"ჩემი სახლი უშენოდ ცარიელია..." - საბერძნეთში გარდაიცვალა ქართველი ემიგრანტი, რომელიც ცნობილი ჟურნალისტის ოჯახში მუშაობდა: ტელეწამყვანი პირდაპირ ეთერში ატირდა

საბერძნეთში ავარიის შედეგად გარდაიცვალა ქართველი ემიგრანტი, თერჯოლის მკვიდრი 66 წლის მედეა შუღლაძე. როგორც ბერძნული მედიიდან ხდება ცნობილი, გარდაცვლილი ბერძენი ტელეწამყვანის კატერინა კენურიუს ოჯახში წლების განმავლობაში მუშაობდა.

ტელეწამყვანმა, რომელსაც გუშინ პირდაპირ ეთერში აცნობეს ქართველი ემიგრანტის გარდაცვალების შესახებ, ცრემლების შეკავება ვერ შეძლო, თუმცა გადაცემის წაყვანა მაინც გააგრძელა.

მან აღნიშნა, რომ ქართველი ქალი მისთვის ოჯახის წევრივით იყო და ტრაგიკულმა ცნობამ მასზე მძიმედ იმოქმედა.

“მშვიდად განისვენე, არასოდეს დაგივიწყებ, ჩემო საყვარელო ქალბატონო, რადგან საკუთარ შვილზე მეტად მიფრთხილდებოდი. ულამაზესი სული გქონდა, სიყვარულით, რწმენითა და სიკეთით სავსე. შენ მე უკეთესი ადამიანი გამხადე, უკვე ძალიან მენატრები და ჩემი სახლი უშენოდ ცარიელია…

სიტყვებს არ შეუძლიათ ცრემლების შეშრობა… არასოდეს დაგივიწყებ! მადლობა ყველაფრისთვის! მოდი ხოლმე და ისევ მომეცი რჩევები, როგორც ყოველთვის…” - დაწერა სოციალურ ქსელში მოგვიანებით ტელეწამყვანმა.