"აქედან არის ბავშვი იძულებით გადაყვანილი... მინდა ვუთხრა მას, აუცილებლად გიპოვი, საშინლად დაგსჯი" - რას ამბობს დიდ დიღომში გარდაცვლილი 12 წლის გოგონას დედა
დიდ დიღომში გარდაცვლილი 12 წლის მოზარდის, ანი იანუშაიტიტეს დედა ნატო ხუტაშვილი "შაბათის ფორმულასთან" ამბობს, რომ ერთი პროცენტითაც კი არაა დასაშვები, რომ მისი შვილი არ მოუკლავთ.
"მე როგორც სიცოცხლეში ვიყავი ანის დედა, კვლავ ვარ და ყველაფერს გავაკეთებ ანისთვის, აუცილებლად მივაღწევ სიმართლეს. რკინის ქალამნებს ჩავიცვამ. როგორ და რატომ მოხვდა იმ ადგილას ბავშვი თუ ძალით შეყვანილი და მოკლული არაა?! დაზიანებებიდან გამომდინარე, ადგილიდან გამომდინარე (სადაც ცხედარი იპოვეს) ორი აზრი არ არსებობს, რომ ბავშვი მოკლული არაა. აქ ასი პროცენტიდან ერთი პროცენტი არ არის დასაშვები.
მოჩანს რომ ქანაობს აქ (პარკში, საქანელაზე) ამის შემდეგ, ყველაზე მოკლე გზა სახლისკენ რომელიც არის, მიდის, იმ გზას მიჰყვება, ამ ბილიკით მიდის, კამერაში მოჩანს, რომ ეს ბილიკია, ეს არის უახლოესი გზა სახლამდე, ყველაზე მოკლე გზა, რომელსაც ის იყენებდა", - ამბობს ნატო ხუტაშვილი.
- მთავარი გზის გვერდით არის ნაგავსაყრელი, ბუჩქები და სარეველა ბალახი, ანის დედის ვერსიით, ძალადობა სწორედ იქ იწყება.
"იქ არის სახლი, ეს გზა, ეს სანაგვე როგორ შეიძლება გიმოკლებდეს გზას?! აქედან არის ბავშვი იძულების წესით გადაყვანილი, იმიტომ რომ მისი მრავალი დაზიანება ამაზე მეტყველებს. ნახეთ, რა სიმაღლისაა იმისთვის, რომ აქ გადააბიჯოს ბავშვმა ნებით ღამე, სიბნელეში.
ტელეფონი არის ნაპოვნი აქ. ანუ აქ მოხდა შეხლა-შემოხლა, რომლის შედეგად, ბავშვს ტელეფონი ან წაართვეს, ან გადავარდა, ტელეფონი არის დამსხვრეული. ბავშვი ეწინააღმდეგებოდა, ყვიროდა, ამის გამო ბავშვს პირზე ხელი აქვს აფარებული, სტრესის გამო, ან იმიტომ, რომ თავში აქვს ჩარტყმული და ტვინის შერყევის გამო, აქვს დაწყებული პირღებინება. და ეს ღებინების პროცესი და ყვირილი რომ იყო, პირზე აქვს ხელი აფარებული, რომ ხალხს არ გაეგონა. აქ არის სრული სიბნელე, ეს კორპუსი შეუსახლებელია, ახალი აშენებულია, არაფერი არ ჩანს. ეს არის იდეალური ადგილი მკვლელობისთვის, გაუპატიურებისთვის, უბრალოდ მას არ დასცალდა გაუპატიურება. ეს ადგილი შედარებით გაშლილია, ამიტომ ბავშვი რომ არ ეპოვათ, გადაჰყავს იქ.
ამ ადგილას პრაქტიკულად არავინ არ მოძებნიდა იმიტომ, რომ ვერავინ ვერ წარმოვიდგენდით, რომ აქ ბავშვი იყო, ყველა ეძებდა ბავშვს გაშლილ სივრცეში ჩემ გარდა. მე ვიცოდი, ჩემი შვილი ასეთ დროს რომ სახლში არ იყო, ვგრძნობდი, მას რაღაც ცუდი სჭირდა.
მინდა ვუთხრა მას, აუცილებლად გიპოვი, აუცილებლად დაგსჯი, საშინლად დაგსჯი, ისე დაგსჯი, როგორც საქართველოში ჯერ არავინ დასჯილა", - ამბობს გარდაცვლილი გოგონას დედა.
- ინფორმაციისთვის, დიდ დიღომში 12 წლის მოზარდი გარდაცვლილი მიმდინარე წლის 16 მარტს იპოვეს. გამოძიება სისხლის სამართლის კოდექსის 109-ე მუხლით დაიწყო, რაც დამამძიმებელ გარემოებაში განზრახ მკვლელობას გულისხმობს.
საქმეზე, ბავშვის დედას და "უფლებები საქართველოს“ ადვოკატებს სსიპ ლევან სამხარაულის სახელობის სასამართლო ექსპერტიზის ეროვნული ბიუროს მიერ მომზადებული სასამართლო-სამედიცინო ექსპერტიზის პირველადი დასკვნის ასლი 28 აპრილს გადაეცათ. აღნიშნული ექსპერტიზის დასკვნის თანახმად, გოგონას სხეულზე 40-მდე დაზიანება აღენიშნება. ასევე, სიკვდილის მიზეზი მექანიკური ასფიქსიაა.