თამარ ბაჩალიაშვილის ბურუსით მოცული საქმე: დეტალები, ვერსიები, სკანდალურ ქოლ-ცენტრებთან კავშირის შესაძლებლობა - რას აცხადებს გარდაცვლილი პროგრამისტის დედა?

გარდაცვლილი პროგრამისტის, თამარ ბაჩალიაშვილის ადვოკატები ხვალ პროკურატურას საქმის ხელახალი გამოძიების მოთხოვნით მიმართავენ. მიზეზი საქმის ყოფილი გამომძიებლის, სერგო შუბითიძის მედიაში გავრცელებული განცხადებებია. როგორც მისგან მოვისმინეთ, გამომძიებლისთვის ბაჩალიაშვილის თვითმკვლელობის ვერსია არადამაჯერებელია. დაცვის მხარეს გამომძიებლის მონათხრობი დამატებით კითხვის ნიშნებს უჩენს მიკერძოებულ გამოძიებასთან დაკავშირებით.

"თავდაყირა დადგება ყველაფერი, ჩემი შვილი შეეწირა სამსახურს“, - ამბობს ბაჩალიაშვილის მამა. ოჯახის ადვოკატის მიხეილ რამიშვილის თქმით კი, "აუცილებელია საქმე განახლდეს. ყველა მეთოდს გამოვიყენებთ, საქმეში საერთაშორისო ორგანიზაციებსა და დიპლომატიურ წარმომადგენლებს ჩავრთავთ, რათა შერჩევითი სამართალი აღმოიფხვრას“.

როგორც ცნობილია, თამარ ბაჩალიაშვილის საქმეზე გამოძიება თვითმკვლელობამდე მიყვანის მუხლით მიმდინარეობდა, შემდეგ კი პროკურატურამ განაცხადა, რომ ქალმა თავი მოიკლა და საქმე ამ დასკვნით დაიხურა.

გამომძიებელ სერგო შუბითიძის თქმით, საქმის გამოძიება გაყალბდა. ის 2020 წლის ივლისში, რუსთავის პოლიციის უფროს გამომძიებლად მუშაობდა და თამარ ბაჩალიაშვილის ცხედრის პოვნის პირველივე წუთებიდან, საქმის გამოძიება მას დაავალეს. ძალოვანი უწყების უკვე ყოფილი თანამშრომელი, რომელმაც სამსახურიდან წასვლის პატაკი "შაბათის ფორმულასთან" ინტერვიუს შემდეგ დაწერა, საუბრობს ყველა იმ მტკიცებულებაზე, რომელიც საკუთარი თვალით ნახა და მის ხელში გაიარა. შუბითიძე საქმეს დაახლოებით 2 კვირის განმავლობაში კურირებდა, ვიდრე გამოძიებას თბილისი გადაიბარებდა. საქმის გამომძიებელმა რამდენიმე მნიშვნელოვან გარემოებაზე ილაპარაკა, მათ შორის გარდაცვლილის ტელეფონთან დაკავშირებულ საკითხზე.

შეგახსენებთ, რომ 23 წლის პროგრამისტი თამარ ბაჩალიაშვილი 2020 წლის 18 ივლისს გაუჩინარდა და მას ოთხი დღის განმავლობაში ეძებდნენ. გოგონა ბოლოს თეთრიწყაროს მუნიციპალიტეტში, სოფელ მაწევნის დაუსახლებელ ტერიტორიაზე, სამანქანო გზიდან რამდენიმე ათეული მეტრის დაშორებით მდგარ საკუთარ მანქანაში გარდაცვლილი იპოვეს. სამართალდამცველებმა ავტომანქანის სალონიდან თამარის ჩანთაში გულის და წნევის მარეგულირებელი საშუალებების ცარიელი ფირფიტები ამოიღეს. ასევე ამოღებულია გოგონას ხელჩანთა დოკუმენტებით, წყლის ბოთლი, მობილური ტელეფონი და ავტომანქანის პულტი. ავტომანქანის ყველა კარი დაკეტილი, ხოლო ფანჯრის მინები აწეული იყო. გამოძიება თავდაპირველად თავისუფლების უკანონოდ აღკვეთის კვალიფიკაციით მიმდინარეობდა, ცხედრის პოვნიდან მეორე დღეს კი ბაჩალიაშვილის საქმეს თვითმკვლელობამდე მიყვანის მუხლიც დაემატა.

