თურქეთის პარლამენტმა ფინეთის ნატო-ში გაწევრიანების რატიფიცირება მოახდინა
თურქეთის პარლამენტმა დაამტკიცა კანონპროექტი, რომელიც ფინეთს ნატო-ში გაწევრიანების უფლებას აძლევს, - ინფორმაციას Reuters-ი ავრცელებს.
ამრიგად, თურქეთი გახდა ალიანსის წევრი ბოლო, 30-ე ქვეყანა, რომელმაც ფინეთის ნატო-ში გაწევრიანების რატიფიცირება განახორციელა, მას შემდეგ რაც რამდენიმე დღის წინ უნგრეთმა მსგავსი გადაწყვეტილება მიიღო.
"ნატო-ს წევრობა გააძლიერებს ფინეთის უსაფრთხოებას და გააუმჯობესებს სტაბილურობას და უსაფრთხოებას ბალტიის ზღვის რეგიონსა და ჩრდილოეთ ევროპაში“, - ნათქვამია ფინეთის მთავრობის განცხადებაში, რომელიც თურქეთის პარლამენტში გამართული კენჭისყრის შემდეგ გავრცელდა.
ფინეთმა და შვედეთმა ნატო-ში გაწევრიანებაზე განაცხადი შარშან, რუსეთის მიერ უკრაინაში შეჭრის საპასუხოდ გააკეთეს. ნებისმიერი ქვეყნის ალიანსში გასაწევრიანებლად საჭიროა, მისი განაცხადის რატიფიცირება ნატო-ს ყველა წევრის პარლამენტებმა მოახდინოს.
- აღნიშნულ თემაზე უკვე პირველი კომენტარი გააკეთა ნატო-ს გენერალურმა მდივანმა, იენს სტოლტენბერგმა.
მივესალმები თურქეთის დიდი ეროვნული ასამბლეის კენჭისყრას ფინეთის გაწევრიანების რატიფიკაციის დასასრულებლად, - ამის შესახებ ნატო-ს გენერალური მდივანი, იენს სტოლტენბერგი “ტვიტერზე“ წერს.
მისი თქმით, ფინეთის გაწევრიანება "ნატო-ს მთელ ოჯახს უფრო ძლიერს და უსაფრთხოს გახდის“.