27
მარტიდღის ზოგადი ასტროლოგიური პროგნოზი
არის რაღაც, რაც კონკრეტულ ადგილებსა და ადამიანებს თავისებურად გვამახსოვრებს: შეიძლება არ გახსოვდეს, რომელი ყავა გასინჯე იმ პატარა, მყუდრო კაფეში, მაგრამ არასდროს დაგავიწყდება სურნელი, რომელიც ფინჯნის მაგიდასთან მორთმევისთანავე შეიგრძენი. ანდაც, თუ დაჰკვირვებიხართ, რომ საყვარელ ადამიანს თავისი დამახასიათებელი, ყველაზე სასიამოვნო სურნელი აქვს? სურნელი, რომელიც არ მეორდება და რომელსაც ვერ ვივიწყებთ.
ადამიანის უნარს, გასაოცარი სიზუსტით დაიმახსოვროს სურნელი, მარკეტინგში დიდ მნიშვნელობას ანიჭებენ. არომა მარკეტინგ კომპანია „არომაკოში“
გვიამბობენ, რომ საქართველოში არათუ მსხვილი, არამედ საშუალო ბიზნესიც კი იყენებს დამახასიათებელ სურნელს, რათა მომხმარებელს თავი დაამახსოვროს და კვლავაც გაუჩინოს უკან დაბრუნების სურვილი.
როგორ ხდება ეს? „არომაკოში“ განგვიმარტეს, რომ სხვადასხვა სფეროში განსხვავებული არომატები გამოიყენება. მაგალითად, სანაყინესთან ჩავლისას შეიძლება შეიგრძნოთ ვანილის მადისაღმძვრელი სურნელი, რაც გაფიქრებინებთ, რომ აქ უგემრიელესი ნაყინის დაგემოვნებას შეძლებთ და დაუგეგმავად ესტუმროთ მას. საშობაოდ მორთულ ქუჩაზე ჩავლისას საფუნთუშიდან თუ დარიჩინისა და ფორთოხლის სურნელი შეიგრძენით, ეს ნიშნავს, რომ ობიექტი თქვენი სადღესასწაულო განწყობის ამაღლებასა და მადის აღძვრაზე ზრუნავს. თუ სპა სალონში გარემომაც კი დაგამშვიდათ, იცოდეთ, რომ ამაში ლავანდის ნოტების „ხელიც ურევია“ და ა. შ.
წლების განმავლობაში, სარეცხი საშუალებების ინდუსტრია კონცენტრირებული იყო იდეალური სისუფთავის რეკლამირებაზე. კომპანიები უდიდეს ძალისხმევას იჩენდნენ, მომხმარებელი დაერწმუნებინათ, რომ სწორედ მათი პროდუქტი რეცხავდა ტანსაცმელს იდეალურად. ეს მესიჯი ბოლომდე მაინც არ მუშაობდა, სანამ მარკეტერებმა არ აღმოაჩინეს, რომ გამორჩათ მნიშვნელოვანი დეტალი: სურნელი. მომხმარებელს სჭირდებოდა შეეგრძნო ის სისუფთავე, რომელსაც ჰპირდებოდნენ. დღეს, თითქმის ყველა სარეცხი საშუალების მწარმოებელი იყენებს სპეციალურ ნოტებს, რომლებიც ტექსტილს სისუფთავისა და სიახლის სურნელს ანიჭებს. ამგვარად, მომხმარებელი დარწმუნებულია, რომ მისი პერანგი ნამდვილად სუფთაა.
ამდენად ძლიერ მოქმედია არომა მარკეტინგი ადამიანის გადაწყვეტილებებზე და მაინც, რომელია ის სამი ყველაზე გამორჩეული სურნელი, რომელიც ჩვენს განწყობაზე მაგიურად მოქმედებს?
„არომაკო“, რომელსაც საქართველოში შემოსვლამდე ისრაელის ბაზარზე ოპერირების 19-წლიანი გამოცდილება აქვს, გამოარჩევს სამ უნივერსალურ და ყველაზე გამორჩეულ სურნელს: ვანილი, ციტრუსი და დარიჩინი. ამ ჩამონათვალს მოსდევს ახლად დაფქული ყავის, შოკოლადის, ჯინჯერის, ქოქოსის, ლავანდის, ვარდისა და სხვა სასიამოვნო სურნელი, თუმცა ჩვენ ყველაზე პოპულარულზე შევჩერდეთ:
ვანილი - მისი მოტკბო სურნელი აღვიძებს მოგონებებს და ქმნის მყუდრო გარემოს. მნიშვნელობა არ აქვს, მისი არომატი ხელის კრემში, სუნამოში, ნამცხვარში, ნაყინში თუ კაფეს ინტერიერშია გამოყენებული, ნებისმიერ გარემოში ვანილი ადამიანზე მაგიურად მოქმედებს.