ოჯახი შვილის გარდაცვალებას მის სამსახურს, კომპანია ZAG-ს უკავშირებდა და ამბობდა, რომ თამარი სამსახურიდან ხშირად გაღიზიანებული ბრუნდებოდა. ოჯახი სუიციდს თავიდანვე გამორიცხავდა და მკვლელობის ვერსიას იზიარებდა. ოჯახი და ადვოკატი მიხეილ რამიშვილი საქმეში FBI-ს ჩართვასაც ითხოვდნენ, მათ მიიღეს კიდეც ამის პირობა, თუმცა ქართულმა მხარემ ფედერალური ბიუროსგან მიიღო განმარტება, რომ ისინი მხოლოდ შტატებში მომხდარ ან მათ სახელმწიფოსთან დაკავშირებულ დანაშაულებს იძიებენ.

პროკურატურა პერიოდულად გვაცნობდა საქმის მასალებს, მათ შორის თამარის ემოციურ ვიდეო-აუდიოჩანაწერებს, რომლებშიც გოგონა ლაპარაკობდა უიმედო სიყვარულზე და ახსენებდა თვითმკვლელობას... ათეულობით ექსპერტიზის დასკვნებს შორისაა ფსიქოლოგიურ-ფსიქიატრიული ექსპერტიზის დასკვნაც, რომელმაც გოგონას სუიციდი დასაშვებად მიიჩნია.

პროკურატურამ ექვსთვიანი მუშაობის შემდეგ, 17 დეკემბერს, ბაჩალიაშვილის საქმეზე გამოძიება შეწყვიტა.

"მოპოვებული მტკიცებულებები ცხადყოფს, რომ თამარ ბაჩალიაშვილის მიმართ დანაშაულის ჩადენას ადგილი არ ჰქონია და მან სიცოცხლე თვითმკვლელობით დაასრულა. შესაბამისად, მიღებულია გადაწყვეტილება საქმეზე გამოძიების შეწყვეტის შესახებ", - ასეთი იყო საქართველოს პროკურატურის გადაწყვეტილება.

პროკურატურის დასკვნას ოჯახი არ იზიარებდა და სიმართლის ძიებას ევროსასამართლოში აპირებდა.

თამარ ბაჩალიაშვილის მამა ჯუმბერ ბაჩალიაშვილი თავის დროზე ერთ მნიშვნელოვან დეტალს ახსენებდა - ადამიანმა, რომელსაც მისი შვილის კომპიუტერის გახსნასთან კავშირი ჰქონდა, უთხრა, რომ მის შვილს დიდი პრობლემები ჰქონდა.

• ვინ იყო 23 წლის გოგონა?

თავის დროზე გავარკვიეთ და ვწერდით, რომ თამარ ბაჩალიაშვილი სწავლის პარალელურად ორ სამსახურში მუშაობდა: შპს ZEG-ში, საიდანაც გაუჩინარებამდე ორი დღით ადრე წამოვიდა, და SpryFlash-ში - ავსტრიულ კომპანიაში, რომლის საქმიანობა, ოფიციალური ინფორმაციით, ZEG-ის მსგავსად, საინფორმაციო ტექნოლოგიებსა და პროგრამულ უზრუნველყოფას (IT) უკავშირდება. როგორც ავსტრიული კომპანიის ხელმძღვანელობამ განაცხადა, თამართან კონტრაქტი თებერვლიდან შეწყვიტეს.

ასევე, ოფიციალური ინფორმაციით, კომპანია ZAG-ის მთავარი სერვისი პროგრამული პაკეტების შედგენა იყო, მისი ოფიციალური მისამართი იმჟამად გახლდათ ჭავჭავაძის #15. კომპანიას ოფიციალური ვებგვერდი არა აქვს. როგორც იმჟამად გავარკვიეთ, მას ოფისი რუსეთშიც ჰქონდა. თამარის მეორე სამუშაო ადგილად მითითებული საინფორმაციო ტექნოლოგიების ავსტრიული კომპანია SpryFlash-ის მთავარი სერვისიც მაღალი ხარისხით დაწერილი კოდებით შექმნილი კომპიუტერული პროგრამირება გახლდათ.

