"რთული ვითარებაა ბახმუტში, დაჭრილია მეთაური... ქართველები უკრაინელებთან ერთად ალყაში არიან" - რომეო ფარულავა
უკრაინაში მყოფი ქართველი მებრძოლის რომეო ფარულავას ინფორმაციით, დონეცკის ოლქის ქალაქ ბახმუტში, სადაც 5 ქართველი დაიღუპა, დაჭრილია მეთაურიც. როგორც ის ამბობს, უკრაინელებთან ერთად ალყაში არიან სხვა ქართველებიც.
"ეს არის კატასტროფა, რაც დღეს მოხდა. რამდენიმე ადამიანი მზად ვართ, რომ შევუერთდეთ იმ უკრაინელებს, რომლებიც ხელმძღვანელობენ დაღუპული ბიჭების გამოყვანის ოპერაციას.
აუცილებლად გამოვიყვანთ. ძალიან რთული მდგომარეობაა ბახმუტში, ვეკონტაქტებით წინა ხაზზე ბიჭებს. დაჭრილია მეთაური ზ.მ. (შეგნებულად სახელს და გვარს არ ვასახელებ), დანარჩენი ბიჭები ჩვენს უკრაინელ ძმებთან ერთად არიან ალყაში და მიდის ბრძოლა ამ ბიჭების გამოსაყვანად. მათი, ვინც ცოცხლები არიან ჩარჩენილები, ასევე ჩვენი დაღუპული გმირების გამოსასვენებლად" - თქვა ფარულავამ "მთავარ არხთან" საუბრისას.
ცნობისთვის, უკრაინაში 5 ქართველი მებრძოლი მოკლეს. არსებული ინფორმაციით, ისინი ბახტუმთან დაიღუპნენ. არსებული ინფორმაციით, ქართველ მებრძოლებს "კადიროველები" დაესხნენ თავს.
გარდაცვლილები არიან ავთო რურუა, რომეო კვარაცხელია, ბადრი მარკელია, მერაბ ალადაშვილი, რომეო ფირჩხაია.
24 თებერვლიდან დღემდე უკრაინაში რუსეთის ომს 32 მებრძოლი შეეწირა.