"სამართლებრივი აბსურდი გრძელდება" - ხაზარაძე-ჯაფარიძე-წერეთლის საქმეზე სააპელაციო სასამართლოს მიერ მიღებული გადაწყვეტილება უზენაესში გასაჩივრდება
"ლელოს“ ლიდერის მამუკა ხაზარაძის განცხადებით, ის, რაც პირველმა ინსტანციამ და დღეს უკვე სააპელაციო სასამართლომ მათ საქმესთან დაკავშირებით დაადასტურა, ეს არის სამართლებრივი აბსურდი.
"ეს სამართლებრივი აბსურდი გრძელდება, ეს არის უპრეცედენტო რამ. ის, რაც პირველმა ინსტანციამ და დღეს უკვე სააპელაციო სასამართლომ დაადასტურა, ეს არის სამართლებრივი აბსურდი. გვედავებიან იმ საქმეზე, რომელზეც პროკურატურას წერილობით აქვს, ჯერ კიდევ 4 წლის წინ, დადასტურებული, რომ ამ საკითხთან დაკავშირებით მათ პრეტენზია არ გააჩნიათ. ამ საკითხზე რომც ჰქონოდათ რაიმე პრეტენზია, წერილობით აქვთ დადასტურებული, რომ ამაზე არ გვედავებიან და არ გვედავებოდნენ, არც გვიკამათია ამ საკითხზე. რაზეც ბრალს გვდებენ, აბსოლუტურად ნონსენსია. კითხეთ ნებისმიერ იურისტის, ან პირველი კურსის სტუდენტს - ბრალდება წაგვიყენა მოსამართლემ და არა პროკურატურამ, მსგავსი რამ არსად წერია, რომ ბრალი წაგიყენოს მოსამართლემ, რომელზეც პროკურატურა არ გედავება. ეს დღეს ბიძინა ივანიშვილის ყურმოჭრილმა მონებმა გაიმეორეს თუთიყუშივით. მათ სიტყვა ვერც კი თქვეს, ვერც პირველმა და ვერც მეორე ინსტანციამ, რომ ფულის გათეთრება არ ყოფილა და ჩვენ ვართ მართლები. ის, რომ მე ახლა თქვენ წინაშე ვდგავარ და ის, რომ 4 წელია ეს სასამართლო მიმდინარეობს, ჩვენ კი არ ვართ საპყრობილეში, ნიშნავს, რომ აბსურდული საქმე - ფულის გათეთრება არ არსებობს. ამ თემასთან და ამ საქმესთან დაკავშირებით სხვა ბრალდება ჩვენ წინაშე არ ყოფილა. ერთადერთი რაზეც გვედავებოდნენ იყო ფულის გათეთრება, რომელიც არ ყოფილა. ეს არც პირველ და და არც მეორე ინსტანციაში არ დადასტურდა. რაც ახლა გამოიგონეს და საქალაქო და სააპელაციო სასამართლოებმა დაადასტურეს, ეს არის სამართლებრივი ნონსენსი, ადამიანის უფლებების უხეში დარღვევა“, - განაცხადა ხაზარაძემ.
- ადვოკატ ზვიად კორძაძის განცხადებით, ხაზარაძე-ჯაფარიძე-წერეთლის საქმეზე თბილისის სააპელაციო სასამართლოს მიერ მიღებული გადაწყვეტილება უზენაეს სასამართლოში გასაჩივრდება.
როგორც მან ჟურნალისტებს განუცხადა, თუ უზენაესი სასამართლო დღევანდელ გადაწყვეტილებას ისევ ძალაში დატოვებს, საქმე სტრასბურგში გაიგზავნება.
"სააპელაციო სასამართლომ კიდევ ერთხელ დაადასტურა პირველი ინსტანციის სასამართლოს განაჩენი, რომ არავითარ ფულის გათეთრებას, რითაც ეს საქმე დაიწყო და რის გამოც ეს საქმე გახდა სკანდალური და ხმაურიანი, არ ჰქონია ადგილი. ამავდროულად, ძალაში დატოვა ვითომ ის თაღლითობის ბრალდება, რომ ბრალდების მხარისთვის მოეწმინდათ ის სირცხვილი, რომელიც უკავშირდება იმას, რომ 3 წელია ბრალდება ამტკიცებს, თითქოს აქ არის ფულის გათეთრება. ჩვენ აღნიშნულ განაჩენს ჩავიბარებთ. ის აუცილებლად გასაჩივრდება უზენაეს სასამართლოში. კიდევ ერთხელ ვამბობთ, არავითარ დანაშაულს, მათ შორის არც ფულის გათეთრებას და არც თაღლითობას აქ ადგილი არ აქვს. გავასაჩივრებთ უზენაეს სასამართლოში, დაველოდებით შედეგს და თუ იგივე გადაწყვეტილება დარჩა, ალბათ, სტრასბურგში წავიღებთ ამ საქმეს, სადაც ცალსახად დადასტურდება, რომ ბადრი ჯაფარიძესა და მამუკა ხაზარაძეს დანაშაული არ ჩაუდენია“,-განაცხადა კორძაძემ.
ცნობისთვის, სააპელაციო სასამართლომ მამუკა ხაზარაძე, ბადრი ჯაფარიძე და ავთანდილ წერეთელი ჯგუფურ თაღლითობაში დამნაშავედ ცნო, რითაც საქალაქო სასამართლოს მიერ მიღებული გადაწყვეტილება ძალაში დატოვა.
თბილისის საქალაქო სასამართლოს გადაწყვეტილება გასაჩივრებული ჰქონდა როგორც დაცვის, ასევე ბრალდების მხარეს.
ასევე იხილეთ: