საგარე საქმეთა მინისტრის, სერგეი ლავროვის ოჯახი წევრების საქართველოში ვიზიტთან დაკავშირებით სოციალურ ქსელში არაერთი მოსაზრება და შეფასება დაიწერა.
პოლიტილოგ თენგიზ ფხალაძის შეფასებით, ლავროვის ოჯახის წევრების საქართველოდან წასვლით პრობლეა არ გვარდება. "პრობლემა ისაა, რომ საერთოდ ჩამოვიდნენ საქართველოში".
"პრობლემა არ გვარდება იმით, რომ წავიდნენ! დასარჩენად არც ყოფილან ჩამოსულნი! პრობლემა ისაა, საერთოდ რომ ჩამოვიდნენ! შესაბამისად კითხვები:
1. ვინ უზრუნველყო საქართველოში შემოსვლა და უსაფრთხოების გარანტიები? ასეთი გარანტიების გარეშე რუსეთის საგარეო საქმეთა მინისტრის შვილი არ გადაადგილდება, მით უფრო დღევანდელი ვითარების გათვალისწინებით!
2. რატომ აიძულებთ პოლიციას დაიცვას იმის ოჯახი, ვინც საქართველოს წინააღმდეგ გაშლილ დილომატიურ ფრონტს ხელმძღვანელობს, ვინც აგრესიის, ოკუპაციის, ჩვენი მოქალაქეების გატაცების, წამების დიპლომატიურ უზრუველყოფას ახდენს და ვისი ყოველდღიური საქმიანობაც ქართული სახელმწიფოებრიობის მოშლაა?
3. რა პოლიტიკა აქვს სახელმწიფოს ოკუპანტი ქვეყნის პოლიტელიტის და მათი ოჯახის წევრების მიმართ, რომლებზეც იმავდროულად საერთაშორისო სანქციებიც ვრცელდება? ხვალ რომ პუტინის ოჯახი ჩამოვიდეს, მაშინაც იტყვით, ვაჟამ “სტუმარ-მასპინძელი” დაგვიტოვაო? საწყალი ვაჟა, წარმომიდგენია რა “მხურვალე მოკითხვებს” გითვლით საიქიოდან!
და ბოლოს: ვაჟას სხვა რამეებიც აქვს დაწერილი და ეგებ გაეცნოთ! ხოლო დროგამოშვებით თუ გურამიშვილს, ილიას, აკაკის, ჯავახიშვილს, გამსახურდიას, რობაქიძეს და კიდევ სხვებს მიაშველებთ, ვინძლო ოდესმე რუსთველამდეც მიხვიდეთ!
ზოგადად კი “ჭკუა უხმარ არს ბრიყვთათვის, ჭკვა ცოდნით მოიხმარების!” - წერს თენგიზ ფხალაძე.