"მოგესალმებით საქართველოში" - რა ინფორმაციას ავრცელებს ანალენა ბერბოკის თბილისში ვიზიტზე გერმანიის საელჩო
გერმანიის საგარეო საქმეთა მინისტრი ანალენა ბერბოკი თბილისში იმყოფება. ბერბოკის ვიზიტის შესახებ საქართველოში გერმანიის საელჩო წერს:
"მოგესალმებით საქართველოში!
გერმანიის საგარეო საქმეთა მინისტრი ანალენა ბერბოკი გუშინ საღამოს თბილისში ჩამოფრინდა. დღეს მინისტრს დატვირთული პროგრამის ფარგლებში ელის შეხვედრები მთავრობის, პოლიტიკური პარტიებისა და სამოქალაქო საზოგადოების წარმომადგენლებთან.
გარდა ამისა, მინისტრი ისაუბრებს სტუდენტებთან საქართველოს ევროპული მომავლის შესახებ.
ქალბატონი ბერბოკის მთავარი გზავნილია: გერმანია დიდი ძალისხმევით გააგრძელებს საქართველოს მხარდაჭერას ქვეყნის ევროკავშირთან და ნატო-სთან დაახლოების გზაზე და ამისათვის საჭირო რეფორმების გატარებისას", - ნათქვამია გამოქვეყნებულ ინფორმაციაში.