ითქვა, რომ თამარ ბაჩალიაშვილი კიბერუსაფრთხოების სპეციალისტი იყო და ოჯახში სამსახურსა და თავის საქმიანობაზე არაფერს ჰყვებოდა, არც ის გაუმხელია, რამდენი ჰქონდა ხელფასი. პროგრამისტი გოგონა ერასმუსის პროგრამით ინფორმატიკას საფრანგეთში, ქვეყნის ჩრდილო-დასავლეთში მდებარე ქალაქ რენში გამოყენებითი მეცნიერების ეროვნულ ინსტიტუტში სწავლობდა. 2016 წლიდან გარდაცვალებამდე იყო ჯავახიშვილის სახელობის სახელმწიფო უნივერსიტეტში არსებული ინფორმატიკის ფრანგულ-ქართული სკოლის სტუდენტი. 2020 წელს უნივერსიტეტში ზუსტ და საბუნებისმეტყველო მეცნიერებებში გამართულ საფაკულტეტო კონფერენციაზე მისი მოხსენების თემა იყო "ვებაპლიკაციები კომპანიების შეფასებისთვის".

• ოჯახის ვერსია

18 ივლისს, შაბათ დილას, დაახლოებით 10:00 საათზე, თამარი სახლიდან იმ დროს გავიდა, როცა შინ არავინ იყო. დედამ შვილთან დაკავშირება 14:00 საათისთვის სცადა, მაგრამ მისი ტელეფონი გამორთული იყო. ოჯახმა პოლიციას იმავე დღის საღამოს 20:00 საათზე განცხადებით მიმართა. სახლიდან, ფონიჭალიდან დაახლოებით 10:00 საათზე გასული თამარის ნაცრისფერი "ჰიუნდაი" სათვალთვალო კამერებმა 12:00 საათზე მარნეულში დააფიქსირეს, შემდეგ ხაიშში, ბოლოს კი გოგონა სოფელ გოლთეთში ნახეს, საიდანაც მისი კვალი დაიკარგა.

სოფელ გოლთეთის მკვიდრი:

"იმ დღეს სოფელ გოლთეთში 2 უცხო ავტომანქანა შემოვიდა, სხვა არავინ გვინახავს. ერთში, "ჰიუნდაიში" ის გოგონა მარტო იჯდა, მეორეში კი ორი გოგონა შენიშნეს. "ჰიუნდაის"" მძღოლი სოფლიდან გასასვლელს ეძებდა, არაფერი უკითხავს, მანქანა მოაბრუნა და წავიდა. ერთმა მეზობელმა ისიც თქვა, მანქანის საბურავი დაღმართზე თხრილში ჩაუვარდა, დავინახე და დასახმარებლად გავემართე, მაგრამ რომ მივუახლოვდი, ამოაღწია და სწრაფად წავიდაო".

ოჯახმა არ იცის, რატომ იმყოფებოდა მათი შვილი ამ ტერიტორიაზე, სადაც არც ნათესავი ჰყავთ და არც მეგობარი. თამარის მამა არ გამორიცხავდა, რომ გოგონა სახლიდან მოტყუებით გაიყვანეს და აცხადებდა, რომ ეს შესაძლოა, მის სამსახურს უკავშირდება, საიდანაც ხშირად აღელვებული ბრუნდებოდა. მამა ჰყვებოდა, რომ შვილის სამსახურში ამბის გასარკვევად ადრეც მივიდა, მაგრამ პასუხი არავინ გასცა.

ოჯახი დღემდე დარწმუნებულია, რომ თამუნა თავს არ მოიკლავდა და ვერსია, რომ თავის მოსაკლავად წნევის დამწევი წამლების დიდი დოზა დალია, სიცრუეა. მამის მტკიცებით, გოგონა ფსიქოლოგიური შანტაჟისა და ზეწოლის მსხვერპლი გახდა.

თამარ ბაჩალიაშვილის გარდაცვალების ფაქტზე თავდაპირველად საქმე თავისუფლების უკანონო აღკვეთის მუხლით აღიძრა, 24 ივლისს კი საქმეში თვითმკვლელობამდე მიყვანის მუხლი დაემატა, ხოლო გოგონას მამა დაზარალებულის უფლებამონაცვლედ ცნეს.

გენერალურმა პროკურატურამ ოფიციალურად გამოაცხადა თამარ ბაჩალიაშვილის საქმის შემაჯამებელი შეფასება - სიკვდილის მიზეზი მედიკამენტოზური ინტოქსიკაცია გახდა, რაც გოგონას საყლაპავი და არა საინექციო გზით აქვს მიღებული. პროკურატურის დასკვნა ეფუძნება სასამართლო-სამედიცინო ექსპერტიზას, ასევე გვამის სასამართლო-სამედიცინო ქიმიურ-ტოქსიკოლოგიურ გამოკვლევას და საქმის მასალების შედარებას. თამარ ბაჩალიაშვილის საქმის პროკურორი ამირან გულუაშვილი ინტერვიუში გვეუბნებოდა:

"გამოძიების საწყისი ეტაპიდან ვთანამშრომლობთ ოჯახსა და მის ადვოკატთან ყველა შესაძლო ვერსიისა და ინფორმაციის გადამოწმებისა და შესწავლის მიზნით. გამოვაქვეყნეთ სასამართლო-სამედიცინო ექსპერტიზის დასკვნა, სადაც დაფიქსირებულია გარდაცვალების გამომწვევი მიზეზი და რომ ძალადობრივი სიკვდილის შესაძლებლობა გამორიცხულია. თამარ ბაჩალიაშვილის ცხედარს ძალადობის კვალი არ აღმოაჩნდა. ნებისმიერი საქმის გამოძიებაში არის რაციონალური ვერსიები, მტკიცებულებები, რომელთა გაანალიზება ახალი საგამოძიებო მოქმედებების დაგეგმვის საშუალებას იძლევა. ამ საქმეზე ათასამდე საგამოძიებო მოქმედება ჩატარდა, დაახლოებით 600 პირისგან მოვიპოვეთ ინფორმაცია, გამოყოფილია დიდი ადამიანური რესურსი, პროკურორები და გამომძიებლები 24 საათის განმავლობაში ამოწმებენ ყველა უმნიშვნელო დეტალს, შეისწავლიან ვერსიებს, მტკიცებულებებს და ყოველივეს გადამოწმების შემდგომ რეაგირებენ. მედიასაშუალებებშიც სხვადასხვაგვარი ინფორმაცია გავრცელდა და დიდი ნაწილი უკვე გადამოწმებულია. მიუხედავად ჩვენ მიმართ სკეპტიკური დამოკიდებულებისა, მზად ვართ, ვიმუშაოთ ნებისმიერ ვერსიასა თუ მტკიცებულებაზე. გამოძიება გაგრძელდება მანამ, სანამ ყველა კითხვას პასუხი არ გაეცემა“.

ამ ბურუსით მოცულ საქმეში კი მთავარი კითხვა იყო: მკვლელობა, თუ თვითმკვლელობა, რაზეც დღემდე პასუხი ბოლომდე გაცემული არ არის.

იყო ასეთი ვერსია, რომ ორივე შემთხვევაში ეს ფაქტი უკავშირდება ინფორმაციული ნაკადის ფლობას, რაც ვიღაცის ინტერესს აზიანებდა. არ გამორიცხავდნენ, რომ გოგონას ხელში ჩაუვარდა სხვადასხვა სახის მაკომპრომეტირებელი მასალა, ამ მასალების შესაძენად მასთან შესახვედრად ვიღაც გავიდა და ამას მოჰყვა ტრაგედია.

