"დაუჯერებელი ამბავი ხდება... ნუცა, გგულშემატკივრობთ მთელი ოჯახით" - ცნობილი ქართველების ვიდეომიმართვები, ნუცა ბუზალაძის მხარდასაჭერად
ნუცა ბუზალაძის ამერიკული წარმატება გრძელდება. ქართველი მომღერალი პოპულარული ამერიკული კონკურსის, American Idol-ის 12 საუკეთესო მონაწილეს შორისაა. წინა ტურში ნუცას ხმები არ ეყო და ჟიურიმ გადაარჩინა, რის შედეგადაც 24 კონკურსანტიდან ის 12 საუკეთესოში მოხვდა. ამჯერად ყველაფერი გულშემატკივრების მხარდაჭერაზეა დამოკიდებული. ნუცამ დღეს მიმართვაც გაავრცელა და საზოგადოებას აქტიურობისკენ მოუწოდა.
"უკვე ჟიური ვერ გადაარჩენს რჩეულს, ასე რომ, მთლიანად თქვენ იმედზე ვარ!" - დაწერა ნუცამ. (წაიკითხეთ: "უკვე ჟიური ვერ გადაარჩენს რჩეულს, ასე რომ, მთლიანად თქვენ იმედზე ვარ" - ნუცა ბუზალაძე გულშემატკივარს მიმართავს)
- ხმის მიცემის ისნტრუქცია - მაქსიმუმ 10 ხმა - ონლაინ მისამართზე AmericanIdol.com/vote
- მაქსიმუმ 10 ხმა - სპეციალური აპლიკაციით: American Idol app
- მაქსიმუმ 10 ხმა ტექსტური შეტყობინებით ნომერზე 21523 (ერთმა ადამიანმა ჯამში 30 ხმა შეიძლება რომ გამოაგზავნოს
უამრავი ცნობილი ადამიანი ავრცელებს ნუცას მხარდამჭერ ვიდეოებს, რომელიც "ბრავო რეკორდის" დამფუძნებლის ზაზა შენგელიას "ფეისბუქის" გვერდზე ვრცელდება. მათ შორის არიან სპორტისა და კულტურის სფეროს წარმომადგენლები.
"ჩვენო საყვარელო ნუცა, ვართ შენს გვერდზე, გისურვებთ წარმატებებს" - ამბობს ვიდეომიმართვაში პრიმა ბალერინა, ნინო ანანიაშვილი, რომელიც სახელმწიფო საბალეტო დასთან ერთად ამერიკის შეერთებულ შტატებში წარმატებულ საგასტროლო ტურნეს ატარებს.
კალათბურთელი სანდრო მამუკელაშვილი: "ყველას ძალიან გვიხარია ნუცას წარმატება, უმაგრესი ადამიანი და მომღერალია. მადლობა, რომ კიდევ ერთხელ გააჟღერა საქართველოს სახელი უმაღლეს სცენაზე და ყველას აჩვენა, რა მებრძოლი ერი ვართ, წარმატებები!"
UFC ორთაბრძოლების მრავალგზის ჩემპიონი მერაბ დვალიშვილი ინსტაგრამზე ნუცა ბუზალაძის მხარდამჭერ პოსტს აქვეყნებს და მოუწოდებს ყველას American Idol-ში ხმა მისცენ ნუცას
შოთა არველაძე, ვეტერანი ფეხბურთელი: "მინდა დიდი სიამაყით გაცნობოთ, რომ ნუცა ბუზალაძე, როგორც უცხოელი, მოხვდა 12 საუკეთესოს შორის. მინდა ყველას გთხოვოთ, რომ შემოგვიერთდეთ და ვუგულშემატკივროთ ნუცას, რომ მან კიდევ ბევრი სასწაული მოახდინოს"
გიორგი შერმადინი, ქართველი კალათბურთელი: "ძალიან გთხოვთ ხმა მივცეთ და გვერდში დავუდგეთ ნიჭიერ და მაგარ მომღერალს ნუცა ბუზალაძეს"
ზურა ხიზანიშვილი, ვეტერანი ფეხბურთელი: "ნუცა, დიდი წარმატება მინდა გისურვო, დარწმუნებული ვარ, გადახვალ შემდეგ ეტაპზე, ვამაყობ, რომ ვარ ქართველი. შენ ბევრი რამ შეძელი. ძალიან მაგარი გოგო ხარ. გგულშემატკივრობთ მთელი ოჯახი".
ზაალ კოკაია, ქართველი მეცნიერი, შვედეთის ქალაქ ლუნდის უნივერსიტეტის მკვლევართა ჯგუფის წევრი: "დაუჯერებელი ამბავია, პირველად ხდება, რომ უცხოელი მონაწილე ფინალშია. ნუცას დიდი წარმატება მინდა ვუსურვო და ამაში ჩვენც უნდა შევუწყოთ ხელი, უნდა დავურეკოთ და ჩვენი ზარებით მხარი დავუჭუროთ არაჩვეულებრივ ნუცას".