"დათრგუნული ყოფილა, სასწრაფოს გამოძახება დამჭირდაო... მეუღლეს "ჩემი ცოლის დაქალები" ჩაურთავს, საკუთარ თავზე ხალისობდაო" - ბესო მეგრელიშვილის ცხოვრება თეატრში და სცენის მიღმა

58 წლის ასაკში მოულოდნელად გარდაიცვალა ნოდარ დუმბაძის სახელობის მოზარდ მაყურებელთა თეატრის წამყვანი მსახიობი, სახელმწიფო პრემიის ლაურეატი ბესარიონ (ბესო) მეგრელიშვილი.

"უმძიმესი დილა გაუთენდა მოზარდ მაყურებელთა თეატრს! მოულოდნელად გარდაიცვალა ჩვენი თეატრის წამყვანი არტისტი ბესო მეგრელიშვილი! სიტყვები უძლურია - 31 მარტს და 1 აპრილს სპექტაკლები ითამაშა, ხუმრობანარევად წაიწუწუნა - რაღაც ვერ ვარ კარგადო, წნევები შემომეჩვიაო... ვაჰ... ჯერ მეტს ვერაფერს ვწერ!" - წერს სოციალურ ქსელში თბილისის ნოდარ დუმბაძის სახელობის მოზარდ მაყურებელთა თეატრის სამხატვრო ხელმძღვანელი დიმიტრი ხვთისიაშვილი.

დიმიტრი ხვთისიაშვილი:

- ბესო 58 წლის იყო, ოქტომბერში გახდებოდა 59 წლის... 1989 წელს თეატრალურ ინსტიტუტში ჩავაბარე, ბესომ კი იმ წელს დაამთავრა. ოთხი წლით ჩემზე დიდი იყო. ერთი და იგივე პედაგოგი - ლილი იოსელიანი გვასწავლიდა და იქიდან გამომდინარე, რომ სტუდენტები საკუთარ პედაგოგებზე ეჭვიანობენ, ჩვენ რომ პირველ კურსზე ვიყავით, ბესოს ჯგუფის სტუდენტები ლექციებზე გვესწრებოდნენ. ბესოს იქიდან მოყოლებული ვიცნობდი, უკვე 34-ე წელი... შემოქმედებითად კი, ათი წლის წინ დავინიშნე ამ თეატრის სამხატვრო ხელმძღვანელად და იმის შემდეგ გადავიკვეთეთ... მანამდე ვმეგობრობდით და მახსოვს მისი სადიპლომო, საკურსო სპექტაკლები... როლებს საკმაოდ საინტერესოდ განასახიერებდა. ერთგვარი ვარსკვლავური ჯგუფი იყო, რადგან ჯგუფელები იყვნენ - ლელა ალიბეგაშვილი, გია როინიშვილი, მიშა გომიაშვილი... მიშა გარდა იმისა, რომ ბესოს ჯგუფელი იყო, მისი ბიძა იყო, მამამისის ნახევარძმა. სამწუხაროდ, ასე გამოვიდა, რომ ბიძამისს კუდში მიჰყვა... ჩვენ ერთად ოთხ სპექტაკლზე ვიმუშავეთ...ახლა ძალიან მნიშვნელოვან რეპეტიციებს გავდიოდით. ანტონ კათალიკოსის როლი უნდა ეთამაშა, სამწუხაროდ, არ დაგვცალდა.

- ჯანმრთელობის პრობლემები ჰქონდა?

- დიახ, მას c ჰეპატიტი ჰქონდა, მკურნალობდა, პროგრამაშიც იყო და თითქოს ყველაფერი წესრიგში იყო...ოჯახმა ცხედრის გაკვეთაზე უარი თქვა და ამიტომ დაზუსტებით ვერ ვიტყვით, მაგრამ ვარაუდობთ, რომ თრომბით გარდაიცვალა, ღვიძლის პრობლემებით გამოწვეული.

