"სისულელეა ეს ყველაფერი და პროვოკაციაა" - როგორ პასუხობს ალექსანდრე გეჯაძე სააკაშვილის ადვოკატის ბრალდებას
ექსპერტი ალექსანდრე გეჯაძე მესამე პრეზიდენტის ადვოკატის შალვა ხაჭაპურიძის განცხადებას ეხმიანება და მას "სისულელესა და პროვოკაციას" უწოდებს.
"პირადად მე არ მომისმენია შალვამ რა ილაპარაკა პროცესზე. მე თვითონ მოვუსმენ, გავერკვევი და მივიღებ გადაწყვეტილებას როგორ მოვიქცე. სისულელეა ეს ყველაფერი და პროვოკაციაა... თუ აქვს ჩანაწერი, გამოაქვეყნოს. კომენტარს ამ ეტაპზე არ ვიძლევი. შალვასთან მქონდა წლებია კომუნიკაცია. არაერთი ექსპერტიზა დაუნიშნავს და არაერთი ექსპერტიზა ჩამიტარებია. სააკაშვილის ექსპერტიზა არ ჩამიტარებია, არანაირი დოკუმენტი არ გამიცია", - განუცხადა გეჯაძემ ფორმულას.
კითხვა - იყო თუ არა შემოთავაზება ჩაეტარებინა სააკაშვილის ექსპერტიზა, გეჯაძემ უპასუხოდ დატოვა: "კომენტარის გარეშე" - უთხრა მან "ფორმულას" ჟურნალისტს.
შეგახსენებთ, ადვოკატმა შალვა ხაჭაპურიძემ განაცხადა, რომ მას აქვს ფარული ჩანაწერი, სადაც "ალექსანდრე გეჯაძე ეუბნება", რომ "სააკაშვილის ექსპერტიზაში სიამოვნებით ჩაერთვება", თუმცა თუ შინაგან საქმეთა სამინისტროდან დაურეკავენ, დადებს იმ დასკვნას, რომელიც უწყებას აწყობს.
ხაჭაპურიძის მტკიცებით, გეჯაძემ მას უთხრა, რომ სწორედ ასე მოიქცა ლექსო ლაშქარავას შემთხვევაშიც, გააკეთა ის, რაზეც მთავრობამ მიუთითა.
ასევე იხილეთ: