"მეუბნებოდა, - შინ რომ ჩავჯდე, არ მინდა, რა მნიშვნელობა აქვს, სად მოვკვდები, სახლში თუ გადასაღებ მოედანზეო" - ბუბა კიკაბიძის უკანასკნელი როლი: ფილმის პრემიერა მარტში იგეგმება

"სცენარი რომ დაიწერა, მაშინვე თვალწინ მისი სახე დამიდგა, უკვე ვიცოდი, რომ ბუბა უნდა ყოფილიყო ერთ-ერთი მთავარი პერსონაჟი და ასეც მოხდა - ეს არის ბუბას უკანასკნელი როლი კინოში“, - გვეუბნება რეჟისორი გიორგი კიკალეიშვილი, რომელმაც გასულ წელს ყაზახ კინემატოგრაფისტებთან ერთად ფილმი გადაიღო, სახელწოდებით: "მეტი, ვიდრე სიყვარული“. ფილმის პრემიერა, რეჟისორის თქმით, 8 მარტს ალმათაშია დაგეგმილი.

"სცენარი ყაზახეთის კინემატოგრაფიის ერთ-ერთი წამყვან სცენარისტს ეკუთვნის და ჩვენგან ნიკა რამიშვილს. საქართველოს და ყაზახეთს არასდროს ჰქონია ასეთი კულტურულ-შემოქმედებითი შეხება. ეს პირველი ერთობლივი ფილმია. ფილმზე როგორც ყაზახმა, ასევე ქართველმა ოპერატორმა იმუშავა“, - აღნიშნავს ფილმის რეჟისორი.

სცენარი კი ასეთია: მეორე მსოფლიო ომის დროს, მეგობრები - ქართველი და ყაზახი სიტყვას დადებენ, ერთმანეთს შეჰფიცებენ, რომ უნდა დაძმობილდნენ და დანათესავდნენ. ყაზახი ომში დაიღუპება, მეგობარს გადაეფარება. სიბერეში ქართველი თავის შვილიშვილებს, - ბიჭს და გოგოს, სთხოვს, ჩავიდნენ და მოძებნონ ყაზახი მეგობრის ოჯახი, ადამიანის, რომელმაც მას თავი შესწირა. შვილიშვილები ბაბუის თხოვნას შეასრულებენ. ფილმში ისე ხდება, რომ ბიჭი კი არ მოიყვანს ყაზახ ცოლს, არამედ ქართველი გოგო შეუყვარდება ყაზახის შვილიშვილს.

"ბახრამ, შენ მაინც შენი გაიტანე, არა? - ასე მიმართავს თავის დაღუპულ მეგობარს ბუბას პერსონაჟი, რომელსაც ფილმშიც ბუბა ჰქვია... ეპიზოდები იუმორითაა გაჯერებული და კარგი სიტუაციებია, როგორც უხაროდა ორ ხალხს შორის ეს მეგობრული ტანდემი რომ შედგა. მონდომებით ჩაერთო პროცესში და აქტიურად მონაწილეობდა“, - გვიყვება გიორგი კიკალიშვილი.

გადაღებები ალმათასა და თბილისში გასულ ზაფხულსა და შემოდგომაზე მიმდინარეობდა.

- როგორ შეხვდა ბატონი ბუბა ახალი როლის შეთავაზებას?

- სცენარს რომ ვუყვებოდი, დიდხანს იჯდა და მისმენდა. მერე მოკლედ თქვა, - ჩემთვის ძალიან მნიშვნელოვანია, მოდი, რა დავცხოთ, გავაკეთოთ კარგი საქმეო. დღე და ღამე გადაღებაზე იყო, გველოდებოდა, როდის გადავაწყობდით განათებას სხვა ეპიზოდისთვის. არის ამის კადრებიც... გრიმს რომ უკეთებდნენ, სულ ხუმრობდა. ამასთანავე, ისეც ხდებოდა, ველოდებოდით ხოლმე, დიალიზის გაკეთება ხშირად უწევდა, რის მერე მეტ ენერგიაზე მოდიოდა, - მოკლედ, შეძლო და ითამაშა.

სამწუხარო კიდევ ის არის, რომ ამ ფილმის მონაწილე მსახიობი, ყაზახეთის უძლიერესი არტისტი ფარალ ხარხადი 56 წლის ასაკში გარდაცვალა. დამსახურებული არტისტი იყო, გადაღებაზე თბილისში ჩამოვიდა. გადავიღეთ სცენები, დავასრულეთ და აქ, სასტუმროში ინფარქტით დაიღუპა. ახლა კი ჩვენ დავკარგეთ ბუბა.

- ე.ი. მხნედ და ხასიათზე იყო გადაღებებზე...

- ძალიან ახალგაზრდულად. იყო შემთხვევა, ციოდა და გარეთ ვიღებდით, ვეუბნებოდით, - იქნებ წახვიდეთ, ბატონო ბუბა, მძღოლი წაგიყვანთ, მოისვენეთო, - არაფრით გვთანხმდებოდა, - ბოლომდე ჩვენთან ერთად რჩებოდა. ბოლოს მეუბნებოდა, - ბიჭო, შინ რომ ჩავჯდე, არ მინდა, რა მნიშვნელობა აქვს, სად მოვკვდები, - სახლში სავარძელში თუ გადასაღებ მოედანზეო. არ ეპუებოდა, არ ჩერდებოდა. თან თავის რაღაც იდეებს მთავაზობდა, - იქნებ ასე სჯობიაო. საბოლოოდ, კარგი ფილმი გამოვიდა.

...ბუბას წასვლით ვფიქრობ, რომ რაღაც დიდი ეპოქა დამთავრდა. ხელოვნება პოლიტიკას არ შეეხება, ყველას თავის შეხედულება აქვს, მაგრამ ამ შემთხვევაში, საქართველომ დაკარგა დიდი არტისტი, სცენარისტი, მომღერალი, პიროვნება და ძალიან კარგი თბილისელი კაცი. ბუბა კოლორიტი იყო. დაუვიწყარია მისი ღიმილი, იუმორი და "მიმინო"... ჰოდა, ახლა "მიმინოსავით“ გაფრინდა...

გაჩერება არ უნდოდა, ამბობდა, მერე კიდევ გადავიღოთ რამეო... ვაპირებდით კიდევ ერთად მუშაობას... აი, ასე საღი გონებით წავიდა ამ ქვეყნიდან.

• იხილეთ ასევე:

"ვკითხულობ ბუბაზე ირონიულ პოსტებს და... იმ ხალხისგან მიკვირს, "მიმინოს" ჩუმად რომ უსმენენ" - კიკაბიძის ფოტო და ორად გაყოფილი აფხაზები: რას წერენ მომღერლის შესახებ?

“ჩემი შესანიშნავი პარტნიორი წავიდა" - როგორ ემშვიდობება ბუბა კიკაბიძეს "ლარისა ივანოვნა"

• ნახეთ კადრები ფილმიდან და გადასაღები მოედნიდან