ექსპერტების ნაწილი დარწმუნებული იყო, რომ ეს ყველაფერი გოგონას საქმიანობას უკავშირდებოდა, ვინაიდან თამარი მაღალი დონის სპეციალისტი იყო და უამრავ ინფორმაციაზე წვდომა არ გაუჭირდებოდა. ოჯახიც ამბობდა, რომ მათ შვილს რაღაც ინფორმაცია ჰქონდა. დადასტურდა ისიც, რომ თამუნას ჰყავდა ფსიქოლოგი, რომელმაც ჩვენთან ინტერვიუში ახსენა ფრაზა, რომ მან გოგონა "ვერ გახსნა“.

როგორც გითხარით, ოჯახმა თამუნას სამსახურის შესახებ არაფერი იცოდა, გარდა იმისა, რომ ის კომპანია "ზეგ“-ში მუშაობდა პროგრამისტად (რომლის ფუნქციაც დღემდე ვერ გაარკვიეს) და თავიდანვე ჰქონდათ ეჭვი, რომ თამუნა ქოლ-ცენტრის თანამშრომელი იყო.

თეონა თამაზაშვილი, თამუნა ბაჩალიაშვილის დედა:

"ჩვენი ადვოკატები საქმის ხელახალი გამოძიების მოთხოვნით ხვალ მიმართავენ პროკურატურას. ტელევიზიით შევიტყვეთ და ვუსმინეთ გამომძიებელ შუბითიძეს და მისი ნათქვამი ჩვენთვისაც სიახლე იყო. არასდროს მჯეროდა პროკურატურის ვერსიის, რომ თამუნამ თავი მოიკლა. უამრავი ფაქტი იყო, რაც მკვლელობის ეჭვებს მიმყარებდა, თუნდაც ის, რომ არ მომცეს "ფეისბუკის“ ჩანაწერები, დღემდე არც თამუნას ლეპტოპი დაუბრუნებიათ. იქ რაღაც იყო ისეთი, რაც არ უნდოდათ, მე მცოდნოდა. წაშლილი რომ იქნებოდა ინფორმაცია, ხომ გამიჩნდებოდა კითხვები, რატომ იყო წაშლილი? მისი ტელეფონი კი გაფუჭებული დამიბრუნეს. დღემდე ვერ გავიგე, რა დაწესებულება იყო ZAG-ი, გამოიძიონ და დაადგინონ თვითონ. ამ გამომძიებელსაც თურმე ისეთი დაშტამპული კითხვარი მიაწოდეს, რაც ამ კომპანიის თანამშრომლებისთვის უნდა დაესვათ. ეს არ არის პირდაპირი მტკიცებულება, რომ დანაშაულს ფარავდნენ? ეს სწორედ იმის აღიარებაა, რომ თავიდანვე გაყალბდა ყველაფერი. თამუნა სახლში არასდროს ლაპარაკობდა სამსახურზე, ქოლ - ცენტრში მომუშავე რომელი ბავშვი ამბობს, ქოლ - ცენტრში ვმუშაობო, ყველას უკრძალავენ ამაზე ლაპარაკს. მას სავარაუდოდ ჰქონდა, ან ხელში ჩაუვარდა ისეთი ინფორმაცია, რაც არ უნდა სცოდნოდა და ამას შეეწირა კიდეც. დღეს უკვე იმასაც გამოვრიცხავ, რომ ის თვითმკვლელობამდე მიიყვანეს, ერთადერთი ვერსია მაქვს - თამუნა მოკლეს. ამათ ორმაგი დანაშაული ჩაიდინეს - მოკლეს და მერე ცილი დასწამეს თვითმკვლელობაზე. მაინც ვფიქრობ, რომ ჩემი შვილის მკვლელობა მის საქმიანობასა და სამსახურს უკავშირდება.

სტრასბურგიდან ჯერ პასუხი არ გვაქვს. ახალი გარემოებების გამო ვალდებულები არიან, გამოძიება ხელახლა დაიწყონ. ამ პირობებში არ მჯერა, რომ სიმართლე დადგინდება, მაგრამ მჯერა, ოდესღაც გაირკვევა ყველაფერი, ჩვენ ყველაფერს ვცდით... გამოძიება თუ არ დაიწყება, ესეც მათ საწინააღმდეგოდ იმუშავებს... ნორმალური ქვეყნების სიაში თუ ვართ, ახალი გარემოებების საფუძველზე ხელახალი გამოძიება უნდა დაიწყოს.“