როცა ოკუპანტის მეზობელი ხარ - ფინეთი რუსეთის საზღვარზე 3 მეტრის სიმაღლის ღობის მშენებლობას იწყებს
ფინეთმა რუსეთის საზღვარზე ღობის მშენებლობა დაიწყო. მიზანი უსაფრთხოების ზომების გაძლიერებაა რუსეთის უკრაინაში შეჭრის შემდეგ მასობრივი მიგრაციის და ნებისმიერი შეიარაღებული დაპირისპირების მცდელობის დასაძლევად.
- ფინეთის ხელისუფლებაში აცხადებენ, რომ პირველ ეტაპზე სამუშაოები დაიწყება ტყის გაწმენდით, მოეწყობა გზა და მარტის ბოლოსთვის ღობის მონტაჟის შესაძლებლობა იქნება.
იმის შიშით, რომ მოსკოვმა შესაძლოა, მასობრივი მიგრაცია სამომავლოდ ჰელსინკზე პოლიტიკური ზეწოლის განსახორციელებლად გამოიყენოს, ფინეთმა საზღვრის დაცვის კანონში გასული წლის ივლისში ცვლილებები შეიტანა, რათა ხელი შეეწყოთ უფრო მტკიცე ღობის აშენებისთვის.
ამჟამად ფინეთის საზღვრები დაცულია ხის მსუბუქი ღობით, რომელიც ძირითადად შექმნილია იმისთვის, რომ პირუტყვის გადასვლას შეუშალოს ხელი.
ახალი ღობის პირველი ნაწილის მშენებლობა დაახლოებით, ივნისის ბოლოს დასრულდება.
მთლიანობაში, ფინეთი გეგმავს რუსეთთან საზღვრის 200 კილომეტრის შემოღობვას. პროექტის ღირებულება დაახლოებით, 380 მილიონი ევროა.
ღობე იქნება სამი მეტრის სიმაღლის, მისი ზედა ნაწილი იქნება მავთულის, განსაკუთრებით სახიფათოდ მიჩნეული ადგილები აღჭურვილი იქნება ღამის ხედვის კამერებით და განათებით.