ვერიფიკაცია "ფეისბუქსა" და "ინსტაგრამზე" ყველასთვის შესაძლებელი ხდება - ფასი თვეში 11.99 დოლარიდან დაიწყება

Facebook-ის და Instagram-ის მშობელი კომპანია, Meta, ახალ სერვისს ამატებს, რომელიც ამ ორი პლატფორმის მომხმარებლებს საშუალებას მისცემს, გარკვეული საფასურის სანაცვლოდ, ვერიფიკაცია მიიღონ. ინფორმაცია თავად მარკ ცუკერბერგმა გაავრცელა "ინსტაგრამის" საშუალებით.

"Meta Verified“-ის ფასი თვეში 11,99 აშშ დოლარიდან დაიწყება. თავდაპირველად ახალი წესი ავსტრალიასა და ახალ ზელანდიაში ამოქმედდება.

სერვისი ასევე მოიცავს დამატებით დაცვა "ფეიკ" ანგარიშებისგან და პირდაპირ წვდომას სოციალური ქსელის მომხმარებლების დამხმარე გუნდთან.

ყალბი ანგარიშების შექმნისგან თავის ასარიდებლად, ვერიფიკაციის მსურველებს მოუწევთ ID ნომრის წარდგენა, აგრეთვე, ვერიფიკაციის მსურველები 18 წელს გადაცილებულები უნდა იყვნენ, რომ სერვისით სარგებლობა შეძლონ.

"ახალი ფუნქცია ჩვენი სერვისების ავთენტურობისა და უსაფრთხოების გაზრდის მიზნით დავამატეთ",- აცხადებს ცუკერბერგი.

"მეტას" გადაწყვეტილებით, იმ ანგარიშებისთვის, რომლებიც უკვე ვერიფიცირებულია, არაფერი შეიცვლება.

"ვერიფიკაციის ლურჯი ნიშნის მნიშვნელობას იმისთვის ვავითარებთ, რომ ფოკუსი ავთენტურობაზე მოვახდინოთ და უფრო მეტ ადამიანს ჰქონდეს ამ ფუნქციაზე წვდომა", - ამბობს "ფეისბუქის" დამფუძნებელი.

აღსანიშნავია, რომ Twitter-მა ჯერ კიდევ დეკემბერში განაახლა ვერიფიკაციის სერვისი. მას შემდეგ, რაც Twitter Blue-ს შეძენა ყველასთვის ხელმისაწვდომი გახდა, ფეიკ ანგარიშებმა იმატა, ამიტომ მასკის მართულმა პლატფორმამ კიდევ ერთხელ განაახლა სერვისი. ახლა სხვადასხვა ფერით ხდება ვერიფიცირებული ანგარიშების დახარისხება: კომპანიებს ოქროსფერი ნიშანი აქვთ, სახელმწიფო უწყებებს და სხვა ორგანიზაციებს ნაცრისფერი, ადამიანებს კი ლურჯი, განურჩევლად იმისა, არიან თუ არა ისინი ცნობილები. Twitter Blue-ს ყოველთვიური ფასი 11 დოლარია.

წყარო: cnn

მოამზადა: ანა სიბოშვილმა