მისი გარდაცვალება უეცარი იყო, რადგან 31 მარტს სპექტაკლებში როლები ჩვეულებრივად ითამაშა... გუშინწინ დამირეკა, მელაპარაკა, ამ ბოლო დროს რატომღაც წნევები მაწუხებსო... ვუთხარი, ექიმთან უნდა წახვიდე და მარეგულირებელს დაგინიშნავს-მეთქი... მითხრა, შენსავით ბებერი კი არ ვარ, მარეგულირებელი რომ ვსვაო, აი ასე მაშაყირებდა... ვეუბნებოდი, წნევას ნუ ეთამაშები-მეთქი.

მის მეუღლეს რომ ველაპარაკე, ამბობდა, შუადღეს წნევა ორასამდე ჰქონდა, ჩვეულებრივი კრიზისი იყო, სასწრაფო გამოვიძახეთ, კარდიოგრამაც გადაუღეს და წნევაც ჩამოუყვანესო... ღვიძლი აწუხებდა და ეტყობა წნევებიც ღვიძლისგან იყო გამოწვეული... წარმოიდგინეთ, დღეს 11 აპრილია და ათი დღის წინ უზარმაზარ ორ სპექტაკლში ითამაშა. ერთ სპექტაკლში მარტო ბესო და ია შუღლიაშვილი იყვნენ სცენაზე...

- თეატრში მნიშვნელოვანი წვლილი ჰქონდა, მაგრამ საყოველთაოდ ხალხმა ტელესერიალით "ჩემი ცოლის დაქალები" გაიცნო... თავად მისთვის რას ნიშნავდა ამ სერიალში მონაწილეობა?

- სიმართლე გითხრათ, ტელესერიალებში მონაწილეობა მსახიობებისთვის დამატებითი შემოსავალია. ვერ გეტყვით, რომ არტისტები დიდი ბედნიერებით იღებდნენ მონაწილეობას... სხვათა შორის, მისი მეუღლე მიყვებოდა, სასწრაფო რომ წავიდა, ძალიან დათრგუნული ჩანდა, სასწრაფო დამჭირდა, ორასი წნევა, ამ ყველაფერზე ცოტა ნერვიულობდა და ვუთხარი "იუთუბზე" "ჩემი ცოლის დაქალებს" ჩაგირთავ, ხომ გაინტერესებს ახალგაზრდა როგორი იყავიო და სამი -ოთხი სერია უყურა, თავის თავზე ძალიან ხალისობდაო ...

ჩვენი თეატრისთვის 11 აპრილი უმძიმესი დღეა. კოტე თოლორდავას გარდაცვალების დღეა, 8 წელი შესრულდა... დღეს კიდევ უთენია რომ დამირეკა მისმა ძმამ და მითხრა, ასეთი უბედურება დაგვატყდა თავს, ბესო აღარ გვყავსო, ინფორმაცია არ მივიღე... ისე ველაპარაკე, რომ ვერც მივხვდი რას მეუბნებოდა. გონებამ ვერ კი არა, არ მიიღო, არ დაუშვა!

როგორ დავიჯერებდი, როცა ბოლოს ხარებას, სამი დღის წინ ველაპარაკე და დღესასწაული მივულოცე...ცხრა აპრილს შემოსული ზარი დამხვდა, ეტყობა ბზობა უნდოდა მოელოცა. ძალიან გვიან ვნახე მისი ზარი და სამწუხაროდ, ვეღარ ვუპასუხე... გუშინ ბორჯომში მივლინებით ვიყავი და ამიტომ შეხმიანება კიდევ ვერ მოვახერხე. 7 აპრილს კი ვუთხარი, 22 აპრილს ხომ იცი, სპექტაკლი გაქვს, მე საზღვარგარეთ მივდივარ, ზუსტად 22 აპრილს ჩამოვალ ჩემს დაბადების დღეზე და ისე უნდა ითამაშო, ეს სპექტაკლი, მე მომიძღვნა-თქო... ამ თემაზეც შაყირობდა, 50 წელს რომ გადავცდებით, მერე მისაძღვნელი აღარაფერიაო... ბოლოს ისევ ვთხოვე, ექიმთან მისულიყო, მარეგულირებელი დაენიშნათ და ჰო, კარგიო, დამპირდა...

