"ვკითხულობ ბუბაზე ირონიულ პოსტებს და... იმ ხალხისგან მიკვირს, "მიმინოს" ჩუმად რომ უსმენენ" - კიკაბიძის ფოტო და ორად გაყოფილი აფხაზები: რას წერენ მომღერლის შესახებ?
ქართველი კინომსახიობის, საესტრადო მომღერლის, სცენარისტისა და კინორეჟისორის ბუბა კიკაბიძის გარდაცვალებას რუსეთის მიერ ოკუპირებულ აფხაზეთშიც ეხმაურებიან. ადგილობრივმა სამოქალაქო აქტივისტმა თემურ ყუბანოვმა ცნობილი მსახიობის სტეპან ბანდერას ძეგლის ფონზე გადაღებული ფოტო გამოაქვეყნა, ირონიული მინაწერით - "წავიდა თავის მეგობართან!".
ადგილობრივების ერთმა ნაწილმა გაიხსენა მომღერლის ფრაზა აფხაზებთან დაკავშირებით და აღნიშნა, რომ "ბუბას ეს ხალხი არ უყვარდა". ასევე იხსენებენ მომღერლის შარშანდელ ინტერვიუს, უკრაინის მოვლენებთან დაკავშირებით:
"მისი 2022 წლის ინტერვიუდან ამონარიდს წაგიკითხავთ, რომელშიც ამბობს, 20 წლით ახალგაზრდა რომ ვიყო, აუცილებლად ვიომებდი უკრაინაში, კარგად ვისვრიო. ცნობიერებით უკრაინელი ვარო!.. ალბათ არ მჭირდება იმის ახსნა, რომ იქ ჩვენი მეგობრები, ჩვენი ხალხი იბრძვის... 1992 წელს დასრულდა ჩემთვის მისი შემოქმედება!" - წერს პასუხად ირინა კარხალა.
არაერთმა აფხაზმა დაწერა, რომ როდესაც იმ ადამიანზეა ლაპარაკი, რომელმაც ეპოქა შექმნა, ყველაფერში პოლიტიკა არ უნდა გაერიოს.
"კარგს თუ ვერაფერს იტყვი, უნდა გაჩუმდე მაინც, რათა შენს გაუნათლებლობას არ გაუსვა ხაზი" - წერს ელენა ადლეიბა.
"ვინც არ უნდა იყოს ის, მე მის ფილმებზე გავიზარდე და ვაღიარებ მის შემოქმედებას. სულ არ მაინტერესებს პოლიტიკა და იქნებ მიხვდეთ, რომ ვერაფერი მოგიტანათ ასეთმა საუბრებმა.
ძალიან მიყვარს ჩემი სამშობლო, ომი მეც გამოვიარე. ერთი ძმა დამეღუპა, მეორე - მოსკოვშია, მკურნალობს, მაგრამ ის, რომ კიკაბიძე ქართველია, სულაც არ მიშლის ხელს მიყვარდეს, ნიჭს ეროვნება არ აქვს. ვინც ამას ვერ აცნობიერებს, მასთან კამათიც არ ღირს", - წერს კიდევ ერთი ადგილობრივი.
- ადგილობრივი პუბლიცისტი, თენგიზ აგრბა მიუღებელს უწოდებს დიდი მსახიობის მიმართ კრიტიკულ შეფასებებს და მიიჩნევს, რომ ყველა, ვინც მასზე ასე ლაპარაკობს, შორს არის ხელოვნებისგან, ნიჭისა და კულტურისგან...
"უკვე მერამდენედ ვნახე აფხაზების სრულიად მიუღებელი, მავნებლური პუბლიკაციები ბუბასთან დაკავშირებით - ადამიანი გარდაცვლილია და მისი განსჯა არავის ეკადრება, აფხაზს კი არა, არცერთი სხვა ეროვნების წარმომადგენელს. მე მასზე, როგორც მსახიობზე ვლაპარაკობ და არა, როგორც პიროვნებაზე. ასეთ დროს, სულ ცოტა, ჯობია გაჩუმდეთ, კარგის თქმა თუ არ შეგიძლიათ, მშვიდად განსვენება მაინც უსურვეთ. რომელი ჩვენგანია უცოდველი?!" - წერს აგრბა.
"რამდენიმე დღეა, ვკითხულობ ბუბაზე ვითომ ირონიულ პოსტებს და მიჭირს თავი შევიკავო - მათგან მიკვირს ასეთი პოსტები, ვინ იმ წლებში ცხოვრობდა, მის ფილმებზე, მის სიმღერებზე, მის როლებზე გაიზარდა და დარწმუნებული ვარ, ძალიან დიდი ნოსტალგიაც აქვს. იმდენად დიდი, რომ ხანდახან ჩუმადაც კი უსმენს მის "მიმინოს", მაგრამ ახლა, მიაჩნია, რომ საქმეს ასე სჭირდება. თქვენ ყველაზე საშიშები ხართ, რადგან სამშობლო არც გქონიათ და არც გექნებათ, იმიტომ, რომ პირველ რიგში, ღირსება არ გაგაჩნიათ...
არაფერს ვამბობ, უმცროს თაობაზე, მათ არ უცხოვრიათ იმ ეპოქაში და ვერც კიკაბიძის ხელოვნების აღქმას მოსთხოვ, მათთვის ის ერთი ჩვეულებრივი ქართველი მომღერალი იყო. თუ მისი მასშტაბის თანამედროვე პერსონას დამისახელებთ, არათუ აფხაზურ, რუსულ კულტურაშიც, გავჩუმდები. თქვენი ბრალი არ არის, რომ მშობლებს გამბედაობა არ აღმოაჩნდათ აგიხსნან - ვინ არის ბუბა?!. გარწმუნებთ, ამით მის დიდებულ სახელს არც არაფერი დააკლდება. თუმცა ჭეშმარიტი კულტურის შეფასებისას იცნობა საზოგადოების სახე, რომელიც, სამწუხაროდ, როგორც ირკვევა, აღარ შეგვრჩა!" - წერს ალმას ცკუა.