აღსანიშნავია, რომ ვანილი განსაკუთრებით აახლებს ბავშვობის მოგონებებს, რაც სენტიმენტალურ შეგრძნებებს გვიჩენს იმ ობიექტის თუ პროდუქტის მიმართ, სადაც ვიმყოფებით. თუ გახსოვთ, წლების წინ ჩვენი მშობლები და ბებიები ნამცხვრის გამოცხობისას ვანილის პატარა, კრემისფერ შეფუთვებს რომ იყენებდნენ? ჩვეულებრივ, ასეთი ფუსფუსი დღესასწაულებისთვის იყო დამახასიათებელი და შეუძლებელია, ის დრო არ გაგვახსენდეს და არ გაგვეღიმოს. ვანილის არომატები სწორედ ასეთი პატარა და სასიამოვნო მოგონებების გასაღვიძებლად გამოიყენება.
ამასთან, ის საკმაოდ მადისაღმძვრელია და გვიჩენს განცდას, რომ ფუნთუშა, რომელსაც მივირთმევთ, იმაზე გემრიელია, ვიდრე შეიძლება სინამდვილეში იყოს.
ციტრუსი - მაშინაც კი, როცა სახლში ფორთოხალს ან მანდარინს მივირთმევთ, უცებ გვეცვლება განწყობა, ვცოცხლდებით და სიახლის შეგრძნება გვეუფლება. ციტრუსის ეს სასიამოვნო ნოტები ხშირად „შეფარულად“ და დაბალანსებულად არის გამოყენებული სხვადასხვა პროდუქტისა და სერვისის გასაყიდად.
ლიმონის ნამცხვარიც კი იმაზე ჯანსაღი და ახალი გვეჩვენება, ვიდრე სხვა ნებისმიერი, თუნდაც ბანანის ნამცხვარი მოგვეჩვენებოდა, რადგან მასში ციტრუსის ნოტებია.
ფორთოხლის სურნელი განსაკუთრებით აქტუალურია საშობაო პერიოდში. მას განსაკუთრებით ხშირად მიმართავენ საფუნთუშეები, საშობაო სოფლები თუ საახალწლო პროდუქციის მაღაზიები. განწყობის ასამაღლებლად მასთან ხშირად სინთეზშია დარიჩინის სურნელიც. ამ ერთობლიობის გავლენისგან თავის დაღწევა კი მართლაც შეუძლებელია ხოლმე, ამიტომ გირჩევთ, დანებდეთ და გასინჯოთ ის მადისაღმძვრელი ფუნთუშა, რომელმაც საშობაო სურნელი დაატრიალა.
დარიჩინი - ჩაიში, ყავაში, გლინტვაინში, ნამცხვარში, ფუნთუშაში - ეს პროდუქტი გამოიყენება ყველაფერში, განსაკუთრებით მაშინ, როცა წინ შობა-ახალი წელია. თუ საახალწლო სოფელში გაივლით და გლინტვაინის გასინჯვას გადაწყვეტთ, შეიძლება იმ მომენტში ვერ მიხვდეთ, მაგრამ დიდი ალბათობით, ეს დარიჩინის მძაფრი და სასიამოვნო ნოტების გამო გადაწყვიტეთ.
მისი სურნელი თბილ, მყუდრო, რომანტიკულ და სადღესასწაულო განწყობას ქმნის. თუ მკითხავთ, რა სურნელი ასოცირდება ახალ წელთან, დაუფიქრებლად დარიჩინის არომატს გიპასუხებდით.
არ გაგიკვირდეთ, თუ მის დაბალ ნოტებს საცალო გაყიდვების მაღაზიებშიც შეიგრძნობთ, განსაკუთრებით მაშინ, როცა თაროებზე ნაძვის ხის სათამაშოები და საახალწლო აქსესუარებია გამოტანილი.
დასასრულ, „არომაკოს“ ექსპერტებმა სახლში სასიამოვნო, მშვიდი და მყუდრო განწყობის შესაქმნელად გვირჩიეს ლავანდის სურნელი, რომელიც, მათი ინფორმაციით, განსაკუთრებით დადებითად მოქმედებს ბავშვებზე.
თუ დაგაინტერესათ, მაინც რომელი სურნელი შეესაბამება თქვენს ბიზნესსა თუ საცხოვრებელ გარემოს, მიმართეთ „არომაკოს“ ექსპერტებს, რომლებიც თქვენთვის საუკეთესო ნოტებს მოძებნიან.
ჩემი დაკვირვებით, ყნოსვითი მეხსიერება ყველაზე გამძლეა. ათეულობით წლების მერეც კი არ იკარგება.