“სრულიად აპოლიტიკურები ვართ, ვითხოვ მედიკამენტს... არავინ გაბედოს, რაიმეს "მოკერება" - თბილისში აქონდროპლაზიით დაავადებული ბავშვების მშობლების მხარდამჭერი მარში მიმდინარეობს
აქონდროპლაზიის დაავადების მქონე ბავშვების მშობლები და მოქალაქეები მთავრობის ადმინისტრაციის შენობიდან თავისუფლების მოედნამდე საპროტესტო მარშს მართავენ.
საპროტესტო მსვლელობას მოქალაქეებთან ერთად ჯანდაცვის სფეროს სპეციალისტები, სხვადასხვა დაავადებების მქონე ბავშვების მშობლები, პოლიტიკოსები და სამოქალაქო აქტივისტები შეუერთდნენ.
მშობლები მთავრობას სთხოვენ, ქვეყანაში აქონდროპლაზიით დაავადებული ბავშვებისთვის საჭირო მედიკამენტის შემოტანას და დაფინანსებას, რომელიც ბავშვების ჯანმრთელობისთვის სასიცოცხლოდ მნიშვნელოვანია.
ასევე, ისინი პრემიერ-მინისტრ, ირაკლი ღარიბაშვილთან შეხვედრას ითხოვენ.
"ოთხი ღამეა, 24 საათი ქუჩაში დედები ღამეს ვათევთ. ვეხვეწებით, ვემუდარებით და ვტირით, რომ საქართველოს პრემიერ-მინისტრი შეგვხვდეს. ამ ბავშვებს სიცოცხლესთან შეუთავსებელი პრობლემები აქვთ, ამიტომ ჩვენ შვილებს ჩვენი დახმარება სჭირდებათ. იმედი მაქვს, პრემიერ-მინისტრი მთელ საქართველოს ანახებს, რომ ქართველი ბავშვები მართლა უყვარს და მათ არ გაწირავს”,- აცხადებს აქონდროპლაზიის დიაგნოზის მქონე ერთ-ერთი ბავშვის მშობელი, ქეთევან ბეგიაშვილი.
მშობლებითბილისის ოპერისა და ბალეტის თეატრის მიმდებარედ შეჩერდნენ.
აქციის მონაწილეების ინფორმაციით, ოპერისა და ბალეტის თეატრში მიმდინარეობს ღონისძიება, რასაც მთავრობის წარმომადგენლები ესწრებიან.
“ჩვენ ხალხნო გვემღერება? დგანან და ბინძურ პოლიტიკას ავრცელებენ. გამობრძანდნენ და გვერდით დაგვიდნენ”, - განაცხადა აქონდროპლაზიის დიაგნოზის მქონე ერთ-ერთი ბავშვის მშობელმა, ქეთევან ბეგიაშვილმა.
მარშის ერთ-ერთი მონაწილის თქმით, მთავრობის წარმომადგენლები ცრუ ინფორმაციას ავრცელებენ.
“სრულიად აპოლიტიკურები ვართ, ვითხოვ მედიკამენტს, არავინ გაბედოს რაიმე პოლიტიკური მოკერება. ჩვენ გვერდით ყველა სიმართლის მოყვარეს გვერდით დავიყენებთ”, - განაცხადა აქციის ერთ-ერთმა მონაწილემ.
აქციის მონაწილეები სკანდირებენ: “წამალი”, “წამალი შემოიტანეთ,” “სოლიდარობა ბავშვებს.”
ადგილზე მობილიზებულია საპატრულო პოლიცია.
- რას აცხადებენ ჯანდაცვის სამინისტროში
-
მეტი სამუშაო და მეტი დრო ჭირდება "ვოსორიდიტის“ ქვეყანაში დანერგვის ეტაპების დადგენას, ასევე მოლაპარაკებას მწარმოებელთან და ჩვენ პარტნიორებთანაც, იმისთვის რომ ქვეყანაში პრეპარატის შემოტანა იყოს უსაფრთხო, - ამის შესახებ ჯანდაცვის მინისტრის მოადგილემ თამარ გაბუნიამ განაცხადა.
მისი თქმით, მედიკამენტმა დაადასტურა, რომ მას შეუძლია დადებითი ზეგავლენა ჰქონდეს ძვლის ზრდის ტემპზე და გარკვეული ზომიერი კლინიკური ეფექტი აქვს, რაც აღნიშნულია ევროპის სხვადასხვა ქვეყნის ჯანმრთელობის ტექნოლოგიების შეფასების ანგარიშებში, თუმცა იქვე არის აღნიშნული, რომ გრძელვადიანი შედეგები არ არის დადგენილი და შესაბამისად ამ მიმართულებით კვლევები გრძელდება.
"ჩვენ ჯანმრთელობის მსოფლიო ორგანიზაციას ხშირად მივმართავთ სხვადასხვა შემთხვევებში. დღეს, იქიდან გამომდინარე, რომ ვოსორიდიტი ადრეული ეტაპის პრეპარატია, ჯანმრთელობის მსოფლიო ორგანიზაციას მასთან მიმართებაში ჯერჯერობით არ აქვს არც რეკომენდაცია და არც გაიდლაინი სტანდარტული სახით შეტანილი არ არის. სწორედ ამიტომ არის მეტი სამუშაო და მეტი დრო ჭირდება "ვოსორიდიტის“ ქვეყანაში დანერგვის ეტაპების დადგენას, ასევე მოლაპარაკებას მწარმოებელთან და ჩვენ პარტნიორებთანაც, იმისთვის რომ ქვეყანაში პრეპარატის შემოტანა იყოს უსაფრთხო. ეს პროცესი დაიწყო უკვე რამდენიმე თვეა, ჩვენ აქტიურად ვმუშაობთ ამაზე და კიდევ გარკვეული ეტაპები უნდა გავიაროთ იმისთვის, რომ თამამად გადავდგათ "ვოსორიდიტის“ ქვეყანაში შემოტანის ნაბიჯი“, - აღნიშნა თამარ გაბუნიამ.
ჯანდაცვის მინისტრის მოადგილის განცხადებით "ვოსორიდიტი“ ინოვაციური და პირველი მედიკამენტია, რომელიც აქონდროპლაზიისთვის გაჩნდა.
მისივე თქმით, ძალიან დიდი ინტერესია დღეს ამ მედიკამენტის გარშემო და სწორედ ამით იხსნება ის ფაქტი, რომ ამერიკის წამლის სააგენტომ "ვოსორიდიტს“ მიანიჭა დაჩქარებული წესით ავტორიზაცია.
თამარ გაბუნიამ აღნიშნა, რომ ავტორიზაცია, ქვეყნების დონეზე, უპირობოდ მის აღიარებას არ ნიშნავს, რადგან თითოეული ქვეყანა კიდევ უფრო დეტალურად სწავლობს მედიკამენტის მოსალოდნელ ეფექტსა და გვერდით რეაქციებს.