- მის ოჯახზე, შვილებზე რომ გვითხრათ...

- როგორც ბევრ, ბოჰემის მოყვარულ მამაკაცს, ბესოსაც რამდენიმე ოჯახი ჰყავდა... მისი ახლანდელი მეუღლე პროფესიით მსახიობია, ჩვენს თეატრშიც მოღვაწეობდა - ეკა თვაური. მასთან ქორწინებაში გოგონა ჰყავს. ბესო 18 წლის იყო, მამა რომ გახდა. პირველ მეუღლესთან ჰყავს ქალიშვილი და მას უკვე ორი შვილი ჰყავს. მეორე მეუღლესთან ვაჟი ჰყავს, რომელმაც უკვე ინსტიტუტი დაამთავრა და აიტის სპეციალისტია.

ბესო მეგრელიშვილმა 1985 წელს დაამთავრა შოთა რუსთაველის სახელობის თეატრალური ინსტიტუტი (პროფ. ლილი იოსელიანის კლასი). ინსტიტუტის დასრულებისთანავე მუშაობა დაიწყო მოზარდ მაყურებელთა თეატრში. პირველივე სპექტაკლში "ბედნიერი ბილეთი" მიიქცია საზოგადოებისა და თეატრმცოდნეების ყურადღება.

შალვა გაწერელიას თეატრიდან წასვლის შემდეგ, მუშაობა განაგრძო სანდრო ახმეტელის სახელობის თეატრში, რეჟისორ ალექსანდრე ქანთარიასთან. სწორედ მასთან ტანდემში შექმნა გამორჩეული, დასამახსოვრებელი მხატვრული სახეები სპექტაკლებში: "დემეტრე მეორე", "კარს იქეთ", "შავი კატა", "ტაძარი", "ხედი ხიდიდან" და მრავალი სხვა, ხოლო სპექტაკლში "ლაბირინთი" ბაბილას როლის შესრულებისათვის საქართველოს სახელმწიფო პრემიის ლაურეატი გახდა. ბესო მეგრელიშვილი ცალკეულ სპექტაკლებს თამაშობდა კოტე მარჯანიშვილის სახელობის თეატრში, აგრეთვე მეტეხის, რუსთავის, თავისუფალ, სამეფო უბნის თეატრებში, თეატრალურ სარდაფში. 2002 წლიდან კვლავ მოზარდ მაყურებელთა თეატრს დაუბრუნდა.

მონაწილეობდა სპექტაკლებში: "ბარონი მიუნჰაუზენი" - მიუნჰაუზენი, "რომეო და ჯულიეტა" - ჰერცოგი, "ტრამალთა რისხვა" - ბილი, "მგზნებარე შეყვარებული" - ბარნი ქეშმენი, "მე ვხედავ მზეს" - ლუკაია, "მე, ბებია, ბაბუა და ჭინკები" - მწერალი, "სიმარტოვე" - ლუკა და მრავალი სხვა. უკანასკნელად ამ რამდენიმე თვის წინ პანტალონეს როლი შეასრულა სპექტაკლში "ჭორიკანა ქალები". ბესო მეგრელიშვილი აქტიურად თანამშრომლობდა კინემატოგრაფისტებთან. გადაღებულია ფილმებში: "მეტიჩარა", "უძინართა მზე", "შეყვარებული კულინარის 1001 ეფექტი", "თბილისი-თბილისი" და სხვა, ტელესერიალებში: "ჩემი ცოლის დაქალები", "ყავა და ლუდი", "ჩვენი ოფისი", "ჩიფსების თაობა", "კლინიკა" და სხვა. მისთვის განსაკუთრებული იყო ინტეგრირებულ თეატრთან "აზდაკის ბაღთან" თანამშრომლობა.

• AMBEBI.GE მწუხარებას გამოთქვამს ბესო მეგრელიშვილის გარდაცვალების გამო და სამძიმარს უცხადებს მის ოჯახს, ახლობლებსა და თეატრალურ სამყაროს