"შესაძლებელია, დააკავონ" - რას ამბობს მიხეილ რამიშვილი ბაჩალიაშვილის საქმის ყოფილ გამომძიებელზე
გარდაცვლილი პროგრამისტის, თამარ ბაჩალიაშვილის ოჯახის ადვოკატის, მიხეილ რამიშვილის განცხადებით, მან პროკურატურაში გამოკითხვაზე უარი განაცხადა და ჩვენების მიცემა მაგისტრატი მოსამართლის წინაშე სურს.
როგორც "ინტერპრესნიუსთან“ საუბარში რამიშვილი აღნიშნავს, ბაჩალიაშვილის საქმის ყოფილი გამომძიებლის, სერგო შუბითიძის მიერ ერთ-ერთ სატელევიზიო ეთერში გაჟღერებული ინფორმაცია, გამორიცხული არ არის, შუბითიძის წინააღმდეგ გამოიყენონ.
"პროკურატურაში გამოკითხვაზე ვიყავი და უარი ვუთხარი, მაგისტრატი მოსამართლის წინაშე მოვითხოვე დაკითხვა. ეს არის სისტემა, რომელმაც ბაჩალიაშვილის საქმე არ გამოიძია. რასაც ეს გამომძიებელი ამბობს, არ გამოვრიცხავ, მის წინააღმდეგ იყოს გამოყენებული, რადგან მათ არ სურთ, ეს საქმე გამოძიებული იყოს“, - აცხადებს რამიშვილი.
კითხვაზე, ელოდება თუ არა ის გამომძიებლის დაკავებას, პასუხობს, რომ "ყველაფერი შესაძლებელია".
ცნობისთვის, თბილისის პროკურატურამ თამარ ბაჩალიაშვილის გარდაცვალების სისხლის სამართლის საქმეზე მტკიცებულებათა შესაძლო ფალსიფიკაციის ფაქტზე გამოძიება დაიწყო. აღნიშნულთან და საჯაროდ გაკეთებულ განცხადებებთან დაკავშირებით სასამართლოში მაგისტრატი მოსამართლის წინაშე საქმის ყოფილი გამომძიებელი, სერგო შუბითიძე გამოიკითხა.