"ეს კაცი დაიმახსოვრეთ - დამოუკიდებელი მართლმსაჯულების პირობებში, სახელმწიფო ღალატის საქმის გამოძიების ერთ-ერთი მთავარი ფუგურანტი!" - რას წერს ნათია მეზვრიშვილი ირაკლი კობახიძეზე
შინაგან საქმეთა მინისტრის ყოფილი მოადგილე, პარტია "საქართველოსთვის" ერთ-ერთი ლიდერი ნათია მეზვრიშვილი "ქართული ოცნების" თავმჯდომარის ირაკლი კობახიძის განცხადებას ეხმაურება და სოციალურ ქსელში წერს:
"ეს კაცი დაიმახსოვრეთ - დღეს ხელისუფლების მხრიდან სახელმწიფო ღალატის მატერიალური გამოხატულება და ხვალ, ევროკავშირის წევრ საქართველოში, დამოუკიდებელი მართლმსაჯულების პირობებში, სახელმწიფო ღალატის საქმის გამოძიების ერთ-ერთი მთავარი ფუგურანტი! არ ვაპირებ შევეგუო ისეთ საქართველოში ცხოვრებას, სადაც რუსეთისთვის ქვეყნის ჩამბარებლები პასუხისმგებლობას გაექცევიან!"
შეგახსენებთ, ამ ცოტა ხნის წინ ირაკლი კობახიძემ პარლამენტში ჟურნალისტების კითხვას, - არის თუ არა რუსეთი საქართველოს მტერი? - უპასუხა:
"არის თუ არა რუსეთი მტერი, ეს არის სპეკულაციური შეკითხვა, რომლის მიზანიც ესკალაციაა. ეს მიანიშნებს იმაზე, რომ არსებობს გლობალური ომის პარტია, რომელიც ყველაფერს აკეთებს იმისათვის, რომ საქართველოს უკრაინიზაცია მოხდეს. რუსეთი, რა თქმა უნდა, ოკუპანტია, მაგრამ თუ მტერი ხარ, მაშინ აიღე იარაღი და ისროლე“, - განაცხადა კობახიძემ.