"ქართველი პოლიტიკოსების მოსმენაზე ძალიან მცირე დროს ვკარგავ" - რა განცხადებას ავრცელებს ვანო მერაბიშვილი
შინაგან საქმეთა ყოფილი მინისტრი, ვანო მერაბიშვილი "ფისბუქის" ოფიციალურ გვერდზე განცხადებას ავრცელებს:
"მიუხედავად იმისა რომ საქართველოში არ ვიმყოფები და ზოგადადაც, ჩემს ყოველდღიურობაში ქართველი პოლიტიკოსების მოსმენაზე ძალიან მცირე დროს ვკარგავ, მაინც მომხვდა თვალში ქ. ოცნების კომიკური მცდელობა - ყველგან და ყოველთვის, უკონტექსტოდ და ფეიქ ნიუსებით ახსენონ ვანო მერაბიშვილი.
კიდევ ერთხელ, მე არ ვარ საჯარო პოლიტიკაში, მაგრამ ვარ საქართველოს პატრიოტი.
ჩემ სახელის თვითმიზნური ხსენება და ტყუილების მოგონება ვერ შეცვლის რეალობას.
რეალობა არის ის რომ საქართველო იქნება ევროპაში, ერთიანი და მშვიდობიანი", - წერს ვანო მერაბიშვილი.
- ცნობისთვის, მანამდე მან Ukrinform-ის მედიაცენტრში გამართულ დისკუსიაზე "SAVE MISHA” თქვა, რომ მასობრივი საპროტესტო აქციების დაწყებას აპირებენ. მერაბიშვილის თქმით, მთავარი მიზანია, მთავრობის შეცვლა.
"ვაპირებთ და დარწმუნებული ვარ, ქართული საზოგადოება დაგვიჭერს მხარს, მასობრივი საპროტესტო აქციები დავიწყოთ. რა თქმა უნდა, ჩვენი მთავარი მიზანია მთავრობის შეცვლა და პროდასავლური, პროუკრაინული მთავრობის მოსვლა საქართველოში, რომ უკრაინა არ იყოს მარტო იმიტომ, რომ ჩვენ პრაქტიკულად მოკავშირეები ვართ”, - განაცხადა მერაბიშვილმა.
მერაბიშვილის თქმით, საქართველომ და უკრაინამ ერთად უნდა იზეიმონ, რუსეთზე გამარჯვება, ასევე ევროკავშირსა და ნატო-ში გაწევრიანება.
მერაბიშვილის განცხადებით, დარწმუნებულია, რომ „გაზაფხული და ზაფხული იქნება საინტერესო საქართველოს პრობლემების გადაწყვეტისთვის“.